Ruac Pɛli 7 - RUAC KUƆTH IN RƐL RƆ

Pɛl gaŋɛ dhöm

¹ Gatdä tit rieetkä, kä käp ruaacnikä kɛ ji̱ kɛɛl.

² Tit luëëkä kɛ ɣöö bi tëk, kä tit ŋi̱i̱cdä ce̱tnikɛ ti̱ey waŋdu.

³ Yiɛnikɛ yiɛtädu kä gɔ̱rikɛ rɛy lɔaacdu.

⁴ Kä jio̱kni pɛl i̱, “Ɛ ji̱n nyimaar,” kä cɔl ŋäc ŋɔaani i̱ määth lɔaacdä.

⁵ Ba ji̱ gaŋ kä ciek mi dho̱o̱m, kɛnɛ laatkɛ ti gɔw.

⁶ Kɛ cäŋ kɛl, ɣän cä guic kɛ wernyin duëëlä.

⁷ Cua̱ guic rɛy nɛɛni ti thil pɛl caarä rɛy ŋuɛ̈tni, cua̱ ŋuɛ̈t mi kui̱c ŋɔak nɛn.

⁸ Jɛn wëë kɛ gëk ciëŋ ciëk mi tëë wa̱nɔ, wëë lotdɛ ni ciëŋdɛ,

⁹ kɛ thiaŋ, kɛ gua̱a̱th in kony kɛ cäŋ mi̱rä ɣɔaa.

¹⁰ Kä cu ciek ben raar loorɛ jɛ, ciɛŋɛ bi̱i̱ mi ce̱tkɛ bi̱i̱ leerä kä lätdɛ ca̱a̱p.

¹¹ Kä jɛn kui̱cɛ pöc kä rɔalɛ, kä kui̱c tharɛ nyuur cieŋ.

¹² La cupɛ ni ɛn täämɛ rɛy rɛ̈ɛ̈k, kiɛ duɔ̱ɔ̱p, pekdɛ gua̱a̱th mi pääthɛ naath thi̱n.

¹³ Kä cuɛ ŋuɛ̈t käp, kä cuɛ cim, a di̱lɛ waŋdɛ guec, cuɛ jiök i̱,

¹⁴ “Ta̱a̱ kɛ muc malä cieŋ, ɛ cäŋ in thuk kɛ ya̱cdä ɛn walɛ.

¹⁵ Ɛn täämɛ ba̱a̱ ben lor ni ji̱, ta̱a̱ go̱rkädu, kä cä ji̱ jek.

¹⁶ Ɣän cä dhaŋdä pap kɛ bi̱i̱ biɛɛli, mi nööŋä kä I-jëp.

¹⁷ Kä cä kith kɛ wal tin kɔap kɔaap.

¹⁸ Bër wanɛ, ban wä muɔɔŋ amäni ruun kɛ runwaŋ. Wanɛ lɔcdan thuk kɛ nhök.

¹⁹ Kɛ ɣöö ci cɔwdä wä ja̱l guäth mi nɔ̱a̱n nɔ̱a̱n, jɛn /cɛ te cieŋ.

²⁰ Cɛ yio̱w naŋ nikɛ ki̱th, bɛ luny jɔk nikɛ kɔr path.”

²¹ Kä cuɛ ŋuɛ̈t pɛl kɛ rieet. Cuɛ jɛ kok kɛ laat ti gɔw.

²² Kä cuɛ jɛ guɔ̱ɔ̱r ni kä kɛɛl, ce̱tnikɛ yaŋ mi wa näk kɛnɛ kɛ̈w mi ci pɛn ɣɔ̱mä.

²³ Kä ci bäär cuenydɛ wuth. Kä cuɛ ce̱tkɛ dit mi kɔɔŋ dhuur, kä kui̱cɛ jɛ i̱ bɛ näk ni jɛ.

²⁴ Kä täämɛ gaatkä liɛŋɛ ɣä, kä tiɛtdɛ ruacdä.

²⁵ Kä /cuarɛ lo̱ckun käm jɛ kä /cuarɛ dupkɛ guur.

²⁶ Kä jɛn cɛ nɛy ti ŋuan näk, nɛy ti /ca dee luäŋ kɛ kuën.

²⁷ Dhɔrɛ ɛ duɔ̱ɔ̱p mi naŋ naath jɔɔkni, naŋɛ naath ni kɔ̱k.