Ruëëc 19 - RUAC KUƆTH IN RƐL RƆ

Raan Lii-bay kɛnɛ luɔmdɛ

¹ Kɛn ni̱ni tɔ̱tɔ̱, mëë thilɛ kuäär kä I-thɛ-rɛl, tëë kɛ raan ji̱ Lii-bay mi cieŋ rɛy cieŋ ro̱o̱l päämni Ɛ-pa-rim, mi ci rɔ moc luɔm kä Beth-lɛ-ɣɛm kä Juda.

² Kä cu luɔmdɛ gaak kɛ jɛ, kä cuɛ jiɛɛn kä jɛ wëë dhɔr gua̱n kä Beth-lɛ-ɣɛm kä Juda, cuɛ te wi̱ni kɛ päth ŋuaan.

³ Ɛ jɛn cu cɔwdɛ wä kɔɔrɛ, kɛ ɣöö bɛ wä ruac kɛ jɛ agɔaa, kä derɛ jɛ cu luɔ̱c jɔk. Cu wut ɛmɔ wä kɛnɛ läätdɛ kɛ muɔ̱li da̱ŋ rɛw. Kä cu ciek ɛ nööŋ dhɔr gua̱n. Kä mëë wä gua̱n ciëŋ jɛ nɛn, cuɛ jɛ lor kɛ tɛ̈th lɔaac.

⁴ Kä cu gua̱nthudɛ jɛ jak kä cieŋ, cukɛ te kɛɛl kɛ ni̱n diɔ̱k mi̱thkɛ kä mäthkɛ kä cukɛ niɛɛn ɛn wi̱ni.

⁵ Kɛ ŋuaan ni̱ni cukɛ keer nikɛ runwaŋ, kä cuɛ rɔ rialikä kɛ jiɛɛn. Duundɛ ɣöö cu gua̱nthudɛ jɛ jiök i̱, “A ji̱ muɔckɛ mi̱eth, bi ku lɛ wä.”

⁶ Kä cu kɛn da̱ŋ rɛw nyuur mi̱thkɛ kä mäthkɛ kɛɛl. Kä cu gua̱nthudɛ jɛ jiök i̱, “Ku niɛɛn ɛn wääri mi nhɔki jɛ, deri rɔ liŋ.”

⁷ Kä mëë cɛ rɔ jiɛc kɛ ɣöö derɛ jiɛɛn, cu gua̱nthudɛ jɛ kok, amäni mëë cɛ rɔ nyɔk kɛ ni̱en.

⁸ Kä kɛ dhieec ni̱ni cuɛ keer nikɛ runwaŋ kɛ ɣöö bɛ jiɛɛn. Cu gua̱nthudɛ jɛ jiök i̱, “A ji̱ muɔckɛ mi̱eth, li̱pni amäni bua̱k ca̱ŋ.” Cu kɛn da̱ŋ rɛw mi̱th kɛɛl.

⁹ Kä min ci wut kɛnɛ luɔmdɛ kɛ läätdɛ rɔ jiɛc, kɛ ɣöö bikɛ jiɛɛn. Cu gua̱nthudɛ jɛ jiök i̱, “Nɛnɛ, täämɛ wee kä thiaŋ. Ku niɛɛn ɛn wa̱nɛ. Bɛ cuɔl täämɛ. Teni liŋ rɔ, i̱ run kɛ runwaŋ bia cu jiɛɛn wädun cieŋ.”

¹⁰ Duundɛ ɣöö /ci wut ɛ nhɔk i̱ bɛ rɔ nyɔk kɛ ni̱en ɛn wa̱nɔ. Cuɛ rɔ jiɛc kä cuɛ jiɛɛn, kä cuɛ cop lotdä Yɛ-buth (min la Jɛ-ru-tha-lɛm). Jɛn kɛnɛ luɔmdɛ kɛ muɔ̱likɛ da̱ŋ rɛw ti ɣa̱c.

¹¹ Mëë cikɛ thia̱k kɛ Yɛ-buth, ci ɣɔw ku thuŋ cuɔl. Kä cu läät kuäärɛ jiök i̱, “Ɛŋu/canɛ cuŋ ɔ dënɛ wä tɔ̱ɔ̱c wi̱i̱ ji̱ Yɛ-buth ɛmɔ?”

¹² Kä cu kuäärɛ jɛ jiök i̱, “/Canɛ rɔ bi yiath wi̱i̱ nɛɛni kɔ̱kiɛn, ti ci tɔ̱a̱ ji̱ I-thɛ-rɛl. Duundɛ ɣöö banɛ wä kä Giba.”

¹³ Kä cuɛ läätdɛ jiök i̱, “Bër cuɔpnɛ gua̱a̱th kɛl kä wi̱i̱ ti̱ti̱, banɛ wä niɛɛn kä Giba kiɛ kä Rama.”

¹⁴ Ɛ jɛn cukɛ wä dupdiɛn wäkɛ. Kä cu cäŋ kony kä kɛ thieekä Giba. Min la wec Ji̱ Ben-ya-min.

