Ruëëc 16 - RUAC KUƆTH IN RƐL RƆ

Cim-con kä Gadha

¹ Cu Cim-con wä kä Gadha, ɛn wi̱ni cuɛ ciek mi ler nɛn, kä cuɛ wä tɔ̱ɔ̱c kɛ jɛ.

² Kä cua ji̱ Gadha la̱r lär i̱, “Cim-con a wa̱nɛ.” Kä cukɛ gua̱a̱th go̱l liɛpkɛ jɛ kɛ wäär kɛɛliw thok rɛ̈ɛ̈k wec. Cukɛ rɔ pa̱l piny kɛ wäär kɛɛliw wä kɛ i̱, “Liɛp nɛ jɛ ɛn wääri amäni runwaŋ, banɛ jɛ ku näk.”

³ Duundɛ ɣöö cu Cim-con niɛɛn amäni wärdäär. Kä cuɛ keer kä cuɛ thi̱ek ni thuɔk rɛ̈ɛ̈k wec wuk kä cuɛ kap kɛ wääthnikiɛn kɛɛl kɛ gääknikiɛn cuɛ kɛ la̱th wukädɛ kä cuɛ kɛ kap ni wi̱i̱ pa̱a̱m mi na̱n mi te lotdä Ɣɛb-ron.

Cim-con kɛnɛ Dɛ-li-la

⁴ Kɛ kɔr kä mɔmɔ cu Cim-con tekɛ nhök kɛ ciek mi cieŋ lo̱o̱lä Tho-rek, mi cɔal i̱ Dɛ-li-la.

⁵ Kä cu kuäär ji̱ Pi-li-thɛt ben kä ciek kä cuɛ jɛ jiök i̱, “Pɛlɛ, kä ŋäcni mɔ jak jɛ kä bum ɔ, kä dɔ̱ŋ derɛ tekɛ duɔ̱ɔ̱p mi tiam kɔ ni jɛ. Kä dɔ̱ŋ dëë kɔ jɛ yian a ba yak. Kä bi ramɔ ji̱ moc kä kɔ kɛ yio̱w ti bathdɔɔr wi̱cdɛ kuɔ̱r kɛl.”

⁶ Kä cu Dɛ-li-la Cim-con jiök i̱, “Nyuth ni ɣä gua̱a̱th bumädu, kä dëë ji̱ yian i̱di, a dëë raan i̱ yak.”

⁷ Kä cu Cim-con ɛ loc i̱, “Mi ca ɣä yian kɛ dep guup da̱ŋ bärɔw ti pay ŋɔn, dëë kɔ̱a̱c a bä ce̱tnikɛ nɛy tin kɔ̱ŋ.”

⁸ Kä cu kuäär ji̱ Pi-li-thɛt ɛ nöŋ dep bärɔw ti pay ŋɔn kä cuɛ jɛ yian kɛ kɛ.

⁹ Kä täämɛ tëë kɛ wutni ti li̱p duëëlɛ. Kä cuɛ Cim-con jiök i̱, “Cim-con, ji̱ Pi-li-thɛt a bëë kä ji̱ ni!” Kä cuɛ dep puɔ̱t ce̱tnikɛ thiek mi ca pɛt ɛ mac. Inɔ /ka̱n luɔt bumädɛ jek.

¹⁰ Kä cu Dɛ-li-la Cim-con jiök i̱, “Nɛnɛ, ci ɣä jak kä dɔ̱a̱r, ɛ kaŋi ni ɣä. Ɛn täämɛ bër kuɛ la̱r ɣä dëë ji̱ yian i̱di.”

¹¹ Kä cu Cim-con ɛ loc i̱, “Mi ci kɛn ɣä yian kɛ dep ti /ka̱n kɔn yian, ɣän dëë kɔ̱a̱c a bä ce̱tnikɛ duɔth nath ti kɔ̱ŋ.”

