Ruëëc 2 - RUAC KUƆTH IN RƐL RƆ

Jääk Kuɔth Nhial kä Bo-kim

¹ Täämɛ cu jääk Kuɔth Nhial jiɛɛn kä Gil-gal wëë kä Bo-kim. Kä cuɛ ji̱ I-thɛ-rɛl jiök i̱, “Ɣän cä yɛ ka̱m raar kä I-jëp, kä cä yɛ naŋ muun ëë cä yac i̱ bä ka̱m guurikun. Ɛ laarä jɛ i̱, ‘Cä gukdä bi däk kɛ yɛ,

² kä cia guk bi la̱t kɛ ji̱ wec ɛ mi. Bia da̱kɛ ni yi̱knikiɛn piny.’ Kä /ken yɛn ruacdä liŋ. Kä ɛŋu ɛ nɛ cia la̱tdɛ?

³ Ɛ jɛn jiökä yɛ mɔ täämɛ ɛn ɣöö /cäkɛ bi joc nhiamdun. Ɛni ɣöö bi ka riɛk kä yɛ, kä bi kuthkiɛn a dëëpkun.”

⁴ Mëë ci jääk Kuɔth Nhial ruac ɛmɔ la̱t ji̱ I-thɛ-rɛl diaal, cu naath wiee.

⁵ Cukɛ gua̱a̱th ɛ mɔ cɔl i̱ Bo-kim, kä cukɛ Kuoth Nhial moc muc thi̱n.

Lia̱a̱ Jɔ-cua

⁶ Mëë ci Jɔ-cua naath jak kä wä, cu ram ɔ kä ji̱ I-thɛ-rɛl wä, wee gua̱a̱thdɛ min bɛ ciɛŋ ka̱n kä mun.

⁷ Kɛ ni̱n teekä Jɔ-cua diaal cu ji̱ I-thɛ-rɛl Kuoth Nhial pal, amäni ni̱n bööthni tëë ci lɔ̱ɔ̱ tëk kɛ kɔr li̱eth Jɔ-cua, tëë ca ti buɔ̱m buɔ̱ɔ̱m diaal tëë ci Kuoth Nhial kɛ lät kä ji̱ I-thɛ-rɛl nɛn.

⁸ Cu Jɔ-cua gat Nun ja̱ŋ Kuɔth Nhial li̱w a tëë kɛ run ti kuɔ̱r kɛl wi̱cdɛ jiath kɛl di̱eeth.

⁹ Kä cukɛ jɛ kony muundɛ kä Tim-nath-ɣe-rɛth ro̱o̱l päämni Ɛ-pa-rim, kui̱c caam pa̱a̱m Gac.

¹⁰ Cu ri̱c ɛ mɔ kɛɛliw li̱w. Kä cu ri̱c dɔ̱diɛn rɔ jiɛc mi kui̱c Kuoth Nhial, kiɛ lät tëë cɛ lät kä ji̱ I-thɛ-rɛl.

Päl ji̱ I-thɛ-rɛl kɛ ŋa̱th Kuɔth Nhial

¹¹ Cu ji̱ I-thɛ-rɛl jiäk la̱t nhiam Kuɔth Nhial. Cua pal ni kuoth Baal.

¹² Kä /ca Kuoth Nhial Kuoth gua̱ni päl, mëë nööŋkɛ raar ro̱o̱l I-jëp. Cua guɔ̱ɔ̱r ni kuth kɔ̱kiɛn kä kuth nɛɛni tin cieŋ thieekädiɛn. Ca Kuoth Nhial cu jak kä gak.

¹³ /Ca Kuoth Nhial päl wä kɛ pal ni kuoth Baal kɛnɛ Ac-tar-te.

¹⁴ Inɔ cu Kuɔth Nhial gaak ɛlɔ̱ŋ kɛ ji̱ I-thɛ-rɛl, cuɛ kɛ la̱th tetni Wa̱a̱ni, tin cikɛ wä kök ji̱ tɛ̈riɛn. Kä /ca rɔ lɛn luäŋ kɛ ga̱ŋ.

¹⁵ Kä mɔ cikɛ wä ko̱o̱r ɔ, la Kuoth Nhial a moc nikɛ kɛ riɛk, ce̱tnikɛ mëë cɛ la̱rkɛ. Tekɛ rɛy rikä mi di̱i̱t.

¹⁶ Cu Kuoth Nhial ruëëc jiɛc, ti ba kɛ kän kä nɛy tin mackɛ kɛ.

¹⁷ Kä cuɛ ŋot /ca ruëëc liŋ. Kɛ ɣöö guur kɛn ni kuth kɔ̱kiɛn. Kä pal kɛn nikɛ. Cua rɔ cu mal rit dup ëë ci gua̱ni jɛ guɔ̱ɔ̱r, tëë ca ruac Kuɔth Nhial luɔ̱th, kä /ken kɛn la̱t ni jɛ.

¹⁸ Kä mɔ ci Kuoth Nhial kɛ moc ruëëc ɔ, la tekɛ kɛɛl kɛ ruëëc, kä la kɛ a käänɛ tetni ji̱ tɛ̈riɛn kɛ ni̱n teekä rueecä diaal. La Kuoth Nhial a tekɛ nhök kɛ kɛ mi cikɛ cuuc ciɛɛŋä mi jiääk.

¹⁹ Duundɛ ɣöö mɔ ci ruëëc li̱w ɔ, la kɛ rɔ cua̱ ri̱t jɔk, kä bi la̱tdiɛn cu jiääk ɛlɔ̱ŋ kä la̱t gua̱ni, guɔ̱ɔ̱rkɛ ni kuth ti guäy, pal kɛn nikɛ a /cikɛ dëë me̱t luny piny kä buɔ̱m wecdiɛn.

²⁰ Inɔ cu Kuɔth Nhial gaak ɛlɔ̱ŋ kɛ ji̱ I-thɛ-rɛl. Wee i̱, “Kɛ ɣöö ci nɛy ti̱ti̱ gukdä mëë cä la̱t gua̱ni lo̱k, kä /ka̱n ruacdä liŋ,

²¹ niɛ täämɛ a wä nhiam, /cä dör tëë bäny Jɔ-cua kɛ piny mëë li̱wɛ bi joc nhiamdiɛn,

²² bä ji̱ I-thɛ-rɛl ɣɔ̱n kɛ kɛ, mi bikɛ jɛ tit a ba duɔ̱ɔ̱p Kuɔth Nhial guɔ̱ɔ̱r ce̱tkɛ mëë ci gua̱ni jɛ la̱t, kiɛ cikɛn ɛ bi la̱t.”

²³ Inɔ /ken Kuoth Nhial dör tɔ̱tɔ̱ joc kä kɛɛl, cuɛ kɛ päl, kä /kenɛ kɛ ka̱m Jɔ-cua.