Ruac Pɛli 6 - RUAC KUƆTH IN RƐL RƆ

Luek kɛ kui̱c ŋɔaani

¹ Gatdä mi ci rɔ jak kä gääŋ gua̱n thieekädu, kä gaŋi ram mi juɔ̱r,

² kä bi pɛn kä min ci lat ba ji̱ käp ɛ ruacdu min ci lat.

³ Kɛ kui̱c ɛmɔ gatdä lätni nɛmɛ kɛ ɣöö bi rɔ kän, kɛ ɣöö ci pɛn tetdä gua̱n thieekädu, wër kä jɛ kɛ pɛ̈th, läŋɛ kɛ ɣöö bɛ ji̱ lony.

⁴ Kä /cu rɔ nho̱k ni̱en, kä /cu waŋdu duar.

⁵ Kän rɔ ce̱tkɛ min la bar kɛ̈w rɔ kä ram mi kääk, kɛnɛ dit mi bar rɔ kɛ ram mi kääk.

⁶ Kä ji̱n lö duaal wër kä ŋiɛc, kä guic duɔ̱p tin tëk kɛ kɛ.

⁷ Kä thilɛ kɛ bo̱o̱th, kiɛ rueec kiɛ kuäär,

⁸ la kɛn mi̱ethdiɛn a rialikä nikɛ mäy, kä dol kɛn ɛ nikɛ gua̱a̱th ŋër.

⁹ Ɛ bi ku te catdä amäni nɛy lö duaal? Bi rɔ jiɛc i̱ nɛy ni̱n?

¹⁰ Kä cuɛ wee i̱, “A yuɔ̱thä ti tɔt kɛ ni̱en, a muɔɔrä waŋdä ɛ määth a lɔ̱a̱ŋä catdä kä mi tɔt.”

¹¹ Kä min tëë ni̱n bi can ben, kä jɛ ce̱tnikɛ kueel mi tekɛ mac.

¹² La ram mi thil luɔt kä gua̱n dueeri, a jäl latdɛ ka̱a̱cni.

¹³ La duänyɛ kɛ waŋdɛ, kä lätdɛ nyuuthni, kɛ cio̱o̱kdɛ, kä ruacɛ kɛ yiɛtkɛ.

¹⁴ Kä cääpɛ ti jiäk kɛ mɛ̈ɛ̈t lɔaac, kä latdɛ nyin däkä ni ciaŋ.

¹⁵ Kɛ kui̱c ɛmɔ bi da̱k ɛ penikä a /kui̱cɛ jɛ. Bɛ da̱k kɛ gua̱a̱th mi tɔt mi cɛ rɔ bi nyɔk kɛ jiëc.

¹⁶ Tëë kɛ ŋɔak da̱ŋ bäkɛl ti lo̱k Kuoth Nhial kɛ, kɛ bärɔw ti jiäk kɛ jɛ.

¹⁷ Wäŋ liakä, kɛ lɛp kacä, kɛ tet ti na̱kɛ ram mi kui̱c ŋu,

¹⁸ kɛ lɔc mi cäp ti jiäk, kɛ ciök ti pɛ̈th kɛ lätni kä mi jiääk,

¹⁹ kɛ neen mi lat ni ka̱a̱cni, kɛ ram mi lat nyin däkä kamni nɛɛni ti la mäth.

Luek kɛ kui̱ dhöm

²⁰ Gatdä tit ruaacni guur, kä /cu ŋi̱i̱c muɔɔr päl ruëëc.

²¹ Käpkɛ kɛ lɔcdu ni ciaŋ, kä yiɛnikɛ ŋuääkdu.

²² Mi jäli ba ji̱ bo̱th, kä mi ti̱i̱ ni̱n ba ji̱ gaŋ. Kä mi ti̱i̱ jinä bikɛ ruac kɛ ji̱.

²³ Kɛn luëëk ti̱ti̱ ɛ lɛmbär, kä ŋi̱i̱c ɛ buay. Kä ruaacni luthä ti̱ti̱ kɛ dup teekä.

²⁴ Ba ji̱ gaŋ kä ciek mi dho̱o̱m, kɛnɛ lɛpdɛ mi puɔth puɔth mi nääk.

²⁵ Kä /cu gɔɔydɛ bi nhɔk kɛ lɔcdu, kä a ji̱ /cɛ bi naŋ kɛ waŋdɛ.

²⁶ Kɛ ɣöö riär dëë kɔk kɛ mi̱eth, kä ler kakɛ ni tëk ran.

²⁷ Ɛ dee raan mac ku rɔm kɛ bapdɛ, kä bi bieynikɛ kään a /cikɛ waŋ?

²⁸ Kiɛ dee raan ja̱l rɛy miim ti leth, kä /ci ciökɛ bi waaŋ?

²⁹ Ɛnɔ ce̱tdɛ nikɛ tɔ̱ɔ̱c ran kɛ ciek wutdä mi dɔ̱ŋ. /Ci raan ɛ dee guëër kä bɛ wä a thil mi ca lät kä jɛ.

³⁰ /Ci naath ruac kɛ kueel, mi cɛ mi̱eth kual kɛ ɣöö näk buɔthɛ.

³¹ Kä mi ca jɛ käp, bɛ jɛ col ni kä bärɔw. Kä bɛ nyin dhɔaarɛ diaal thöp.

³² Kä ram ɔ bi dhɔmɔ thilɛ jɛ ca̱r, kä ram ɔ bi jɛ la̱t ɔ cɛ rɔ däk.

³³ Bɛ buɔ̱ɔ̱t kɛnɛ thil luthä jek, kä /ca jiääkdɛ bi woc.

³⁴ Kɛ ɣöö tiɛɛl la cɔw ciëk a jak kä ŋɛ̈ɛ̈ny ɛlɔ̱ŋ, kä la thilɛ jɛ päl ikä mi coolɛ duɔ̱ɔ̱r.

³⁵ Kä /cɛ cut dee met nhɔk. Kä /cɛ kök dee met ka̱n, a cäŋ di̱tdɛ ce̱tkɛ ŋu bä.