Ruac Pɛli 1 - RUAC KUƆTH IN RƐL RƆ

Luɔt pɛlä

¹ Pɛl Thɔ-lo-mon gat Dee-bid kuäär I-thɛ-rɛl.

² Ɛn pɛl nyuthɛ naath ŋäc ŋɔaani kɛnɛ ŋi̱eec rieetni tin te rɛy ran.

³ Kä bɛ ji̱ luäk kɛ ŋäc rieetni agɔaa, kɛnɛ ŋäc cuŋni kɛ thuɔ̱k.

⁴ Kä mocɛ ram mi kuiy ŋäcdɛ ŋäc ŋɔaani, kä nyuthɛ ŋuɛ̈tni ŋäc lätni.

⁵ Kä reepɛ ram mi ŋäc ŋɔak kɛ pɛl kä reepɛ ram mi tiit ŋɔak kɛ pɛl mi di̱i̱t,

⁶ kɛ ɣöö bɛ pɛl ŋa̱c kɛnɛ cäätni rieetni nɛɛni ti pɛl kɛnɛ ma̱r ma̱a̱rikiɛn.

⁷ Kä luth Kuɔth Nhial, ɛ jɛn tuk pɛlä. Kä dɔa̱a̱r kueckɛ pɛl kɛnɛ cieŋ yupä.

Luek kɛ kui̱ ɣɔ̱ɔ̱nä

⁸ Gatdä liŋ ruac guur, kä cu ŋi̱i̱c muɔɔr lo̱k.

⁹ Kɛ ɣöö bi kɛna kum wecdu mi gɔaa kä bi ka tik ŋua̱a̱kdu bä.

¹⁰ Gatdä mi ca ji̱ ɣɔ̱n ɛ ji̱ dueeri, cu rɔ päl kɛ.

¹¹ Kä mi wa ji̱ jiök i̱, “Bër wanɛ kɛɛl banɛ ram mi banɛ näk wä nyurikä. Wanɛ ram mi kui̱c ŋu nyurikä.

¹² Kuanɛ kɛ roc a tëk ce̱tkɛ ɣo̱t, ce̱tkɛ nɛy ti coth rɛy kɔ̱kä.

¹³ Banɛ ti ŋuan ti gɔw jek, banɛ dho̱rkɔn cu thiäŋ kɛ pɛ̈ɛ̈c.

¹⁴ Bër wanɛ kɛɛl banɛ tin wanɛ kual nyuak.”

¹⁵ Gatdä cu jäl kɛɛl kɛ kɛ, nɔ̱ɔ̱ni rɔɔdu kɛ duɔ̱ɔ̱pdiɛn.

¹⁶ Kɛ ɣöö kɔɔŋ kɛn ni duer, pɛ̈th kɛn kɛ ɣöö ba riɛm ran wä wuɔ̱th piny.

¹⁷ Jiäkɛ, ɛn ɣöö ɣäri cambak a guɛckɛ jɛ ɛ diit tin go̱o̱ri ka̱pdiɛn.

¹⁸ Kä kɛn nɛy tɔ̱tɔ̱ dɛ̈pkɛ ni rɔ̱, bi̱i̱m kɛn ni tëkdiɛn.

¹⁹ Kä ɛn nɔmɔ ɛ jɛn thuɔ̱k raam mi jek ŋɔak kɛ duɔ̱ɔ̱p mi duer, la naŋɛ tëk nɛɛni tin la̱tkɛ tɔ̱tɔ̱.

Luek kɛ lo̱k pɛlä

²⁰ Pɛl kapɛ jɔwdɛ nhial rɛy nath, kä cio̱tdɛ rɛy duɔ̱pni.

²¹ Cio̱tdɛ gua̱thni tin la naath rɔ̱ a duul thi̱n. Ruacɛ duɔ̱pni tin wä rɛy wec i̱,

²² “Ɛ bɛ ku mäni nɛy lö nɛy ti kui̱c ŋu bi yɛn kui̱c ŋɔaanidun nhɔk ɔ? Kä ɛ nɛy bi yɛn yööŋ yi̱öŋdun kɛ naath nhɔk ɔ, kä bi dɔa̱a̱r ŋäc ŋɔaani lo̱k?

²³ Mi tiit yɛn luekdä dëë yɛ ka̱m lɔcdä, kä dërɛ ca̱rä cu ŋa̱c.

²⁴ Duundɛ ɣöö cia ciötdä lo̱k, kä mëë cä tetdä cuɔ̱ŋ nhial, cuɛ thil ram mi tiit jɛ.

²⁵ Kä cuarɛ dhɔt ni luekdä, cuɛ thil kɛl mi cuarɛ käp thi̱n.

²⁶ Kä ɣän, bä dɔl ni yɛ kɛ da̱kdu bä, bä yɛ lɛŋ mi wä riɛk ben kä yɛ,

²⁷ mi wä riɛk yɛ penikä ce̱tkɛ muaŋ. Kä bi da̱kdun ben ce̱tkɛ ruɔth, mi wä ga̱a̱c kɛnɛ rik yɛ wä penikä.

²⁸ Ba ɣä cɔl, kä duŋdɛ ɣöö /cä kɛ bi liŋ. Kä ba ɣä go̱r kä /ca ɣä bi jek.

²⁹ Kɛ ɣöö /ca ŋäc ŋɔaani lo̱k kä /ken kɛn ka̱n ni luth Kuɔth Nhial,

³⁰ kä /ka̱n luekdä nhɔk, kä lökɛ ruacdä.

³¹ Kɛ kui̱c ɛ mɔ, bikɛ cam ni lätkiɛn, kä bikɛ ria̱ŋ nikɛ kɛ.

³² Kä nɛy tin kueckɛ ŋɔak bikɛ li̱w kɛ kui̱c ŋɔaani, kä bi nɛy tin dɔa̱a̱r da̱k kɛ thil tiitädiɛn.

³³ Duundɛ ɣöö ram mi liŋ ɣä, bɛ tëk a thil diɛɛr, kä bɛ mi̱th athil dual kɛ riɛk in bi jɛ jek.”