¹² Ɛ jɛn cu Dɛ-li-la dep ti pay ŋɔn ka̱n kä cuɛ jɛ yian kɛ kɛ kä cuɛ jɛ jiök i̱, “Ji̱ Pi-li-thɛt tin, Cim-con!” Kä kɛn naath tekɛ li̱pä rɛy duëël. Duundɛ ɣöö cuɛ dep puɔ̱t ce̱tnikɛ lath tetnikɛ.

¹³ Kä cu Dɛ-li-la Cim-con jiök i̱, “Mäni täämɛ jaki ɣä kä dɔ̱a̱r, a lätdi ni ɣä kac. Läri jɛ ɣä dëë ji̱ yian i̱di.” Kä cuɛ jɛ jiök i̱, “Mi pi̱thi tak mieemkä da̱ŋ bärɔw ti̱ti̱ kɛ rɔk kä bikɛ pua̱t kɛ lo̱c. Ɣän bä kɔ̱a̱c, a bä ce̱tnikɛ nɛy tin kɔ̱kiɛn.”

¹⁴ Kä min cɛ niɛɛn, cu Dɛ-li-la tak mieem wecdɛ da̱ŋ bärɔw pith kɛ rɔk. Kä cuɛ kɛ pua̱t kɛ lo̱c, kä cuɛ Cim-con jiök i̱, “Ji̱ Pi-li-thɛt tin Cim-con!” Duundɛ ɣöö cuɛ keer ni̱n, cuɛ rɔk kɛnɛ lo̱c yuɔ̱t ni raar.

¹⁵ Kä cuɛ Cim-con jiök i̱, “Deri jɛ ku lɛ lar i̱, ‘Nhɔki ɣä i̱di,’ kä /ci lɔcdu te kä ɣä? Ci ɣä jak kä dɔ̱a̱r nikä diɔ̱ɔ̱k täämɛ, kä /keni ɣä la̱r gua̱a̱th in te buɔ̱mdu thi̱n.”

¹⁶ Kä mëë ci Dɛ-li-la jɛ cuil ɛlɔ̱ŋ kɛ ruac ni ciaŋ, kä kokɛ jɛ, cuɛ gaak kɛ gak mi lia̱a̱.

¹⁷ Kä cuɛ Dɛ-li-la la̱t lɔcdɛ kɛɛliw, jio̱kɛ jɛ i̱, “/Ken reet me̱t rët kɛ wi̱cdä. Kɛ ɣöö ca ɣä lëy Kuoth ni mëë dapkɛ ɣä. Mi ca wi̱cdä mut, dëë buɔ̱mdä jiɛɛn kä ɣä, a dëë ce̱tnikɛ nɛy tin kɔ̱kiɛn.”

¹⁸ Mëë ci Dɛ-li-la jɛ ŋa̱c ɛn ɣöö ci Cim-con jɛ la̱t lɔcdɛ kɛɛliw, cuɛ kuäär ji̱ Pi-li-thɛt jäk kä ram mi wä jɛ cɔl, jio̱kɛ jɛ i̱, “Bër ni kä kɛɛl, kɛ ɣöö ci Cim-con ɣä la̱t lɔcdɛ kɛɛliw.” Kä cu kua̱r ji̱ Pi-li-thɛt ben kä Dɛ-li-la, a rɔamkɛ yio̱w kɛ rɔ̱ kɛɛl.

¹⁹ Kä cu Dɛ-li-la Cim-con jak kä ni̱n buɔ̱ɔ̱rɛ. Kä cu Dɛ-li-la raan cɔl, kä cuɛ tak mieem wec Cim-con da̱ŋ bärɔw muɔ̱t raar. Kä cuɛ jɛ tok kɛ mi yaakɛ jɛ, kä cu buɔ̱mdɛ jiɛɛn kä jɛ.

²⁰ Kä cuɛ wee, “Ji̱ Pi-li-thɛt tin Cim-con!” Kä cuɛ keer ni̱n, kä cuɛ wee, “Ɣän bä wä raar ce̱tkɛ ta̱a̱ in wen, a bä rɔ tɛŋ.” Kä /kui̱cɛ jɛ ɛn ɣöö ci Kuoth Nhial jiɛɛn kä jɛ.

