Ruac Pɛli 9 - RUAC KUƆTH IN RƐL RƆ

Pɛl kɛnɛ kui̱c ŋɔaani

¹ Pɛl ce̱tkɛ kɛ ciek mi ci duelɛ la̱t, kä cɛ jɛ lät kä thi̱eer da̱ŋ bärɔw.

² Kä cuɛ yaaŋdɛ näk, kä cuɛ kɔaŋdɛ dhim, kä cuɛ mi̱ethdɛ rialikä.

³ Kä cuɛ nyier la̱tdɛ ja̱k, kɛ ɣöö bikɛ wä ciöt gua̱thni tin loc rɛy wec.

⁴ “A nɛy tin kueckɛ ŋɔak bëë wanɛ mi!” Cuɛ la̱t nɛy tin dɔa̱a̱r i̱,

⁵ “Bia camɛ mi̱ethdä, kä bia mathɛ kɔaŋ in cä dhim.

⁶ Pa̱lɛ dɔ̱ɔ̱run kɛ ɣöö bia tëk, bia ja̱lɛ ni duɔ̱ɔ̱p tiitdä lɔaac.”

⁷ Ram lueek dɔ̱a̱r, kuethɛ ni rɔ, kä ram lueek ram mi jiäk mocɛ ni rɔ̱ buɔ̱t.

⁸ /Cu dɔ̱a̱r luek, bɛ ji̱ lo̱k. Luek ni ram mi te pɛl, bɛ ji̱ nhɔk.

⁹ Lätni ram mi tekɛ pɛl ruac, bɛ ŋot kɛ ŋäc ŋɔaani. Ŋi̱i̱cni gua̱n cuŋni, bɛ rep ni pɛlɛ.

¹⁰ Kɛ ɣöö luth Kuɔth Nhial, ɛ jɛn tuk ŋäcä ŋɔaani. Kä ŋäc Raam in rɛl gɔɔydɛ rɔ, ɛ jɛn tiit lɔaac.

¹¹ Kä pɛl bɛ ni̱n teekädu rep ɛ ŋuan.

¹² Kä mi pɛli, pɛlu bɛ ji̱ rep. Kä mi ɛ ji̱n dɔ̱a̱r, dɔ̱ɔ̱ru bɛ jek ni ji̱.

¹³ Kä dɔ̱ɔ̱r ce̱tdɛ kɛ ciek mi gua̱n rɔlä kä thilɛ mi ŋäcɛ, kä kui̱cɛ pöc.

¹⁴ La nyuurɛ thok duëëlɛ, wi̱i̱ kɔam guäth in loc rɛy wec,

¹⁵ cɔlɛ nɛy tin jäl kɛ jɛn gua̱a̱th ɛ mɔ, tin jäl ni dupdiɛn i̱,

¹⁶ “A nɛy diaal tin kueckɛ ŋɔak bëë wa̱nɛ mi!” Cuɛ la̱t nɛy tin dɔa̱a̱r i̱,

¹⁷ “Pi̱ kuël comkɛ, kä mi̱eth kua̱n kɛ tɛ̱̈ɛ̱̈ gɔaaɛ.”

¹⁸ Duundɛ ɣöö /ci kɛn ɛ ŋäc i̱ tëë kɛ lia̱a̱, kɛ ɣöö ja̱a̱l ciëk ɛmɔ, kɛn a ni puul li̱eth.