Obad 1 - RUAC KUƆTH IN RƐL RƆ

Luk Ɛ-dɔm

¹ Nɛmɛ ɛ jɛn nöp Kuɔth kɛ thok O-bad-yaa, nɛmɛ ɛ jɛn mëë ci Kuäär ni Kuoth Nhial ɛ lar kɛ kui̱ Ɛ-dɔm. Ci Kuoth Nhial jääkdɛ jäk kä dööri, kä cua kɔ jɛ liŋ wëë i̱, “Wanɛ thi̱n, ka̱pnɛ wec Ɛ-dɔm ko̱r.”

Da̱k Ɛ-dɔm

² Kuoth Nhial jio̱kɛ Ɛ-dɔm i̱, “Bi thil lua̱ŋ rɛy dööri, kä bi nɛy diaal ji̱ cany ɛlɔ̱ŋ,

³ ci ca̱r liakädu ji̱ ɣɔam, ji̱n ram mi ciɛŋ ni wi̱c pa̱a̱m mi curcur, ci cieeŋdu la̱th ni wi̱i̱ pa̱a̱m, kä laari jɛ i̱, ‘Ɛŋa mi dee ɣä ka̱p piny?’

⁴ Cäŋ bi rɔ lo̱th ce̱tkɛ cuɔɔr, kä bi duelu la̱th ni rɛy ciɛri, bä ji̱ thöt piny niɛ wi̱ni, mɛmɛ kɛ ruac ni Kuoth Nhial.

⁵ “Mi bä wa̱a̱n kiɛ ma̱a̱c kä ji̱ kɛ wäär, kuɛɛ la da̱k mi ni̱n di kä ji̱? Ɛ /ca dee ku kual ni min ro̱ŋ kɛ pua̱nykiɛn? Kä mi pon naath dɛy wal, /cɛ la tëë kɛ ruëc? Kä nɛn ɛ ji̱ tɛ̈ru /ka̱n ji̱ luɔ̱th.

⁶ Ɛŋu ba E-thɔ ku war inɛ mi? Ba kuakɛ diaal ka̱m ni raar!

⁷ Kä bi ji̱ kɔaaru ji̱ mɛ̈t, kä bikɛ ji̱ juɔc ni këth, ba ji̱ wän pɛl ɛ ji̱ maarädu, kä bikɛ ca̱pdu kuëŋ, kä bikɛ nyuaakdu jak kä dhuur ciökniku, kä bikɛ ŋɛ̈r i̱, ‘Jɛn thilɛ mi ŋäcɛ.’ ”

Luɔt däkä Ɛ-dɔm

⁸ Mɛmɛ laar Kuoth Nhial jɛ i̱, “Ɛn cäŋ ɛmɔ, bä pɛl ji̱ Ɛ-dɔm nor, kä bä ji̱ ŋäckä ŋɔaani dup pääm E-thɔ?

⁹ Bi wäthku cu ŋɛ̈ɛ̈r, lö Te-man, kɛ ɣöö ɛ cäŋ li̱eth rɛmni ko̱o̱r kä Ɛ-dɔm.”

¹⁰ “Kɛ näkdu kɛnɛ yiöŋdu kɛ gatmuɔɔr ni Je-kɔb, bi buar i̱ kum ɛ dur, kä bi cu thil luɔt ni ciaŋ.

¹¹ Kɛ cäŋ ëë curi cuɔ̱ŋ gekä, cäŋ ëë tölkɛ ni ti̱eckiɛn ɛ ji̱ tɛ̈r, kä curi guec ni jɛ riɛkdɛ, mëë curi ce̱tnikɛ kɛn nɛy tëë cua Jɛ-ru-tha-lɛm war, kä cukɛ kuakɛ däk kä rɔ̱.

¹² Dämuɔɔri tin te kä Juda, /ci kɛ dee kuɔ̱m waŋ kɛ cäŋ däkädiɛn, kä /ci lɔcdu dee tɛɛth kɛ cäŋ rikädiɛn, kä /ci kɛ dee dɔl kɛ jiɛ̈th lɔaacdiɛn.

¹³ /Ci dee coth rɛɛk nɛɛnikä kɛ ɣöö bikɛ wä guec mi bɛ̈cdiɛn, kä /ci ria̱ŋdiɛn dee wä pɛc kɛ cäŋ jiɛthä lɔaacdiɛn.

¹⁴ /Ci dee cuɔ̱ŋ kam duɔ̱pni kɛ ɣöö bi nɛy tin barkɛ rɔ ben näk, kä /ci nɛy tin ci kään dee ben ka̱m ji̱ tɛ̈r kɛ cäŋ däkädiɛn.”

Kuoth bɛ döör diaal luk

¹⁵ “Cäŋ in bi Kuoth Nhial ɛ luk ni döör diaal cɛ thia̱k, niɛ nɔ ci la̱tɔ, ba lät kä ji̱ bä. Kä bi lätku diaal rɔ luɔ̱c ni ji̱.

¹⁶ Kɛ ɣöö cia maath wi̱i̱ pa̱a̱mdä in rɛl rɔ, inɔ bä, bi döör diaal maath thi̱n. Ɛ puc, kɛn bikɛ maath a bikɛ rɔ̱ kui̱c yɔ̱ŋ, kä bɛ ce̱tnikɛ mi /ka̱n kɛ kɔŋ cak.”

Juc ji̱ I-thɛ-rɛl kɛ naath

¹⁷ “Kä päm Dha-yɔn ba ka̱n jek thi̱n, kä bɛ la gua̱a̱th mi rɛl rɔ, kä bi thok duëël Je-kɔb gua̱a̱thdiɛn cu ciɛŋ.

¹⁸ Bi thok duëël Je-kɔb a mac, kä bi bo̱lɛ a thok duëël Jo-thɛp, kä bikɛ thok duëël E-thɔ pɛt, ce̱tkɛ min la mac juaac a pɛt, kä thilɛ kuɛ̈ɛ̈ mi bi duɔth kɛ tëk thok duëël E-thɔ,” mɛmɛ laarɛ Kuoth Nhial.

¹⁹ “Kä bi ji̱ Nɛ-gɛb, Ɛ-dɔm ka̱n, kä bi ji̱ täpni konyä ca̱ŋ, jɔk yiëër röl ji̱ Pi-li-thɛt ka̱n, amäni röl ji̱ Ɛ-pa-rim kɛnɛ röl Tha-mɛ-ria, kä bi Ben-ya-min Gil-yad ka̱n.

²⁰ Kä bi nɛy tëë ca pɛc kä ji̱ I-thɛ-rɛl ɛmɛ, röl ji̱ Ɣɛlɛ̈ ka̱n, a wä kä Po-ni-cia amäni Dhar-pɛ̈th. Kä bi pɛ̈ɛ̈c Jɛ-ru-tha-lɛm tin te kä Thɛ-pa-rad, kui̱c rööl Nɛ-gɛb ka̱n.

²¹ Kä bi ka̱a̱n wä wi̱i̱ Pa̱a̱m Dha-yɔn, kɛ ɣöö bikɛ Ɛ-dɔm ben ruac, kä bi kuääriɛn cua Kuoth Nhial.”