²¹ Kä cu ji̱ Pi-li-thɛt jɛ käp kä cua nyinkɛ ka̱m raar, kä cua jɛ naŋ kä Gadha, cua jɛ yian kɛ ciik yieethä min yian. Kä la ɣɔ̱tdɛ duëël yieenä.

²² Duundɛ ɣöö cu miem wecdɛ rɔ nyɔk kɛ do̱ny kɛ kɔr kä mëë ca wi̱cdɛ mut.

Lia̱a̱ Cim-con

²³ Täämɛ cu kua̱r ji̱ Pi-li-thɛt duɔl kɛ ɣöö bikɛ ŋar kä ba muc thöp Da-gon kuothdiɛn. Kɛnɛ ɣöö cikɛ jɛ lar i̱, “Ci kuothda kɔ ka̱m gua̱n tɛ̈ra ni Cim-con.”

²⁴ Kä mëë ci naath Cim-con nɛn, cukɛ kuothdiɛn liak. Kä lar kɛnɛ i̱, “Ci kuothda kɔ ka̱m gua̱n tɛ̈ra, min ci wecda ya̱r, kä ci nɛy ti ŋuan näk kä kɔ.”

²⁵ Kä mëë cikɛ ku yɔ̱ŋ, cukɛ wee, “Cɔalɛ Cim-con, bɛ nɛy ben ŋa̱r ŋar.” Ɛ jɛn cua Cim-con ciöl raar rɛy duëël yieenä, kä cuɛ ŋar nhiamdiɛn. Kä cukɛ jɛ jak kä cuŋɛ kam thieeri.

²⁶ Kä cu Cim-con dho̱o̱l in käp tetdɛ jiök i̱, “Jak ni ɣä kä göörä thieer tin rɔamkɛ ti̱c nhial, kɛ ɣöö dëë rɔ cak kɛ kɛ.”

²⁷ Duel cɛ thia̱a̱ŋ kɛ wutni kɛnɛ män. Kä te kua̱r ji̱ Pi-li-thɛt da̱ŋ dhieec diaal thi̱n. Kä nhial wi̱i̱ duëël te wutni kɛnɛ män ti bathdɔɔri diɔ̱k thi̱n, ti guic min ŋar Cim-con.

²⁸ Cu Cim-con Kuoth Nhial pal wee i̱, “Aɣ Kuäär ni Kuoth, la̱ŋä ni ji̱ ti̱mä ɣä, kä bumä, kua̱ läŋ ni ji̱ kɛ kɛl ɛ mi lö Kuoth. Kɛ ɣöö dëë rɔ col kä kɛɛl kä ji̱ Pi-li-thɛt kɛ kui̱ nyiinkɛ da̱ŋ rɛw.”

²⁹ Kä cu Cim-con thieer da̱a̱r da̱ŋ rɛw tin cuŋ duel kɛ kɛ jek, kä cuɛ tet cuëëcdɛ la̱th kä kɛl, kä cuɛ tet caamdɛ la̱th kä min dɔ̱ŋ.

³⁰ Kä cuɛ wee, “A kua̱ li̱w kɛɛl kɛ ji̱ Pi-li-thɛt.” Ɛ jɛn kɛ buɔ̱mdɛ kɛɛliw cuɛ thieer wuk. Kä cu duel pɛn wi̱i̱ kua̱ri kɛn nɛy diaal tëë te rɛydɛ. Kä nɛy tin ci li̱w kɛ lia̱a̱dɛ, cu ŋuan ni kɛn kä tëë cɛ näk mëë tëkɛ.

³¹ Kä cu gaat man Cim-con kɛnɛ ji̱ dhɔaariɛn diaal ri̱ŋdɛ ben naŋ, kä cua jɛ wä kony kam Dhɔra kɛnɛ Ɛc-tool kɔ̱kä kunyä gua̱n ni Ma-no-aa, cuɛ I-thɛ-rɛl ruac kɛ run ti jiɛn rɛw.