Ruëëc 11 - RUAC KUƆTH IN RƐL RƆ

Luäk Yip-ta kɛ ji̱ I-thɛ-rɛl

¹ Kä täämɛ Yɛp-ta raan ji̱ Gil-yad ɛ wääth ko̱o̱r mi di̱i̱t, duundɛ ɣöö ɛ gat ciek mi ler. Gua̱n ɛ Gil-yad.

² Kä Gil-yad ca da̱p gaat ɛ ciekdɛ, kä mëë ci gaat ciekdɛ di̱t, cukɛ Yɛp-ta tuk, kä cukɛ jɛ jiök i̱, “/Ci bi tekɛ kui̱c dhɔɔr gua̱a̱ra. Kɛ ɣöö ɛ ji̱n gat ciek mi ler.”

³ Cu Yɛp-ta rɔ bar kä gaat man, kä cuɛ wä ciɛŋ ni mun Tob. Cu nɛy ti thil luɔt rɔ ma̱t Yɛp-ta, ala ji̱ ja̱l kɛ̈ɛ̈l.

⁴ Kɛ kɔr gua̱th mi tɔt cu ji̱ Am-on ko̱r tɛr kɛ ji̱ I-thɛ-rɛl.

⁵ Mëë ci ji̱ Am-on ko̱r tɛr kɛ ji̱ I-thɛ-rɛl, cu di̱t Gil-yad Yɛp-ta wä nööŋ muun Tob.

⁶ Cukɛ Yɛp-ta jiök i̱, “Bër, bikɔ ben bo̱th, kä dënɛ cu wä nyiëëny kɛ ji̱ Am-on.”

⁷ Duundɛ ɣöö cu Yɛp-ta di̱t Gil-yad loc i̱, “/Ciɛ yɛn kɛn tëë lo̱kɛ ɣä, kä cia ɣä tuk dhɔr gua̱a̱r? Ɛŋu ku yɛn lɛ ben kä ɣä mɔ täämɛ min ta̱yɛ kɛ riɛk?”

⁸ Kä cu di̱t Gil-yad jɛ loc i̱, “Ɛ jɛn luny kɛ kɔ kä ji̱ mɔ täämɛ, ɛ ɣöö banɛ wä nyiëëny kɛ ji̱ Am-on, kä bia̱ bo̱o̱th ji̱ Gil-yad diaal.”

⁹ Cu Yɛp-ta di̱t Gil-yad loc i̱, “Mi bia ɣä luɔc cieŋ kɛ ɣöö bä wä nyiëëny kɛ ji̱ Am-on. Mi wä Kuoth Nhial kɛ wä ka̱m ɣä, ba̱a̱ bo̱o̱thdun.”

¹⁰ Kä cu di̱t Gil-yad Yɛp-ta jiök i̱, “Bi Kuoth Nhial a nëën kamdan. Ɛ puc ba̱kɔ la̱t ni min ci lar.”

¹¹ Ɛ jɛn cu Yɛp-ta wä kɛnɛ di̱t Gil-yad. Kä cua jak kä bo̱o̱th, kä cu Yɛp-ta ruac nhiam Kuɔth Nhial kä Midh-pa.

¹² Ɛ jɛn cu Yɛp-ta ruac jäk kä kuäär ji̱ Am-on wee i̱, “Ti̱i̱ ŋu kɛ ɣä, mɔ curi ɣä ma̱k kɛ ko̱r ɔ?”

¹³ Cu kuäär ji̱ Am-on Yɛp-ta loc i̱, “Ɛ ɣöö mëë bä ji̱ I-thɛ-rɛl kä I-jëp cikɛ mundä ka̱n, ni kä Ar-non kɛnɛ Ya-bɔk a wä ni kä Jɔr-dɛn. Ɛn täämɛ luc ni jɛ ɣä malä.”

¹⁴ Kä cu Yɛp-ta ruac nyɔk kɛ jäk kä Am-on,

¹⁵ jio̱k ɛ jɛ i̱, “Nɛmɛ ɛ jɛn min laar Yɛp-ta jɛ. Ji̱ I-thɛ-rɛl thilɛ mun ji̱ Mo-ab kiɛ mun ji̱ Am-on mi ca ka̱n.

¹⁶ Mëë bä ji̱ I-thɛ-rɛl kä I-jëp, cukɛ wä nikɛ därdɔaar nikɛ Bar gutdä, cukɛ wä kä Ka-dɛc.

