Ruac Pɛli 5 - RUAC KUƆTH IN RƐL RƆ

Luek kɛ kui̱ dhöm

¹ Gatdä liŋ pɛlä.

² Ɛ jɛn bi ŋɔak ŋa̱c agɔaa ɔ, kä bi la̱t ni mi la ŋäc mi thok.

³ Kɛ ɣöö lɛp ciëk mi dho̱o̱m limɛ ce̱tdɛ nikɛ tuaar. Kä cäät ruacdɛ rɔ ce̱tnikɛ liɛɛth.

⁴ Kä kɛ thuɔ̱kdɛ bɛ kɛ̈c ce̱tnikɛ kɛ̈ɛ̈ kër, kä bɛ muɔth ce̱tnikɛ thɛp.

⁵ Duɔ̱ɔ̱pdɛ naŋɛ naath li̱th, kä ka̱a̱thkɛ naŋkɛ naath ni jɔɔkni.

⁶ Kä jɛn /cɛ duɔ̱ɔ̱p teekä car. Kä /kui̱cɛ jɛ i̱ gɔ̱l dupkɛ rɔ.

⁷ Kɛ kui̱c ɛmɔ täämɛ gaatkä liɛŋɛ ɣä, kä /cuarɛ ruaacnikä päl.

⁸ Kä nɔ̱a̱nɛ rɔ̱ kɛ ciek mi ce̱tkɛ nɛ, kä /cuarɛ rɔ thieek kɛ thok dhɔaarɛ.

⁹ Ɛ ni mi go̱o̱ri ɣöö bi luthdu ka̱m nɛy ti kɔ̱ŋ, kä bi runku ka̱m ram mi thil pälikä.

¹⁰ Kä bi jur ria̱ŋdu naŋ kɛ buɔ̱m, kä tin ci la̱t bi kɛna ria̱ŋ dhɔaar raam mi juɔ̱r.

¹¹ Kä kɛ pek teekädu, bi daar guäth in ci ri̱ŋ pua̱a̱nydu ku thɔɔt.

¹² Kä bi wee i̱, “Ɛŋu mi lökä luek, kä ɛŋu /ka̱n com nhɔk ɔ!

¹³ Ɣän /ka̱n jɔw nɛɛni tin ŋi̱eeckɛ ɣä luɔ̱th, /ka̱n ruacdiɛn liŋ.

¹⁴ Kä ɣän ta̱a̱ rɛy däkä ni däär matdä dolä.”

¹⁵ Ŋäth ni ciekdu kä rɔa, kä thuk lɔcdu kɛ jɛ ni kärɔa.

¹⁶ Ɛ bi gaatku ku te gua̱thni diaal, a bi pekdɛ kua̱ gua̱a̱th mi daapi gaatku thi̱n?

¹⁷ Jak nikɛ kä nyin pua̱a̱nydu kärɔa, a /cikɛ nyuak yɛnɛ juɔ̱r.

¹⁸ A puɔ̱th tekɛ ciekdu, kä a lɔcdu tɛth kɛ ciek ŋuɛɛtkädu.

¹⁹ Gɔaaɛ ce̱tdɛ nikɛ kɛ̈w, kä a lɔcdu tɛth kɛ maandɛ ni ciaŋ. Kä bɛ ji̱ ro̱ŋ ni ciaŋ kɛ nhökdɛ.

²⁰ Kä ɛŋu ba ji̱ pɛc ɛ ciek mi dho̱o̱m ɔ gatdä? Kä ɛŋu nhɔki ni bap ciëk raam mi dɔ̱diɛn ɔ?

²¹ Kä dup nath tekɛ nhiam Kuɔth Nhial, kä guicɛ dupkɛ diaal.

²² Kä jiääk lätni gua̱n dueeri, ɛ duɔ̱p mi bi jɛ käp, kä bi dep dueerikɛ jɛ yiɛn.

²³ Kä jɛn ba näk ɛ thil luthä, kä ba jɛ buath raar ɛ ciaaŋdɛ.