Ruëëc 10 - RUAC KUƆTH IN RƐL RƆ

Ruec Tolä kɛnɛ Ya-ir

¹ Kɛ kɔr Ä-bi-mɛ-lɛk, cu Tolä gat pua gat Do-day raan Yi-tha-kar rɔ jiɛc ala luääk ji̱ I-thɛ-rɛl. Kä cuɛ ciɛŋ ni Ca-mir wi̱i̱ni päämni Ɛ-pa-rim.

² Kä cuɛ ruëc kä I-thɛ-rɛl kɛ run ti jiɛn da̱ŋ rɛw wi̱cdɛ diɔ̱k. Kä cuɛ cu li̱w, kä cua kony kä Ca-mir.

³ Kɛ kɔrɛ cu ruëc ni Ya-ir raan Gil-yad cuɛ I-thɛ-rɛl ruac kɛ run ti jiɛn da̱ŋ rɛw wi̱cdɛ rɛw.

⁴ Cuɛ tekɛ gaat ti jiɛn diɔ̱k ti kɔat kɛ muɔ̱li ti jiɛn diɔ̱k. Tekɛ kɛ wi̱i̱ ti jiɛn diɔ̱k ti cɔal kɛ Ɣa-woth-ya-ir amäni walɛ, ti te ro̱o̱l Gil-yad.

⁵ Cu Ya-ir li̱w, kä cua jɛ kony kä Ka-mon.

Ciaŋ jiääk ji̱ Ka-mon kɛ ji̱ I-thɛ-rɛl

⁶ Kä cu ji̱ I-thɛ-rɛl jiäk lɛni nyɔk kɛ lätni nhiam Kuɔth Nhial, cukɛ pal ni kuoth Baal kɛnɛ kuoth Ac-tar-te, kuth ji̱ Thi-ri-ya, kɛnɛ ji̱ Dhi-don, kɛ kuth ji̱ Mo-ab, kuth ji̱ Am-on kɛnɛ kuth ji̱ Pi-li-thɛt. Ca Kuoth Nhial pa̱l ruëëc, kä /ca pal ɛ kɛn.

⁷ Inɔ cu Kuoth Nhial kɛ̈c ɛlɔ̱ŋ kɛ ji̱ I-thɛ-rɛl, kä cuɛ kɛ la̱th tetni ji̱ Pi-li-thɛt kui̱c ɛmɛ kɛnɛ ji̱ Am-on kui̱c in dɔ̱ŋ.

⁸ Kä cukɛ ji̱ I-thɛ-rɛl däk ɛn runä nɔmɔ. Kɛ run wäl bädäk cukɛ ji̱ I-thɛ-rɛl diaal tin te kui̱ kiɛɛr Jɔr-dɛn muun ji̱ Ɛ-mor min te kä Gil-yad yak ɛlɔ̱ŋ.

⁹ Kä cu ji̱ Am-on jiɛth kui̱ Jɔr-dɛn wäkɛ nyiëëny kɛ ji̱ Juda kɛnɛ ji̱ Ben-ya-min kɛ ji̱ Ɛ-pa-rim. Inɔ cu I-thɛ-rɛl te yaakä mi bɛc ɛlɔ̱ŋ.

¹⁰ Kä cu ji̱ I-thɛ-rɛl wiee nhiam Kuɔth Nhial wä kɛ i̱, “Ca̱kɔ ji̱ dui̱rikä, kɛ ɣöö ca̱kɔ ji̱ päl, ji̱n Kuothda, ca̱kɔ wä pal ni kuoth Baal.”

¹¹ Kä cu Kuoth Nhial ji̱ I-thɛ-rɛl jiök i̱, “/Ciɛ ɣän ɛ nëë kään yɛ kä ji̱ I-jëp, kɛnɛ ji̱ Ɛ-mor, kɛ ji̱ Am-on, kɛ ji̱ Pi-li-thɛt?

¹² Amäni ji̱ Dhi-don, kɛnɛ ji̱ Ä-ma-lek, kɛ ji̱ Ma-ɣon. Kä cua yɛ yak. Kä /cuarɛ wiee nhiamdä, kä cua̱ yɛ kän tetnikiɛn.

¹³ /Cuarɛ ŋot päl yɛn ɣä, wiaa pal ni kuth ti kɔ̱ŋ. Inɔ ɣän /cä yɛ bi nyɔk kɛ ka̱n.

¹⁴ Wiaa rötɛ nhiam kuthni tin cia mɛk. A yɛ ka̱nkɛ kä yaakdun.”

¹⁵ Kä cu ji̱ I-thɛ-rɛl wee, “Ca̱kɔ duer, lätni kɔ kä mɔ guici mɔ. Ku kɔ lɛ luäk ɛn walɛ läŋ nɛy ni ji̱.”

¹⁶ Inɔ cukɛ kuth woc rɛydiɛn kä cukɛ pal ni Kuoth Nhial. Kä cuɛ bɛ̈c kä Kuoth ɛlɔ̱ŋ ɛn yaak ji̱ I-thɛ-rɛl.

¹⁷ Cu ji̱ Am-on rɛmdiɛn rialikä, kä cukɛ ben pua̱t kä Gil-yad. Kä cu ji̱ I-thɛ-rɛl rɔ dol, kä cukɛ ben kä Midh-pa.

¹⁸ Kä cu bööth ji̱ I-thɛ-rɛl ruac kamnikiɛn kä Gil-yad wä kɛ i̱, “Ɛŋa mi bi ko̱r tok kɛ ji̱ Am-on? Ɛn ram ɛmɔ ba kuäär ji̱ Gil-yad diaal.”