Nyuuth 9 - RUAC KUƆTH IN RƐL RƆ

¹ Kä cu jääk nhial in dhieecdiɛn kaaŋdɛ koth, kä cua cier mi ci pɛn piny nhial nɛn, kä cua jɛ ka̱m leep kɔ̱kä mi thil piny.

² Cuɛ kɔ̱a̱k mi thil piny lɛp, kä cu mi ce̱tkɛ tol maac tha̱t yieethä mi di̱i̱t päl rɛy kɔ̱kä, kä cu cäŋ kɛnɛ rɛy jiɔam cuɔl kɛ tol in bä rɛy kɔ̱kä.

³ Kä rɛy tuɔɔl cu kɔaryɔaamni ben wi̱i̱ muɔ̱ɔ̱n, kä cua kɛ ka̱m buɔ̱m mi ce̱tkɛ buɔ̱m jiɛɛthni wec muɔ̱ɔ̱n.

⁴ Kä ca kɛ la̱r ɣöö /cikɛ juaac kiɛ ti do̱ny kiɛ jiath wec muɔ̱ɔ̱n bi guëër, ɛ ni nɛy tin thil biɛl thaanyä Kuɔth nhiam kaandiɛn.

⁵ Kä cakɛ pa̱l ɣöö bikɛ pua̱ny nath jakä bɛc, kɛ päth da̱ŋ dhieec, kä /cikɛ naath bi näk. Kä cu bɛ̈c pua̱nyni nath ce̱tkɛ bɛ̈c ka̱cä jiɛɛth.

⁶ Kä ɛn ni̱ni tɔ̱tɔ̱ bi naath go̱r ni lia̱a̱, kä /ci kɛn ɛ bi jek. Kɛn bikɛ lia̱a̱ go̱r ɛlɔ̱ŋ, kä bi lia̱a̱ rɔ bar kä kɛ.

⁷ Kä ce̱t guec kɔaryɔaam kɛ jio̱o̱k tuɔ̱ruɔ̱k ti ca rialikä kɛ kui̱ köör. Te wuɔ̱thkiɛn kɛ ti ce̱tkɛ kuɔ̱mni kua̱ri ti da̱a̱p, kä ce̱t nhiemkiɛn kɛ nhiem nath.

⁸ Ce̱t mi̱emkiɛn kɛ mi̱em mään, kä ce̱t lɛckiɛn kɛ lɛc luɔny.

⁹ Tekɛ kuac ti buɔ̱m buɔ̱ɔ̱m ti ce̱tkɛ köötni yieethä bapdiɛn, kä ce̱t wuɔ̱w gɔ̱ɔ̱kiɛn kɛ wuɔ̱w jio̱o̱kni tuɔ̱ruɔ̱k ti ŋuan, ti yɔ̱a̱ckɛ thurbiɛɛli ti riŋ ko̱o̱r.

¹⁰ Kä tekɛ kɛ jua̱l ce̱tkɛ jiɛth, kä buɔ̱m käcädiɛn in la bɛc kä kɛ naath kɛ päth da̱ŋ dhieec tëë jua̱likiɛn.

¹¹ Tekɛ kɛ kuäär in ruac kɛ min la jääk kɔ̱kä mi thil piny. Kä cɔalkɛ ciötdɛ i̱ “Ä-ba-don” kɛ thok Ɣi-bɛ-ru, kä kɛ thok Gɛ-rith cɔalkɛ jɛ i̱ “A-pɔ-li-yon”.

¹² Ci riɛk in nhiam thuɔ̱k. Kä ŋot rik da̱ŋ rɛw ti bi ben.

¹³ Kä cu jääk Kuɔth nhial in bäkɛliɛn kaaŋdɛ koth, kä cua jɔw liŋ tuɔ̱ŋni yi̱kä dääpä da̱ŋ ŋuan min nhiam Kuɔth,

¹⁴ jio̱kɛ jääk nhial in bäkɛliɛn in tekɛ kaaŋ i̱, “Lony ja̱a̱k da̱ŋ ŋuan tin ca yiɛn kiir Yu-pɛ-ree-tidh.”

¹⁵ Kä ɛnɔ cua ja̱a̱k nhial da̱ŋ ŋuan lony, tin ca ka̱p piny a cikɛ rɔ̱ rialikä kɛ kui̱ thaakä, kɛnɛ ca̱ŋ, kɛ pay, kɛnɛ ruɔ̱n, kɛ ɣöö bikɛ pek nath in diɔ̱ɔ̱kdiɛn näk.

¹⁶ Kä pek rɛ̈m in tekɛ jio̱o̱k tuɔ̱ruɔ̱k kɛ bathdɔɔri ti kur ti jiɛn da̱ŋ rɛw nikä kuɔ̱r cua jɛn pek in cä liŋ.

¹⁷ Kä cua jɛn nën in cä nɛɛn ni jio̱o̱k tuɔ̱ruɔ̱k rɛy nyuuthädä. Kä nɛy tin kɔat kɛ kɛ ciaŋkɛ köötni yieethä bapdiɛn ti luaal ce̱tkɛ mac, kɛ ti jaŋ jaaŋ ce̱tkɛ pua̱a̱r, kɛnɛ wäl mi yian in waŋkɛ. Kä ce̱t wuɔ̱th jio̱o̱kni tuɔ̱ruɔ̱k kɛ wuɔ̱th lonyni, kä bä ni mac kɛnɛ tol, kɛ wäl mi kɛc ŋuänydɛ raar thuknikiɛn.

¹⁸ Kä kɛ rik da̱ŋ diɔ̱k ti̱ti̱, ca pek nath in diɔ̱ɔ̱kdiɛn näk, kɛ ben mac kɛnɛ tol, kɛ wäl mi kɛc ŋuänydɛ raar thuknikiɛn.

¹⁹ Kɛ ɣöö buɔ̱m jio̱o̱kni tuɔ̱ruɔ̱k tëë thuknikiɛn kɛnɛ jua̱lkiɛn. Kä ce̱t jua̱lkiɛn kɛ thɔ̱ɔ̱l ti tekɛ wuɔ̱th, kä muɔckɛ naath buɔ̱ɔ̱t kɛ kɛ.

²⁰ Kä duɔth nath, tin /ka̱n näk ɛ rik ti̱ti̱, /ka̱n rɔ ri̱t kä lät tetnikiɛn tin jiäk. Kä /ka̱n pal yieeni ti jiäk kɛnɛ kuth tin ca la̱t kɛ da̱a̱p, kɛ ciɛk in bo̱r, kɛ ciɛk in yian, kɛnɛ päm, kɛ jiɛn, tin /ci dee guic, kiɛ li̱eŋ, kiɛ ja̱l päl.

²¹ Kä /kenkɛ rɔ̱ ri̱t kä näk nath, kiɛ lät ti̱i̱tädiɛn, kiɛ ciaŋ leerädiɛn, kɛnɛ kuëliɛn.