¹⁵ Kä cukɛ rɔ yiath thi̱n, kɛ ɣöö bikɛ wä niɛɛn kä Giba. Cuɛ wä thi̱n kä cuɛ wä nyuur dɛɛkä wec. Kä cuɛ thil ram mi naŋkɛ dhɔrɛ kɛ ɣöö dekɛ wä niɛɛn thi̱n.

¹⁶ Kä nɛnɛ tëë wut mi dɔaŋ mi bëë lät rɛy kakä kɛ thiaŋ. Ɛ raan ro̱o̱l päämni Ɛ-pa-rim, cieŋɛ kä Giba. Kä ji̱ wec kɛ ji̱ Ben-ya-min.

¹⁷ Cuɛ wi̱cdɛ kap nhial, kä cuɛ ja̱a̱l duɔ̱p nɛn dɛɛkä wec. Kä cu wut in dɔaaŋ wee, “Kä wi̱i̱nikä?”

¹⁸ Kä cu wut Lii-bay jɛ loc i̱, “Bä nɛy kä Beth-lɛ-ɣɛm kä Juda wa̱kɔ rɛy cieŋ ro̱o̱l päämni Ɛ-pa-rim gua̱a̱th in ciaŋä. Ɣän cä wä kä Beth-lɛ-ɣɛm kä Juda. Kä täämɛ wa̱a̱ luaak Kuɔth Nhial. Kä thilɛ ram mi ci ɣä naŋ dhɔrɛ.

¹⁹ Kä te nɛy kɛ wal kɛnɛ thiŋ kɛ kui̱ muɔ̱likɔ, kä te mi̱eth kɛnɛ kɔaŋ thi̱n kɛ kui̱da. Ɣän kɔnɛ luɔmdä kɛ läätdä. Thilɛ mi görkɔ.”

²⁰ Kä cu wut in dɔaaŋ wee, “A mal tekɛ ji̱. Bä min go̱o̱ri la̱t, ɛ ni ɣöö /ci bi niɛɛn raar dɛɛkä.”

²¹ Cuɛ jɛ nööŋ cieŋdɛ, kä cuɛ muɔ̱li moc wal. Kä cukɛ lak kä cukɛ mi̱th kä cukɛ maath.

²² Kɛ gua̱a̱th in mäthkɛ cu tha̱a̱ŋ wutni wec ti jiäk duel go̱l, pi̱mkɛn thi̱i̱k. Kä cukɛ wut in dɔaaŋ in la gua̱n cieŋ jiök i̱, “Kämni wut in ci ben cieŋdu raar, kɛ ɣöö dëë kɔ jɛ ben ka̱n.”

²³ Kä cu gua̱n duëël wä raar kä kɛ, kä cuɛ kɛ jiök i̱, “Eey. Gaatmaar, /cuarɛ mi jiääk ɛ mɔ lät. Kɛ ɣöö wut ɛmɛ ɛ ja̱l dhɔaarä /cuarɛ duŋ po̱cä nɔmɔ lät.

²⁴ Nɛ̈nɛ jɛ nyaadä mɛn kɛnɛ luɔmdɛ. Akɛ nööŋä raar. La̱tdɛ kɛ kä mɔ nhɔakɛ mɔ. Kɛ wut ɛmɛ /cia mi jiääk ɛ mɔ bi la̱t.”

²⁵ Kä duundɛ ɣöö /ken wutni jɛ liŋ. Kä cu wut Lii-bay luɔmdɛ ɔak raar kä kɛ. Kä cukɛ niɛɛn kɛ jɛ kɛ wäär kɛɛliw amäni bak ɣɔaa. Kä mëë po̱o̱tdɛ ɣɔw cukɛ jɛ jak kä wä.

²⁶ Bakä cu ciek luny dhɔr in cieŋ kuäärɛ thi̱n. Cuɛ tɛɛth thok duëël amäni buay ɣɔaa.

²⁷ Kä cu kuäärɛ rɔ jiɛc kɛ runwaŋ, kä min cɛ thi̱i̱k duëël lɛp kɛ ɣöö bɛ wä jälɛ, nɛnɛ te luɔmdɛ thok duëël a te tetkɛ thiek duëël.

²⁸ Kä cuɛ jɛ jiök i̱, “Jiɛc rɔ banɛ wä.” Duundɛ ɣöö /kenɛ jɛ loc. Kä cuɛ jɛ la̱th jɔɔk muɔ̱l. Kä cuɛ jiɛɛn wëë dhɔrɛ.

²⁹ Kä min cɛ coth duëëlɛ, cuɛ tatuur ka̱n, kä cuɛ puɔ̱ny lomädɛ ŋuk ni dhon da̱ŋ wäl rɛw, kä cuɛ kɛ jäk kä gua̱thni tin cieŋ ji̱ I-thɛ-rɛl diaal thi̱n.

³⁰ Kä cu nɛy diaal tëë ca jɛ nɛn wee, “Mi ce̱tkɛ nɛmɛ /kenɛ me̱t tuɔ̱k kä /ka̱nɛ me̱t nɛn ni mëë ku ji̱ I-thɛ-rɛl ben raar muun I-jëp amäni walɛ. Banɛ duɔ̱ɔ̱r la̱t kɛ kui̱ kä nɛmɛ, kä bɛ ku lɛ tëë di?”