Ruëëc 18 - RUAC KUƆTH IN RƐL RƆ

Mikaa kɛnɛ thok duëël Daan

¹ Ɛn ni̱ni tɔ̱tɔ̱ thilɛ I-thɛ-rɛl kuäär. Kä ɛn ni̱ni tɔ̱tɔ̱ bä go̱r thok duëël Daan rɔ gua̱th mi bikɛ cieŋ thi̱n. Kɛ ɣöö ŋotdɛ thilɛ gua̱a̱th mi ci nia̱ mundiɛn rɛy cieŋ I-thɛ-rɛl.

² Inɔ cu thok duëël Daan wutni dhieec ti ŋɛ̈ny ŋɛ̈ɛ̈ny kä dho̱rikiɛn diaal kɛɛliw ja̱k, nikä Dhɔra kɛnɛ Ɛc-tool, kɛ ɣöö ba mun wä lim. Kä cua kɛ jiök i̱, “Wiaa liɛmɛ mun.” Kä cukɛ ben ro̱o̱l päämni Ɛ-pa-rim, cukɛ ben dhɔr Mikaa, cukɛ ben niɛɛn thi̱n.

³ Kä mëë tekɛ dhɔr Mikaa, cukɛ jɔw wutdä ji̱ Lii-bay mi ŋuɛ̈t ŋic. Kä cukɛ jɛ thiec i̱, “Ɛŋa nööŋ ji̱ ɛn wa̱nɛ? Kä ŋu lätdi mɔ ɛn wa̱nɛ mi? Kä la̱tdu ɛŋu ɛn wa̱nɛ mi?”

⁴ Kä cuɛ kɛ jiök i̱, “Tëë kɛ mi ca̱kɔ lat kɔnɛ Mikaa. Jɛn cɛ ɣä kɔk, kä cä cua̱ bo̱o̱th palä kä jɛ.”

⁵ Kä cukɛ jɛ loc i̱, “Thiec Kuoth, kua̱ kɔ läŋ ni ji̱, kɛ ɣöö dëë kɔ ja̱lɛ wa̱kɔ thi̱n ɛ ŋa̱c mi bɛ gɔaa.”

⁶ Kä cu bo̱o̱th palä kɛ loc i̱, “Wiaa kɛ mal. Bi Kuoth Nhial ja̱lun ɛ wiaa thi̱n ɔ jak kä gɔaa.”

⁷ Ɛ jɛn cu wutni dhieec tɔ̱tɔ̱ wä, cukɛ ben kä Lɛ̈-yic, kä cukɛ nɛy tin cieŋ thi̱n nɛn cieŋkɛ malä, ce̱tkɛ ji̱ Dhi-don, nɛy ti kɔ̱a̱c kɔa̱a̱c kä thilɛ mi diiw kɛn ɛ, kä thilɛ mi dak kä kɛ, riäŋkɛ kä na̱nkɛ kɛ ji̱ Dhi-don kä thilɛ kɛ maar kɛ ram mi dɔ̱ŋ.

⁸ Kä mëë cikɛ luny kä gaatmani kä Dhɔra kɛnɛ Ɛc-tool, cu gaatmani kɛ thiec i̱, “Cia ŋu jek?”

⁹ Kä cukɛ wee, “Jiacɛ rɔ, wanɛ kɛ ma̱k. Kɛ ɣöö ca̱kɔ mun nɛn gɔaa ɛlɔ̱ŋ. Thilɛ mi bia la̱t thi̱n. Kä /cuarɛ gal kɛ wä, bia mun wä ciɛŋ.

¹⁰ Mi wiaa cop ɛn wi̱ni, bia kɛ wä jek kɛn nɛy ti thilɛ mi diiw kɛn ɛ i̱ dëë kɛ jek. Ɛ mun mi di̱i̱t. Ci Kuoth ɛ ka̱m yɛ, ɛ mun mi thil mi dak thi̱n wi̱i̱ muɔ̱ɔ̱n.”

¹¹ Kä cu nɛy ti kur bäkɛl thok duëël Daan yio̱w kööriɛn ka̱n, kä cukɛ tɛth piny kä Dhɔra kɛnɛ Ɛc-tool.

¹² Kä cukɛ wä pua̱t thieekä Kir-yath-ya-rim kä Juda. Kɛ kui̱ ɛmɔ cua kui̱c kony ca̱ŋ Kir-yath-ya-rim cɔli Ma-ɣa-ne-daan amäni walɛ.

¹³ Ɛn wa̱nɔ cukɛ wä ro̱o̱l päämni Ɛ-pa-rim, kä cukɛ ben dhɔr Mikaa.

¹⁴ Kä cu wutni dhieec tëë wä mun Lɛ̈-yic lim, gaatmani jiök i̱, “Ŋäc yɛn ɛ, ɛn ɣöö dhɔr ɛ mi tëë kɛ kuth, kuoth mi ca la̱t kɛ jiath kɛnɛ bi̱i̱ kath kɛnɛ kuoth mi ca täth kɛ yiëëth kɛnɛ wal? Ɛn täämɛ ŋa̱cɛ min bia la̱t.”

