Pay-le-mon 1 - RUAC KUƆTH IN RƐL RƆ

Raandɛ mi ci rɔ bar

¹ Ɛ ɣän Puɔl, mi ca yiɛn kɛ kui̱ Kritho Yecu, kɔnɛ dämandan ni Ti-mo-thi, gɔ̱a̱rä warɛgak ɛmɛ ji̱, ji̱n Pay-le-mon määthdä kä raan la̱t kɛ̈ɛ̈l kɛ ɣä,

² kä wëë kä nyimandan ni A-pia, kɛ Ar-ki-puth raan rɛ̈m Yecu kɛ kɔn kɛɛl, kä wëë kä ji̱ duëël Kuɔth tin la mät dueelu.

³ A puɔ̱th kɛnɛ mal kä Kuoth in la Gua̱a̱ra kɛnɛ Kuäär ni Yecu Kritho tekɛ yɛ.

Nhök Pay-le-mon kɛnɛ ŋa̱thdɛ

⁴ Ɣän la Kuothdä a la̱rä tɛ̈th lɔaac gua̱thni diaal, mi cä ji̱ tim rɛy palnikä,

⁵ kɛ ɣöö cä nhökdu kɛ nɛy diaal tin ci Kuoth kɛ lɛy liŋ kɛnɛ ŋa̱thdu kɛ Kuäär ni Yecu.

⁶ Ɣän palä kɛ ɣöö ŋa̱th in ci nyuak kɛ naath bɛ ji̱ jakä ŋäci puth kɔn diaal tin tekɛ kɔn rɛy Kritho.

⁷ Kä ɣän cä tɛ̈th lɔaac mi di̱i̱t kɛnɛ buɔ̱m lɔaac jek kɛ kui̱ nhökdu, kɛ ɣöö ci lo̱c nɛɛni tin ci Kuoth kɛ lɛy jakä gɔaa kɛ ji̱ dämaar.

Thiec kɛ kui̱ O-nɛ-thi-mäth

⁸ Kɛ kui̱ lotdä nɛmɛ ɣän dëë rɔ liak ɛlɔ̱ŋ rɛy Kritho ɛn ɣöö dëë ji̱ la̱t mi lot rɔ i̱ bi la̱t.

⁹ Kä kɛ ɣöö nhɔakä ji̱, bä thiec ni ji̱. Ɛ ɣän, Puɔl, la̱tdä nɛmɛ ala wut mi di̱i̱t, kä täämɛ bä ɛ ɣän raan yieenä kɛ kui̱ Kritho.

¹⁰ Ɣän la̱ŋä ji̱ kɛ kui̱ gatdä ni O-nɛ-thi-mäth, min ci ɣän pay a gua̱n, mɛ ta̱a̱ yieenä mɛ.

¹¹ Mëëdan thilɛ jɛ luɔt kä ji̱, kä täämɛ cɛ tekɛ luɔt kä ji̱ amäni ɣän.

¹² Ɣän ja̱kä jɛ kä jɔk kä ji̱, kɛɛl kɛ jɛ ja̱kä ni lɔcdä pa̱ny.

¹³ Kä cua̱ go̱r ni mi derɛ te kɛɛl kɛ ɣä, kɛ ɣöö derɛ ɣä lätikä kɛ gua̱a̱thdu, min ta̱a̱ yieenä kɛ kui̱ thukni ti gɔw.

¹⁴ Kä /cä jɛ go̱o̱r ɛn ɣöö bä duɔ̱ɔ̱r la̱t a /cä ji̱ thiec kɛ nhiam, kɛ ɣöö min bi lät kä ɣä bɛ ben kä ji̱ a /ca kok ni ji̱.

¹⁵ Dɔ̱ŋ ɛ jɛn luɔt ɛmɛ ɛ nëë jiɛy kɛ O-nɛ-thi-mäth kä ji̱ kɛ gua̱a̱th mi tɔt, kɛ ɣöö bɛ loc kä ji̱ amäni cäŋ kɛl,

¹⁶ kä /cɛ lɛ ŋot ala kuany jɛn lenyɛ kuany, ɛ dämandan mi nhɔaknɛ. Nhɔakä jɛ ɛlɔ̱ŋ, kä ku nhökdu lɛ te i̱di kɛ jɛ ala kuany kä ala dämuɔɔr rɛy Kua̱r ni Yecu.

¹⁷ Kä ɛnɔ mi caari ɣä lapä raan la̱t kɛ̈ɛ̈l kɛ ji̱ nyuuri jɛ kɛ nyuur in deri nyuur ni ɣä.

¹⁸ Mi cɛ ji̱ duer duer, kiɛ mi tëëkɛ ŋua̱l kɛ ji̱, gɔ̱ri mɔmɔ piny kɛ ciötdä.

¹⁹ Ɛ ɣän, Puɔl, gɔ̱ɔ̱r mɛmɛ kɛ tetdä mɔ, ɣän bä jɛ cuɔ̱l ji̱. Kä thilɛ mi bä lat kɛ kui̱du kɛ ɣöö ci thöp ni puɔ̱nydu ɣä.

²⁰ Ɣɔ̱ɔ̱n dämaar, ɣän thiëëcä ji̱ lätni ɣä kä nɔmɔ rɛy Kua̱r! Jakni lɔcdä kä gɔaa rɛy Kritho.

²¹ Ɣän gɔ̱a̱rä ji̱ warɛgak ɛmɛ, kɛ ɣöö ŋa̱a̱thä ji̱ ɛn ɣöö bi jɛ la̱t, kä ŋa̱cä jɛ ɛn ɣöö bi mi leny min cä thiec la̱t.

²² Kä min dɔ̱ŋ, ɛ ɣöö riali duel ikä kɛ kui̱dä, kɛ ɣöö caarä ɛn ɣöö bi Kuoth palu liŋ a ba ɣä luɔ̱c yɛ.

Ner in jɔak

²³ Nërkɛ ji̱ ɛ Ɛ-pa-rath, ram min ca yiɛn kɛɛl kɛ ɣä kɛ kui̱ Kritho Yecu,

²⁴ amäni Mak, kɛnɛ A-rith-tar-keth, kɛ Dii-mɛth, kɛnɛ Luk, nɛy tin lät kɛɛl kɛ ɣä nërkɛ ji̱.

²⁵ A puɔ̱th Kua̱r ni Yecu Kritho te kɛɛl kɛ yiëëdu.