¹⁷ Ɛn wa̱nɔ cu ji̱ I-thɛ-rɛl ruac jäk kä kuäär Ɛ-dɔm jiök ɛ jɛ i̱, ‘Nho̱k ni kɔ ɣöö wa̱kɔ kɛ mundu.’ /Ken kuäär Ɛ-dɔm ɛ liŋ. Kä cukɛ kuäär Mo-ab jäk kä naath bä. Kä cuɛ ce̱tkɛ mi ciɛ duɔ̱ɔ̱r. Inɔ cu ji̱ I-thɛ-rɛl te kä Ka-dɛc.

¹⁸ Cu wä ni kɛn kɛ därdɔaar wi̱i̱n kɛn mun Ɛ-dɔm kɛnɛ mun Mo-ab, amäni mëë cikɛ cop kui̱ känyä ca̱ŋ muɔ̱ɔ̱n ji̱ Mo-ab, kä cukɛ pua̱t kui̱ Ar-non. Kä /ken kɛ wä kui̱ muɔ̱ɔ̱n Mo-ab, kɛ ɣöö Ar-non tëë këth muɔ̱ɔ̱n Mo-ab.

¹⁹ Kä cu ji̱ I-thɛ-rɛl ruac lɛni jäk kä Thi-yon kuäär ji̱ Ɛ-mor kuäär Ɛc-bon. Cua jiök i̱, ‘Jak ni kɔ kä wä kɛ mundu, wakɔ wi̱i̱da?’

²⁰ Duundɛ ɣöö /ken Thi-yon ji̱ I-thɛ-rɛl ŋäth i̱ dëë kɛ rët kɛ wecdɛ. Cuɛ ma̱a̱t ni nɛɛkɛ diaal guäth kɛl, kä cukɛ wä pua̱t kä Yaadh, cu nyiëëny ni kɛn kɛ ji̱ I-thɛ-rɛl.

²¹ Kä cu Kuoth Nhial Kuoth ji̱ I-thɛ-rɛl Thi-yon kɛnɛ nɛɛkɛ diaal ka̱m ji̱ I-thɛ-rɛl, cukɛ kɛ joc. Cu ji̱ I-thɛ-rɛl mun ëë cieŋ ji̱ Ɛ-mor thi̱n ciɛŋ kɛɛliw.

²² Cukɛ wi̱i̱ ji̱ Ɛ-mor diaal ciɛŋ, känɛ jɛ ni kä Ar-non a wä kä Ya-bɔk, a lɛnɛ ka̱n ni därdɔaar a wä ni kä Jɔr-dɛn.

²³ Inɔ cu Kuoth Nhial Kuoth ji̱ I-thɛ-rɛl, wec ji̱ Ɛ-mor ka̱n, kä cuɛ jɛ ka̱m nɛɛkɛ ni ji̱ I-thɛ-rɛl. Ji̱n go̱o̱ri ɣöö bi wi̱i̱kiɛn ka̱n?

²⁴ Kä ci bi ciɛŋ ni wi̱i̱ tin ci Kɛ-moc kuothdu kɛ ka̱m ji̱? Kä gua̱th diaal tin ci Kuoth Nhial Kuothda kɛ ka̱m nɛy ba̱kɔ kɛ ciɛŋ.

²⁵ Ɛn täämɛ diwi jɛ ɛn ɣöö gɔaa ni ji̱n kä Ba-lak gat Dhi-por, kuäär Mo-ab? Mëë /ken cuɔ̱ŋ nhiam ji̱ I-thɛ-rɛl, kä /ken nyiëëny kɛ ji̱ I-thɛ-rɛl?

²⁶ Cu ji̱ I-thɛ-rɛl Ɛc-bon kɛnɛ wi̱i̱kɛ ciɛŋ, kɛ Ä-ro-er kɛnɛ wi̱i̱kɛ kɛ wi̱i̱ diaal tëë te wi̱i̱ tɔ̱ɔ̱rä Ar-non, cukɛ cieŋ thi̱n kɛ run ti kur diɔ̱k. Ɛŋu /keni kɛ ka̱n ɔ niɛ nëë?

²⁷ Kɛ ɣöö ɣän thilɛ duer mi cä lät kä ji̱, ɛ ji̱n ci ɣä lät kä duer ɔ kɛ käpdu kɛ ɣä ko̱r. Ɛn ni̱ni ti̱ti̱ bi Kuoth Nhial, in luk kam ji̱ I-thɛ-rɛl kɛnɛ ji̱ Am-on luk ŋot.”

