Ruac Pɛli 21 - RUAC KUƆTH IN RƐL RƆ

¹ Kä lɔc kua̱r ce̱tdɛ kɛ lo̱o̱l pi̱i̱ni kä Kuoth Nhial. La ri̱tdɛ jɛ ce̱tnikɛ min go̱o̱rɛ.

² Kä lät ran diaal guicɛ kɛ ɛn ɣöö gɔwkɛ, duundɛ ɣöö lɔc ɣɔ̱a̱nkɛ jɛ ɛ Kuoth Nhial.

³ La̱t cuŋni kɛnɛ thuɔ̱ɔ̱k gɔw ni kɛn kä Kuoth Nhial kä tho̱p mucä.

⁴ Kä ram mi tëë kɛ kac kä liak rɔ, lätdɛ ni dueer ɛn raam ɛmɔ.

⁵ Cär raam mi tekɛ päl lɔaac piny no̱o̱ŋɛ ti ŋuan, kä ram mi pɛ̈th cärä no̱o̱ŋɛ ni can.

⁶ Ria̱ŋ mi jëkɛ kɛ kac /cɛ jäny, naŋɛ ni raan li̱th.

⁷ Kä gak ji̱ dueeri bɛ kɛ bath, kɛ ɣöö lökɛ la̱t thukä.

⁸ Duɔ̱ɔ̱p gua̱n dueeri ɛ gɔ̱l gɔ̱l, kä ciɛŋ raam mi muɔ̱l muɔ̱l kɛ cuŋ.

⁹ Gɔaa ni ɣöö deri cieŋ gekä duëël, kä ɣöö bi ciaŋ mat yɛnɛ ciek mi puɔ̱ny gak.

¹⁰ Kä lɔc gua̱n dui̱rä go̱o̱rɛ ni jiäk, thilɛ gɔɔy mi jek gua̱n thieekädɛ jɛ kä jɛ.

¹¹ Mi ca ram mi dhɔ̱ŋ dhɔ̱ŋ duäc, la dɔ̱a̱r ŋɔak a ŋäc. kä mi ca ram pɛl luek, la ŋäcdɛ rɔ a reep.

¹² La ram mi pɛl dhɔr ram mi lät jiäk a guic. Kä la däkɛ dhɔr raam in lät jiäk.

¹³ Kä mi lo̱k raan ɣöö liŋɛ lul raam mi can, amäni jɛn bä, bɛ wiee kä thilɛ ram mi bi jɛ luäk.

¹⁴ Muc gekä duänyɛ gak piny, kä kök yienyɛ gak mi di̱i̱t.

¹⁵ Thuɔ̱k ɛ gɔɔy kä ji̱ cuŋni, kä ɛ riɛk kä la̱a̱t jiäkni.

¹⁶ Kä ram yi̱c kɛ duɔ̱ɔ̱p pɛlä, bɛ wä lɔ̱ɔ̱ŋ ni wi̱c jɔɔkni.

¹⁷ Kä ram nhɔk ni jäl bɛ la can, kä ram nhɔk ni kɔaŋ kɛnɛ liɛɛth /cɛ bi met ria̱ŋ.

¹⁸ Nɛy tin ji̱ dueeri kɛ luëël ji̱ cuŋni, kä nɛy tin thil ŋa̱th kɛ luëël ji̱ ŋäthä.

¹⁹ Gɔaa ni ciaŋ däärdɔaar, kä ɣöö bi cieŋ yɛnɛ ciek mi gua̱n gaak mi te nyi̱r.

²⁰ Ram mi pɛl la tɔ̱ɔ̱wɛ mi̱th, kä cam ram mi dɔ̱a̱r ni nyinkɛ.

²¹ Kä ram mi guur ni gɔy kɛnɛ cuŋ, bɛ tëk kɛnɛ luth jek.

²² La ram mi pɛl wec nɛɛni ti buɔ̱m buɔ̱ɔ̱m a mak, kä la däkɛ ti̱ec tin bum tin ŋa̱thkɛ.

²³ Kä ram mi tiit ruacdɛ, tiitdɛ ni rɔ rɛy rikni.

²⁴ Kä cɔalkɛ ram mi gua̱n kacä kɛnɛ liak i̱, “Dho̱o̱t nath.” Ɛn ram in lät ŋɔak kacä.

²⁵ Kä cär raam mi duaal na̱kɛ jɛ, kɛ ɣöö lo̱kɛ la̱t.

²⁶ Kä la but gua̱n dueeri kɛ go̱r kɛ gua̱th mi bɛ duɔ̱ɔ̱r jek thi̱n, kä ku gua̱n cuŋni la muc a /cɛ tetdɛ coŋ.

²⁷ Kä muc raam mi lät jiäk ɛ duer. Derɛ kulɛ te i̱di mi no̱o̱ŋɛ jɛ kɛ duɔ̱ɔ̱p mi duer.

²⁸ Kä neen mi lat ni kac bɛ li̱w, kä ram mi liŋ ruacdɛ bɛ da̱k amäni cäŋ kɛl.

²⁹ Gua̱n dui̱rä la juanɛ ni nhiamdɛ, kä gua̱n cuŋni caarɛ duɔ̱pkɛ.

³⁰ Kä thilɛ pɛl kɛnɛ tiit lɔaac kɛ ca̱r, mi dee gɔaa ni jɛn kä Kuoth Nhial.

³¹ La rialkɛ jio̱k tuɔ̱ruɔ̱k ikä kɛ ko̱r, kä juc ŋunɛ Kuoth Nhial.