Ruëëc 1 - RUAC KUƆTH IN RƐL RƆ

Käp thuɔk duëël Juda kɛnɛ thok duëël Cim-on kɛ Ä-do-ni-bɛ-dhɛk

¹ Kɛ kɔr li̱eth Jɔ-cua cu ji̱ I-thɛ-rɛl Kuoth Nhial thiec i̱, “Ɛŋa mi bi wä nhiam ɔ kɛ nhiam kä ji̱ Kɛ-naan, mi bi ko̱r wä tɛr kɛ kui̱da?”

² Cu Kuoth Nhial kɛ jiök i̱, “Bi thok duëël Juda wä. Nɛn ɛ jɛ, thok duëël ɣän cä mun ɛmɔ ka̱m kɛ.”

³ Cu thuk duëël Juda dämani ni thok duëël Cim-on jiök i̱, “Bia wanɛ wi̱c in ca ka̱m kɔ, banɛ wä kɛɛl bä wi̱c in ca ka̱m yɛ.” Inɔ cu ji̱ Cim-on wä kɛɛl kɛ kɛ.

⁴ Ɛ jɛn cu thok duëël Juda wä. Kä cu Kuoth Nhial kɛ ka̱m juc ji̱ Kɛ-naan kɛnɛ ji̱ Pɛ-rii-dhi. Cukɛ bathdɔɔri wäl joc kä Bɛ-dhɛk.

⁵ Cukɛ ben kä Ä-do-ni-bɛ-dhɛk kä Bɛ-dhɛk, kä cukɛ ben nyiëëny kɛ jɛ, kä cukɛ ji̱ Kɛ-naan kɛnɛ ji̱ Pɛ-rii-dhi joc.

⁶ Cu Ä-do-ni-bɛ-dhɛk rɔ bar, duundɛ ɣöö cua guɔ̱ɔ̱r amäni mëë ca cop, cua yiat tetädɛ min di̱i̱t kɛnɛ yiat cio̱kädɛ min di̱i̱t ŋot.

⁷ Kä cuɛ wee, “Kua̱r ti jiɛn bärɔw ti cä yiɛt tetnikiɛn kɛnɛ yiɛt ciöknikiɛn tin di̱t ŋuɔ̱k, la kɛn duɔɔth a kueeny piny gua̱a̱th mi̱ethdä. Ce̱tnikɛ mëë la la̱tdä, ɛ jɛn ci Kuoth ɛ luɔ̱cä mɔ.” Cukɛ jɛ nööŋ kä Jɛ-ru-tha-lɛm, kä cuɛ ben li̱w thi̱n.

Käp thuɔk duëël ji̱ Juda kɛ Jɛ-ru-tha-lɛm kɛnɛ Ɣɛb-ron

⁸ Cu ji̱ Juda nyiëëny kɛ ji̱ Jɛ-ru-tha-lɛm, kä cukɛ Jɛ-ru-tha-lɛm ka̱n, cukɛ ji̱ kɛ näk kä cua wec cua̱th kɛ mac.

⁹ Kɛ kɔrɛ cu ji̱ Juda wä nyiëëny kɛ ji̱ Kɛ-naan tin cieŋ päämni kä Nɛ-gɛb, kɛnɛ tin cieŋ täpä.

¹⁰ Kä cukɛ wä nyiëëny kɛ ji̱ Kɛ-naan ti ciaŋkɛ ni Ɣɛb-ron (ɛn ciöt Ɣɛb-ron ni wen cɔalɛ Kir-yath-ar-bä). Kä cukɛ ji̱ Ce-cay kɛnɛ ji̱ Ä-ɣi-man kɛ ji̱ Tɛ̈l-may joc.

Käp Ɔ-thi-nel kɛ Dɛ-bir

¹¹ Ɛn wi̱ni cukɛ wä muun ji̱ Dɛ-bir. Ɛn ciöt ni Dɛ-bir ni wal ɛ Kir-yath-the-pɛr.