¹⁵ Kä cukɛ ben cieŋ, cukɛ wä duëël ŋuɛtdä raan ji̱ Lii-bay min te dhɔr Mikaa, kä cukɛ jɛ lät kä maalɛ kɛ min nööŋ jɛ.

¹⁶ Kä te ji̱ wec Daan ti kur bäkɛl cuŋä kɛ mutni thok duëël.

¹⁷ Kä cu wutni dhieec tëë wä mun lim coth rɛy duëël kä cua kuth tin ca la̱t kɛ jiɛn, kɛnɛ tin ca la̱t kɛ yiëëth ka̱n guäth in te bo̱o̱th palä cuŋä thok duëël kɛnɛ nɛy ti kur bäkɛl ti tekɛ mutni.

¹⁸ Mëë cikɛ coth duëël Mikaa kä ca kuth wä ka̱n, cu bo̱o̱th palä kɛ jiök i̱, “Ɛŋu la̱t ɛmɛ?”

¹⁹ Kä cukɛ jɛ jiök i̱, “Bitni, kä kum thokdu kɛ tetdu, kä wanɛ kɛɛl, kä bia̱ bo̱o̱th paläda kä gua̱a̱ra. A ku gɔaa ni ɣöö bia̱ bo̱o̱th palä raam kɛl kä ɣöö bia̱ bo̱o̱th thuɔk duëël kä ji̱ I-thɛ-rɛl?”

²⁰ Kä cu lɔc bo̱o̱thä palä tɛɛth. Kä cuɛ kuth ka̱n cuɛ wä kɛɛl kɛ kɛ.

²¹ Cukɛ rɔ ri̱t wäkɛ, cua gaatkiɛn kɛ ɣɔ̱ɔ̱kiɛn kɛ kuakiɛn la̱th nhiamdiɛn.

²² Mëë cikɛ dhɔr Mikaa bäl ɛ määth, cu nɛy tin thiek dho̱rkiɛn kɛ dhɔr Mikaa rɔ mat, kä cukɛ ji̱ Daan cuɔp lɛɛr.

²³ Kä cukɛ ji̱ Daan cɔl, kä cu ji̱ Daan liɛc kä cukɛ Mikaa jiök i̱, “Ɛŋu ciöt kɛ ji̱ mɔ kä bi̱i̱ kɛ nɛy ti̱ti̱?”

²⁴ Kä cuɛ wee, “Cia kuthkä tin cä la̱t naŋ kɛ bo̱o̱th palä. Kuɛ la ŋu ci duɔth kɛ ɣä mɔ? Dëë yɛn ɣä ku lɛ thiëc ŋu i̱, ‘Ɛŋu rɔal kɛ ji̱ mɔ?’ ”

²⁵ Kä cu ji̱ Daan jɛ jiök i̱, “A jɔwdu ca̱kɔ liŋ rɛyda, a ji̱ ca bi ma̱k ɛ nɛy tin la malɛ kɛ̈c. Ɛ bia tëkdun lɛ bath yɛnɛ ji̱ dhɔaaru.”

²⁶ Kä mëë ci Mikaa jɛ guic ɛn ɣöö bum ni kɛn kä jɛ, cuɛ rɔ rit wëë dhɔɔrɛ. Kä cu ji̱ Daan wä dupdiɛn.

²⁷ Kä cukɛ tin ci Mikaa kɛ la̱t, kɛ bo̱o̱th palädɛ naŋ. Kä cu ji̱ Daan ben kä Lɛ̈-yic, kä nɛy ti pa̱lkɛ rɔ piny kä thilɛ mi diɛw kɛ, kä cukɛ kɛ näk, kä cukɛ wec waŋ.

²⁸ Kä cukɛ thil lua̱a̱k kɛ ɣöö na̱nɛ kɛ wec Dhi-don, kä thilɛ kɛ maar kɛ ram mi dɔ̱diɛn. Ɛn wec tëë lo̱o̱lä mi thieek kɛ Beth-re-ɣob. Kä cu ji̱ Daan wec nyɔk kɛ ta̱th, kä cukɛ cu cieŋ thi̱n.

²⁹ Kä cukɛ jɛ cɔl i̱ Daan kɛ ciöt gua̱ndɔɔŋdiɛn ni Daan, mëë la gat Je-kɔb. Wec ɛmɔ kɛ nhiam cɔalɛ Lɛ̈-yic.

³⁰ Kä cu ji̱ Daan kuth tin ca la̱t kɛ jiɛn cuɔ̱ŋ rɔ. Kä cu Jo-na-than gat Ger-com gat Muthɛ, kɛnɛ gaatkɛ a bööth palä kä ji̱ Daan amäni mëë pɛ̈ckɛ naath.

³¹ Cukɛ kuth Mikaa jak kä tëë wi̱ni kɛ gua̱a̱th ëë te luaak Kuɔth kä Cilo.