Ruëëc 13 - RUAC KUƆTH IN RƐL RƆ

Da̱p Cim-con

¹ Ɛ jɛn cu ji̱ I-thɛ-rɛl jiäk lɛni la̱t nhiam Kuɔth Nhial. Kä cuɛ kɛ la̱th tetni ji̱ Pi-li-thɛt kɛ run ti jiɛn ŋuaan.

² Kä cuɛ lɛ tekɛ wut Dhɔra raan Daan mi cɔali Ma-no-aa. Mi ciekdɛ thilɛ jɛ gaat ɛ rol.

³ Kä cu jääk Kuɔth Nhial ben kä ciek, kä cuɛ jɛ jiök i̱, “Nɛnɛ, ji̱n lapi rol thilɛ ji̱ gaat. Duundɛ ɣöö bi ruët kä bi dap kɛ dhɔl.

⁴ Kɛ kui̱c ɛ mɔ titdɛ, /cu mäth kɛ kɔaŋ, kä cu mi jiääk cam.

⁵ Kɛ ɣöö bi ruët kä bi gat dap. Mi /ca wi̱cdɛ bi mut, kɛ ɣöö ba lëy Kuoth ɛn gat ni däpkädɛ. Kä bɛ ji̱ I-thɛ-rɛl luäk tetni ji̱ Pi-li-thɛt.”

⁶ Ɛ jɛn cu ciek ɛ ben la̱r cɔwdɛ i̱, “Tëë kɛ raan Kuɔth mi ci ben kä ɣä, kä ce̱t ta̱a̱dɛ kɛ jääk Kuɔth, kä jak gueec naath kä dual. Kä /ka̱nɛ thiec kɛ gua̱a̱th in bëë thi̱n, kä /kenɛ ɣä la̱r ciötdɛ.

⁷ Duundɛ ɣöö cɛ ɣä jiök i̱, ‘Nɛnɛ, ji̱n bi ruët kä bi dap kɛ dhɔl. Kɛ kui̱c ɛ mɔ, /cu mäth kɛ kɔaŋ, kä /cu mi jiääk cam. Kɛ ɣöö ɛn gat ba ley Kuoth ni däpädɛ amäni mɔ bɛ li̱w ɔ.’ ”

⁸ Kä cu Ma-no-aa Kuoth Nhial pal wee i̱, “Aɣ Kuoth Nhial palä ni ji̱, jak ni raandu ëë ci jäk kä nɛy nyɔk rɔ kɛ ben, bɛ kɔ ben nyuɔ̱th mɔ ba̱kɔ lät kä dhɔl ɛ ba dap ɔ.”

⁹ Kä cu Kuoth pal Ma-no-aa liŋ, cu jääk Kuɔth Nhial rɔ nyɔk kɛ ben kä ciek mëë tëë nyuurä rɛy kakä. Kä /ci cɔwdɛ ni Ma-no-aa te kɛɛl kɛ jɛ.

¹⁰ Kä cu ciek riŋ kɛ pɛ̈th wee cɔwdɛ la̱r lär i̱, “Nɛnɛ ram ëë ci kɔn ben kä ɣä mëë dan cɛ rɔ nyɔk kɛ ben.”

¹¹ Kä cu Ma-no-aa rɔ jiɛc kä cuɛ ciekdɛ guɔ̱ɔ̱r, kä cuɛ ben kä wut kä cuɛ jiök i̱, “Ɛ jɛn ji̱n wut ëë ruac kɛ jɛn ciek ɛ mi?” Kä cuɛ wee, “Ɛ ɣän.”

¹² Kä cu Ma-no-aa wee, “Täämɛ, mi wä ruacdu a thuɔ̱k, kä bi tëk dhɔaal ku la mi te i̱di, kä ɛŋu bɛ la̱t ɔ?”

¹³ Kä cu jääk Kuɔth Nhial ɛ jiök i̱, “Ɛ ciekdu lät tin diaal tin cä la̱t jɛ.

¹⁴ A jɛ /ci mi̱th kɛ mi̱eth mi thalkɛ ala kɔaŋ, kä a jɛ /ci mäth kɛ kɔaŋ, kä a /ci mi jiääk cam. A jɛ tiit tin diaal tin cä la̱t jɛ.”

¹⁵ Cu Ma-no-aa jääk Kuɔth Nhial jiök i̱, “Kua̱ läŋ ni ji̱, a kɔ gaŋ kɔ ji̱ piny, amäni mi ca̱kɔ mi̱eth rialikä kɛ kui̱du.”

¹⁶ Kä cu jääk Kuɔth Nhial ɛ jiök i̱, “Mi wi̱i̱ ɣä gaŋ piny, /cä bi mi̱th kä mi̱ethdu. Duundɛ ɣöö mi wi̱i̱ wä riali muc mi waŋkɛ ikä, tho̱pni jɛ Kuoth Nhial.” (Kä Ma-no-aa /kenɛ jɛ ŋa̱c ɛn ɣöö ɛ jääk Kuɔth Nhial.)

¹⁷ Kä cu Ma-no-aa jääk Kuɔth Nhial jiök i̱, “Kua ji̱ lɛ cɔl i̱ di, kɛ ɣöö mi wä ruacdu wa̱a̱ thuɔ̱k, dëë kɔ ji̱ la̱t agɔaa?”

¹⁸ Kä cuɛ jɛ loc i̱, “Ɛŋu go̱ri ciötdä mɔ, ɛ ciöt mi gääy naath.”

¹⁹ Kä cu Ma-no-aa dɛl ka̱n kɛnɛ bɛl ala muc, kä cuɛ jɛ thöp Kuoth Nhial wi̱i̱ pa̱a̱m. Kä cu Kuoth ti ga̱ykɛ naath la̱t min guic Ma-no-aa kɛnɛ ciekdɛ.

²⁰ Kä min ci bo̱l maac kac nhial wi̱i̱ yi̱kä, cu jääk Kuɔth Nhial jiɛɛn kɛ rɛy bo̱lä maac min guic Ma-no-aa jɛ kɛnɛ ciekdɛ. Kä cukɛ wuɔ̱thkiɛn guɔ̱l piny.

²¹ Cu jääk Kuɔth Nhial cu bath waaŋ Ma-no-aa kɛnɛ ciekdɛ. Kä cu Ma-no-aa jɛ cu ŋa̱c ɛn ɣöö ɛ jääk Kuɔth Nhial.

²² Kä cu Ma-no-aa ciekdɛ ku jiök i̱, “Ɛ puc ban li̱w, kɛ ɣöö can Kuoth nɛn.”

²³ Duundɛ ɣöö cu ciekdɛ jɛ jiök i̱, “Duŋ mi lot Kuoth Nhial ni ɣöö bɛ kɔn näk, /cɛ muc bɛɛl kɛnɛ muc in waŋkɛ dëë nhɔk tetni kɔn, kiɛ /cɛ kɔn dëë nyuɔ̱th kɛn ti diaal ti̱ti̱ kä /cɛ kɔn dëë la̱t ruac ɛ mi.”

²⁴ Kä cu ciek dap kɛ dhɔl, kä cua ciötdɛ cɔl i̱ Cim-con. Kä cuɛ piith ɛn dho̱o̱l, kä cu Kuoth Nhial ɛ poth.

²⁵ Kä cu yiëë Kuɔth Nhial ɛ tok kɛ mi buumɛ dho̱o̱l mëë tëë guäth ëë ci Ma-ɣa-ne-daan pua̱t thi̱n, kam Dhɔra kɛnɛ Ɛc-tool.