¹² Kä cu Ka-leb wee, “Ram ɔ bi Kir-yath-the-pɛr ma̱k ɔ kä bɛ jɛ ka̱n, bä jɛ ka̱m nyaadä ni Ak-thaa ala ciekdɛ.”

¹³ Cu Ɔ-thi-nel gat Kɛ-nadh, gat däman Ka-leb in tɔt wec ɛ mɔ ka̱n. Kä cu Ka-leb ɛ ka̱m nyaadɛ ni Ak-thaa ala ciekdɛ.

¹⁴ Kä mëë ci Ak-thaa ben cieŋ cuɛ cɔwdɛ kok i̱ thiec gua̱a̱r kɛ kak. Kä cuɛ käny piny jɔɔk muɔ̱lɛ, kä cu Ka-leb ɛ thiec i̱, “Ɛŋu nhɔki mɔ?”

¹⁵ Cuɛ jɛ jiök i̱, “Mocä kɛ muc. Min ci ɣä ka̱m mun Nɛ-gɛb, mocä kɛ waŋ pi̱i̱ni bä.” Cu Ka-leb ɛ ka̱m waŋ pi̱i̱ni min te dho̱nyä kɛnɛ waŋ pi̱i̱ni min te täpä.

Käp ji̱ Juda Kɛnɛ ji̱ Ben-ya-min kɛ wi̱i̱

¹⁶ Ɛ jɛn cu kuay gua̱nthu Muthɛ ni Kɛɛn, wä kɛɛl kɛ ji̱ Juda jiɛnkɛ kä Jɛ-ri-ko mun nööri wäkɛ därdɔaar Juda kä Nɛ-gɛb thie̱e̱kä Ä-rad. Cukɛ wä cieŋ ɛn wi̱ni.

¹⁷ Cu ji̱ Juda wä kɛɛl kɛ dämani ni ji̱ Cim-on, kä cukɛ ji̱ Kɛ-naan joc tin cieŋ kä Dhɛ-path, kä cukɛ jɛ da̱k ni piny. Ɛn wec cɔal ciötdɛ i̱ Ɣɔr-ma.

¹⁸ Cu ji̱ Juda Gadha ka̱n bä nikɛ wi̱i̱kɛ kɛɛl, kɛ Ac-kɛ-lon nikɛ wi̱i̱kɛ kɛnɛ Ɛk-ron kɛ wi̱i̱kɛ.

¹⁹ Ɛn wa̱nɔ te Kuoth Nhial kɛɛl kɛ ji̱ Juda, kä cukɛ wi̱i̱ päämni käp, duundɛ ɣöö /kenkɛ wi̱i̱ tin te mädä luäŋ kɛ joc raar, kɛ ɣöö täkɛ thurbiɛɛli ko̱o̱r.

²⁰ Kä Ɣɛb-ron ca ka̱m Ka-leb, ce̱tnikɛ ruac Muthɛ. Kä cuɛ kuay Ä-nak da̱ŋ diɔ̱k juɔc raar thi̱n.

²¹ Kä /ken ji̱ Ben-ya-min ji̱ Yɛ-buth tin cieŋ kä Kɛ-naan juɔc raar. Inɔ Cu ji̱ Yɛ-buth cu cieŋ kä Kɛ-naan kɛɛl kɛ ji̱ Ben-ya-min amäni walɛ.

Käp Ɛ-pa-rim kɛnɛ Ma-na-thɛ kɛ Beth-ɛl

²² Cu ji̱ Ɛ-pa-rim kɛnɛ ji̱ Ma-na-thɛ wä nyiëëny kɛ ji̱ wec Beth-ɛl. Kä te Kuoth Nhial kɛɛl kɛ kɛ.

²³ Cu ji̱ Ɛ-pa-rim kɛnɛ ji̱ Ma-na-thɛ li̱eem jäk kä Beth-ɛl. (Ciöt wec ɛmɔ ni wal cɔalɛ Luudh.)

²⁴ Cu li̱eem raan nɛn bëë wi̱c, cukɛ jɛ jiök i̱, “Nyuth ni kɔ duɔ̱ɔ̱p wec, bakɔ ji̱ la̱t agɔaa.”

