Ruëëc 15 - RUAC KUƆTH IN RƐL RƆ

¹ Kɛ kɔr gua̱th mi tɔt, kɛ gua̱a̱th in la ŋɛ̈rkɛ bɛl, cu Cim-con wä wee ciekdɛ gui̱l kɛ dɔ dɛ̈ɛ̈l böwä. Kä cuɛ wee, “Bä wä kä ciekdä duëëlɛ.” Duundɛ ɣöö /ken gua̱n nyaal jɛ nhök wä duëël.

² Kä cuɛ jɛ jiök i̱, “Ɣän ɛ puc cä ŋa̱c ni ɣöö ciɛ lo̱k. Ɛ ɣän ca ka̱m määthdu. Kä ci gɔaa ni nyiman in tɔt ɛlɔ̱ŋ kä jɛ? Deri jɛ ka̱n ala ciekdu kɛ gua̱a̱th nyiman.”

³ Kä cu Cim-con kɛ jiök i̱, “Kɛ kɔr kä nɛmɛ ca̱a̱ bi lɛ bɛl ɛ ji̱ Pi-li-thɛt, mi wa̱a̱kɛ lät kä mi jiääk.”

⁴ Inɔ cu Cim-con wä kä cuɛ guakni ti kur diɔ̱k wä käp, kä cuɛ jua̱lkiɛn yien kä rithni. Kä cuɛ jua̱l kä rɛw yiɛn kɛɛl.

⁵ Kä mëë cɛ rithni dɔp kɛ mac, cuɛ guakni jak kä wä rɛy bɛɛl tin te cuŋä rɛy ka̱a̱kni ji̱ Pi-li-thɛt, kä cukɛ bɛl tin ca dol kɛnɛ tin te cuŋä waŋ, cu mäni jiɛn Ɔ-lip.

⁶ Kä cu ji̱ Pi-li-thɛt wee, “Ɛŋa lät nɛmɛ ɔ?” Kä cukɛ wee, “Ɛ Cim-con cɔw nya ran Tim-naa, kɛ ɣöö ci gua̱nthudɛ ciekdɛ ka̱m mäthdɛ.” Cu ji̱ Pi-li-thɛt ben, kä cua nyal kɛnɛ gua̱n ben waŋ.

⁷ Kä cu Cim-con kɛ jiök i̱, “Mi ɛ jɛn min cia la̱t, ɣän kɛ thuɔ̱k, bä tɛɛr kɛ yɛ, kɛ kɔrɛ bä kulɛ jiɛɛn.”

⁸ Kä cuɛ kɛ näk kɛ näk mi di̱i̱t. Kä cuɛ jiɛɛn cuɛ wä ciɛŋ ni rɛy kɔ̱a̱kni päämni E-tam.

Juc Cim-con kɛ ji̱ Pi-li-thɛt

⁹ Ɛ jɛn cu ji̱ Pi-li-thɛt ben pua̱t kä Juda. Kä cukɛ wä pɛɛc ni kä Lɛ-i.

¹⁰ Kä cu ji̱ Juda kɛ jiök i̱, “Ɛŋu cia nɛy ben ma̱k ɔ?” Kä cukɛ wee, “Bä nɛy kɛ ɣöö ba̱kɔ Cim-con ben naŋ, kä ba̱kɔ jɛ lät kä mi ce̱tkɛ min cɛ lät kä nɛy.”

¹¹ Ɛ jɛn cu nɛy ti bathdɔɔri diɔ̱k kä ji̱ Juda wä rɛy kɔ̱a̱kni päämni kä E-tam, cua Cim-con wä jiök i̱, “Kui̱ci jɛ inu ɛn ɣöö ji̱ Pi-li-thɛt ruackɛ nɛy? Kuɛ la ŋu mi ci lät kä nɛy ɛ?” Kä cuɛ kɛ loc i̱, “Ce̱tkɛ min ci kɛn ɛ lät kä ɣä, ɛ jɛn cä lät kä kɛ mɔ.”

¹² Kä cukɛ Cim-con jiök i̱, “Kɔn ba̱kɔ kɛ ɣöö ba̱kɔ ji̱ ben yian, kä ba̱kɔ ji̱ wä ka̱m ji̱ Pi-li-thɛt.” Kä cuɛ kɛ loc i̱, “La̱rɛ jɛ ɣä ɛn ɣöö cia ɣä bi näk ɛ yɛn.”

¹³ Kä cukɛ jɛ jiök i̱, “Eey ba̱kɔ yian ni ji̱ kä ba̱kɔ ji̱ wä la̱th tetnikiɛn. /Ca̱kɔ ji̱ bi näk.” Kä cukɛ jɛ yian kɛ dep da̱ŋ rɛw ti pay ŋɔn, kä cukɛ jɛ nööŋ piny wi̱i̱ pa̱a̱m.

¹⁴ Mëë cɛ ben kä Lɛ-i, cu ji̱ Pi-li-thɛt ɛ lor kɛ rɔal. Kä cu buɔ̱m yieekä Kuɔth Nhial ben kä jɛ, kä cu dep da̱ŋ rɛw tin ca yiɛn ni tetkɛ ce̱tnikɛ thi̱ec mi waaŋ mac ɛ, kä cu tetkɛ rɔ lony.

¹⁵ Kä cuɛ cɔ̱a̱ gɛtdä muɔ̱l mi ɣɔa̱a̱c jek piny, kä cuɛ jɛ kuany, kɛ jɛ cuɛ nɛy ti̱i̱ bathdɔɔr näk kɛ jɛ.

¹⁶ Kä cu Cim-con wee, “Kɛ cɔ̱a̱ gɛtdä muɔ̱l, cua̱ jɛ näk bua̱a̱n, kɛ cɔ̱a̱ gɛtdä muɔ̱l cua̱ jɛ näk nɛy ti̱i̱ bathdɔɔr.”

¹⁷ Mëë cɛ thuɔ̱k kɛ ruac, cuɛ cɔ̱a̱ gɛtdä yiäk tetädɛ. Kä cua gua̱a̱th ɛmɔ cu cɔli päm Ra-math-lɛ-i min lot ni ɣöö päm gɛtdä.

¹⁸ Kä cu rɛw ɛ näk ɛlɔ̱ŋ, kä cuɛ Kuoth Nhial cɔl wee i̱, “Ji̱n ci ja̱ŋdu ka̱m juc nɛɛni ti̱ti̱. Kä ɛn täämɛ bä cu li̱w kɛ rɛw, bä cu pɛn tetni nɛɛni ti /ka̱n cuɛl.”

¹⁹ Kä cu Kuoth piny wät ɛn wi̱ni kä Lɛ-i, kä cu pi̱ ben thi̱n. Kä min cɛ maath, cuɛ yieykɛ cu jek, kä cuɛ rɔ cu nyɔk kɛ buɔ̱m. Ɛ jɛn cua gua̱a̱th ɛmɔ cu cɔl i̱ En-ɣa-ko-re, jɛn kä Lɛ-i amäni walɛ.

²⁰ Cu Cim-con I-thɛ-rɛl ruac kɛ run ti jiɛn da̱ŋ rɛw, mëë ruec ni ji̱ Pi-li-thɛt.