²⁸ Duundɛ ɣöö /ken kuäär ji̱ Am-on ruac Yɛp-ta min cɛ jäk kä jɛ liŋ.

²⁹ Ɛ jɛn cu yiëë Kuɔth Nhial ben kä Yɛp-ta, cuɛ wä muun Gil-yad kɛnɛ mun Ma-na-thɛ, kä cuɛ wä kä Midh-pa Gil-yad. Kä Midh-pa cuɛ wä nyiëëny kɛ ji̱ Am-on.

³⁰ Kä cu Yɛp-ta rɔ yac Kuoth Nhial, wëë i̱, “Mi wi̱i̱ ji̱ Am-on wä ka̱m ɣä,

³¹ ɛn mɔ bi ben raar i̱ bi ɣä ben lor thok dhɔaarä mɔ, mi wa̱a̱ wä luny jɔk jucä ji̱ Am-on, ba duŋ Kuɔth Nhial, bä thöp ala muc mi waŋkɛ.”

³² Cu Yɛp-ta wä nyiëëny kɛ ji̱ Am-on. Kä cu Kuoth Nhial kɛ ka̱m jɛ.

³³ Cuɛ kɛ joc ni wec Ä-ro-er min te thieekä wec Mi-nith, wi̱i̱ ti jiɛn rɛw, a räth ni kä A-bel-kɛr-amin, cu ji̱ I-thɛ-rɛl kɛ näk ɛlɔ̱ŋ, kä cua kɛ joc ɛ ji̱ I-thɛ-rɛl.

Nya Yɛp-ta

³⁴ Ɛ jɛn cu Yɛp-ta ben dhɔɔrɛ kä Midh-pa. Kä nɛnɛ, cu nyaadɛ ben raar lorɛ jɛ puɔ̱tdɛ thom kä duthɛ. Ɛ jɛn gat kɛl kä rɔa. Ɛ ni jɛn kä rɔa thilɛ nyal kiɛ dho̱o̱l mi dɔ̱ŋ.

³⁵ Kä mëë cɛ jɛ nɛn, cuɛ bieynikɛ rɛ̈t, kä cuɛ wee, “Wa, nyaadä! Mi ci lɔcdä ku jak kä jiɛth inɛ mi, a ci kua̱ niɛ min jiɛth lɔcdä. Min /cä dëë lɛ nyɔk, kɛ ɣöö cä ya̱c Kuoth Nhial kɛ thokdä.”

³⁶ Kä cu nyaadɛ jɛ jiök i̱, “Gua̱di̱n, mi ci ruac kɛ Kuoth Nhial, lät ni ɣä kä min ci ben raar thokdu, kä täämɛ ci Kuoth Nhial ji̱ ka̱m ji̱ tɛ̈ru, ni ji̱ Am-on.”

³⁷ Kä cuɛ gua̱n jiök i̱, “Lät ni jɛ kä ɣä ɛn nɔmɔ. Päli ni ɣä päth rɛw, bä wä wi̱el wuɔ̱thni päämni kɛ kɛ, kä bä wä pa̱r kɛ ɣöö bä li̱w ɛ /ka̱n ɣä ni kuɛn kɔnɛ nyi̱er tin mäthnikä.”

³⁸ Kä cu gua̱n wee, “Wër.” Kä cuɛ jɛ jak kä wä kɛ päth rɛw. Cuɛ wä kɛnɛ nyi̱er tin mäthnikɛ, wa ɣöö bɛ li̱w a /ka̱n jɛ ni kuɛn par wuɔ̱thni päämni.

³⁹ Kɛ kɔr päthni da̱ŋ rɛw cuɛ luny kä gua̱n, kä cuɛ jɛ la̱t nikɛ duɔ̱ɔ̱p ëë cɛ yac i̱ bɛ lät ni jɛ. Kä /ken ɛ me̱t te kɛɛl kɛ wut. Kä cuɛ cua̱ ciaaŋ kä ji̱ I-thɛ-rɛl.

⁴⁰ Ɛn ɣöö la nyi̱er ji̱ I-thɛ-rɛl a wä raar kɛ ni̱n ŋuaan kɛ ruɔ̱n, wa nya Yɛp-ta raan Gil-yad par ɛ kɛn.