²⁵ Kä cuɛ kɛ nyuɔ̱th duɔ̱p wec. Kä cukɛ ji̱ wec diaal näk, duundɛ ɣöö cukɛ wut ɛmɔ pa̱l wä kɛnɛ ji̱ dhɔaarɛ diaal.

²⁶ Cuɛ wä muun ji̱ ɣɛ̈th kä cu kɛ rɛk la̱t, mi cua ciötdɛ cɔl i̱ Luudh. Cuɛ cua̱ ciötdɛ amäni walɛ.

Nɛy tëë /ka̱n juɔc raar ɛ ji̱ I-thɛ-rɛl

²⁷ /Ken ji̱ Ma-na-thɛ nɛy tin cieŋ kä Beth-can kɛnɛ wi̱i̱kɛ, kɛ Ta-nak kɛ wi̱i̱kɛ, kɛ Dor kɛ wi̱i̱kɛ, kɛnɛ Yib-lɛ-am kɛ wi̱i̱kɛ, kɛ Mɛ-gi-do kɛ wi̱i̱kɛ. Kɛn wi̱i̱ tɔ̱tɔ̱ cu ji̱ Kɛ-naan ŋot kɛ ciaŋ thi̱n.

²⁸ Mëë ci ji̱ I-thɛ-rɛl buɔ̱m, cu kɛ ji̱ Kɛ-naan kuɔ̱k ɣöö bakɛ lät ikä, duundɛ ɣöö /ka̱n kɛ juɔc raar kɛn diaal.

²⁹ Kä /ken ji̱ Ɛ-pa-rim ji̱ Kɛ-naan tin cieŋ kä Gɛ-dhɛr juɔc raar. Cieŋ kɛ thi̱n kɛɛl kɛ kɛ.

Käp wi̱i̱ni ji̱ Gɛ̈-lɛ-li

³⁰ /Ken ji̱ Dhɛ-bu-lun Ji̱ Kith-ron kɛnɛ ji̱ Naa-lol juɔc raar rɛy wec. Cu ji̱ Kɛ-naan cieŋ rɛydiɛn, kä cukɛ kɛ jak kä la̱a̱tkiɛn.

³¹ Kä /ken ji̱ A-cɛr ji̱ Ak-ko kɛnɛ ji̱ Dhi-don, kɛ ji̱ A̱-lab, kɛnɛ ji̱ Ak-dhib, kɛ ji̱ Ä-pik, kɛ ji̱ Ɣɛl-ba, kɛ ji̱ Rɛ-ɣob juɔc raar.

³² Inɔ cu ji̱ A-cɛr cieŋ rɛy ji̱ Kɛ-naan tin ciaŋkɛ wec. Kɛ ɣöö /ken kɛn kɛ juɔc raar.

³³ Kä /ken ji̱ Nap-ta-li ji̱ Beth-cɛ-mɛc kɛnɛ ji̱ Beth-ä-nath juɔc raar, cu cieŋ nikɛn rɛy ji̱ Kɛ-naan tin ciaŋkɛ wec. Kä cukɛ kɛ kuɔ̱k la̱t kɛ kui̱diɛn.

³⁴ Kä cu ji̱ Ɛ-mor ji̱ Daan kuɔ̱k wi̱i̱ tin te päämni, pën kɛn kɛ ben wi̱i̱ni tin te lɛɛrä.

³⁵ Cu ji̱ Ɛ-mor ŋot kɛ ciaaŋ kä A-ya-lon kɛnɛ Pääm Ɣɛ-rɛth, kɛ Cɛ̈ɛ̈l-bim, ɛ ni ɣöö cu ji̱ Ɛ-pa-rim kɛnɛ Ma-na-thɛ kɛ jak kä kuaanykiɛn ti la̱t kɛ kɛ ikä.

³⁶ Cu key ji̱ Ɛ-mor a Ak-ra-bim amäni Thɛlɛ̈ a wä nhiam.