Ruëëc 17 - RUAC KUƆTH IN RƐL RƆ

Kuth Mikaa

¹ Tëë kɛ wut wec päämni Ɛ-pa-rim mi cɔali Mikaa.

² Cuɛ man jiök i̱, “Kɛn yio̱w ti bathdɔɔr wi̱cdɛ kuɔ̱r kɛl tëë ca kual kä ji̱, kä ci cueriɛn lam, kä latdi jɛ a liɛŋä. Nɛnɛ, kɛn yio̱w tekɛ kɛ ɣä. Cä kɛ ka̱n.” Kä cu man wee, “Ɛ Kuoth Nhial poth ji̱ gatdä.”

³ Kä cuɛ yio̱w tin bathdɔɔr wi̱cdɛ kuɔ̱r kɛl luɔ̱c man. Kä cu man wee, “Cä yio̱w ti̱ti̱ lëy Kuoth Nhial tetkädä kɛ kui̱ gatdä, kɛ ɣöö bɛ kuth jiɛn täth ti ba pua̱nykiɛn rɔth kɛ yiëëth, kɛ kui̱c ɛmɔ täämɛ bäkɛ luɔ̱c ji̱.”

⁴ Inɔ mëë cɛ man luɔ̱c yio̱w, cu man yio̱w ti kur rɛw ka̱n, kä cuɛ kɛ ka̱m bël, min cukɛ täthni kuoth. Kä cuɛ te duëël Mikaa.

⁵ Kä ɛn Mikaa tëë kɛ duel kuthni, cuɛ wal kɛnɛ bi̱i̱ kath la̱t thi̱n. Kä cuɛ ram kɛl kä gaatkɛ kuany ala bo̱o̱th palädɛ.

⁶ Kɛn ni̱ni tɔ̱tɔ̱ thilɛ kuäär kä I-thɛ-rɛl. Lät ramɔ ni min gɔaa waaŋdɛ.

⁷ Täämɛ cuɛ lɛ tekɛ wut mi ŋuɛ̈t kä Beth-lɛ-ɣɛm kä Juda, thok duëël Juda, raan Lii-bay, cieŋɛ ɛn wi̱ni.

⁸ Jɛn cuɛ jiɛɛn wi̱c kä Beth-lɛ-ɣɛm kä Juda, kɛ ɣöö derɛ cieŋ guäth ɔ cɛ gua̱a̱th ciɛɛŋä jek thi̱n ɔ. Kä mëë cɛ ja̱l. Cuɛ ben ro̱o̱l päämni Ɛ-pa-rim ni dhɔr Mikaa.

⁹ Kä cu Mikaa jɛ jiök i̱, “Ji̱n bi̱nikä?” Kä cuɛ jɛ loc i̱, “Ɛ ɣän raan Lii-bay kä Beth-lɛ-ɣɛm kä Juda, kä bä wä cieŋ ɛn guäth ɔ bä gua̱a̱th jek thi̱n ɔ.”

¹⁰ Kä cu Mikaa jɛ jiök i̱, “Teni kɛɛl kɛ ɣä, bi cua̱ ram mi luëëk kä bo̱o̱th palä. Kä bä ji̱ ka̱m yio̱w da̱ŋ wäl kɛ ruɔ̱n, kɛnɛ bieyni kɛ mi̱ethdu.”

¹¹ Kä cu raan Lii-bay ɛ nhɔk i̱ bikɛ cieŋ kɛnɛ Mikaa. Kä cuɛ cieŋ ce̱tkɛ gatdɛ.

¹² Kä cu Mikaa jɛ kuany ala bo̱o̱th palädɛ kä cuɛ cieŋ dhɔr Mikaa.

¹³ Kä cu Mikaa wee, “Ɛn täämɛ bi Kuoth Nhial ŋɔak jak kä gɔaa kɛ ɣä, kɛ kui̱ raan Lii-bay min la bo̱o̱th palä.”