Ruëëc 12 - RUAC KUƆTH IN RƐL RƆ

Yɛp-ta kɛnɛ ji̱ Ɛ-pa-rim

¹ Cu ji̱ Ɛ-pa-rim rɔ dol, kä cukɛ jiɛth kui̱c wäkɛ kä Dha-pon kä cua Yɛp-ta jiök i̱, “Ɛŋu curi jiɛth kui̱c ɔ wi̱i̱ nyiëëny kɛ ji̱ Am-on, kä /keni kɔ cɔl kɛɛl kɛ ji̱? Kɔn ba̱kɔ duelu cua̱th wi̱i̱du kɛ mac.”

² Kä cu Yɛp-ta kɛ loc i̱, “Ɣän kɔnɛ nɛɛkä ta̱kɔ ko̱o̱r mi di̱i̱t kɛ ji̱ Am-on. Ɛ cäŋ cä yɛ cɔl, /cia̱ dëë kään tetädiɛn.

³ Mëë ca ŋa̱c i̱ /cia̱ dëë kän, cua̱ tëkdä cu la̱th tetädä, cua̱ cu jiɛth kui̱c nyiëënyä kɛ ji̱ Am-on. Kä cu Kuoth Nhial kɛ cu ka̱mä. Kuɛ la ŋu bä yɛn kä ɣä mɔ walɛ bia ben nyiëëny kɛ ɣä mɔ?”

⁴ Ɛ jɛn cu Yɛp-ta ji̱ Gil-yad diaal mat kä cukɛ nyiëëny kɛ ji̱ Ɛ-pa-rim. Kä cuɛ ji̱ Ɛ-pa-rim joc, kɛ ɣöö cikɛ ji̱ Gil-yad, jiök i̱, “Kɛ yɛn tɛ̈ɛ̈m kä ji̱ Ɛ-pa-rim kɛnɛ ji̱ Ma-na-thɛ.”

⁵ Kä cu ji̱ Gil-yad thuk wäthni kiɛɛr Jɔr-dɛn dhɔ̱ŋ kä ji̱ Ɛ-pa-rim. Kä mɔ ci bar ji̱ Ɛ-pa-rim wee, “A ɣä jiathä kui̱c ɔ.” Bi ji̱ Gil-yad ɛ jiök i̱, “Ɛ ji̱n raan Ɛ-pa-rim?” Mi cɛ wee “Eey,”

⁶ ba jiök i̱, “Kä wëri Ci-bo-lɛth,” bɛ wee, “Thi-bo-lɛth,” kɛ ɣöö /cɛ jɛ luäŋ kɛ lär. Ɛn wa̱nɔ bikɛ jɛ cu ŋot thok waath kiɛɛr Jɔr-dɛn. Cua nɛy ti bathdɔɔri ti jiɛn ŋuaan wi̱cdɛ rɛw kä ji̱ Ɛ-pa-rim näk.

⁷ Cu Yɛp-ta I-thɛ-rɛl ruac kɛ run bäkɛl. Kä cuɛ cu li̱w, kä cua jɛ kony wi̱i̱dɛ kä Gil-yad.

Ib-dhan kɛnɛ Ee-lon kɛ Ab-don

⁸ Kɛ kɔrɛ cu Ib-dhan raan Beth-lɛ-ɣɛm I-thɛ-rɛl ruac.

⁹ Kä jɛn tëë kɛ dhɔɔl ti jiɛn diɔ̱k. Kɛ nyi̱er ti jiɛn diɔ̱k ti cɛ jak kä kuɛnkɛ ɛ nɛy ti /ci tɔ̱a̱ ji̱ maarädɛ kä cuɛ gaatkɛ kuën nyi̱er ti jiɛn diɔ̱k ti /ci maar kɛ jɛ. Cuɛ I-thɛ-rɛl ruac kɛ run bärɔw.

¹⁰ Cu Ib-dhan li̱w kä cua jɛ kony kä Beth-lɛ-ɣɛm.

¹¹ Kä kɛ kɔrɛ cu ruëc ni Ee-lon raan Dhɛ-bu-lun kä I-thɛ-rɛl. Cuɛ ruëc kɛ run wäl.

¹² Kä cu Ee-lon li̱w, kä cua jɛ kony kä A-ya-lon ro̱o̱l Dhɛ-bu-lun.

¹³ Kɛ kɔrɛ cu ruëc ni Ab-don gat Ɣi-lel raan Pi-ra-thon kä I-thɛ-rɛl.

¹⁴ Cuɛ tekɛ gaat ti jiɛn ŋuaan, kɛ gaat döödɛ ti jiɛn diɔ̱k, ti la kɔatkɛ muɔ̱li ti jiɛn da̱ŋ bärɔw. Kä cuɛ I-thɛ-rɛl ruac kɛ run bädäk.

¹⁵ Ɛ jɛn cu Ab-don li̱w, kä cua jɛ kony kä Pi-ra-thon ro̱o̱l ji̱ Ɛ-pa-rim, dhɔr päämni ji̱ Ä-ma-lek.