Nyuuth 8 - RUAC KUƆTH IN RƐL RƆ

Di̱i̱l in bärɔwdiɛn kɛnɛ thak dääpä

¹ Mëë ci Ruath dɛ̈ɛ̈l di̱i̱l in bärɔwdiɛn lɛp, cu nhial biɛt kɛ nuth thaak.

² Kä cua ja̱a̱k nhial da̱ŋ bärɔw nɛn cuŋä nhiam Kuɔth, kä ca kɛ moc kaaŋni da̱ŋ bärɔw.

³ Kä cu jääk nhial dɔ̱diɛn ben, kä tëë thak dääpä tetädɛ, kä cuɛ cuɔ̱ŋ wi̱i̱ yi̱kä, kä cua jɛ ka̱m wal ti ŋuan ti waŋkɛ kɛ pal nɛɛni diaal ti ci Kuoth kɛ lɛy, wi̱i̱ min ca la̱t kɛ da̱a̱p nhiam kɔam kuäärä.

⁴ Kɛ tet jääkä nhial cu tol wal tin waŋkɛ wä nhial nhiam Kuɔth kɛɛl kɛ pal nɛɛni tin ca lɛy.

⁵ Kä cu jääk nhial thak ka̱n, cuɛ jɛ thiäŋ kɛ mac wi̱i̱ yi̱kä, kä cuɛ jɛ wuɔc wi̱i̱ muɔ̱ɔ̱n. Kä cuɛ tekɛ ma̱a̱r nhial, kɛnɛ wuɔ̱w mi di̱i̱t, kɛ yiel nhial, kɛnɛ lath piɛny.

Kaaŋni bärɔw

⁶ Täämɛ cu ja̱a̱k nhial da̱ŋ bärɔw ti tekɛ kaaŋni da̱ŋ bärɔw rɔ rialikä kɛ kuɔ̱thdiɛn.

⁷ Cu jääk in nhiam kaaŋdɛ koth, kä cu nhiaal guiyni kɛnɛ mac mi ca liɔm kɛ riɛm pɛn wi̱i̱ muɔ̱ɔ̱n. Kä cu kɛl diɔ̱ɔ̱kni wec muɔ̱ɔ̱n waaŋ, kä cu kɛl kä diɔ̱ɔ̱k jiɛn waaŋ, kä cu juaac diaal tin tɔ̱ɔ̱c waŋ.

⁸ Cu jääk nhial in rɛwdɛ kaaŋdɛ koth, kä cua duɔ̱ɔ̱r mi di̱i̱t, mi ce̱tkɛ päm mi pɛt kɛ mac yuɔr däär bar.

⁹ Kä cu kɛl diɔ̱ɔ̱kni bar a riɛm, kä cu pek leeyni in diɔ̱ɔ̱kdiɛn in tëk rɛy bar li̱w, kä cua pek ria̱thni in diɔ̱ɔ̱kdiɛn däk bä.

¹⁰ Cu jääk nhial in diɔ̱ɔ̱kdiɛn kaaŋdɛ koth, kä cu cier mi di̱i̱t pɛ̈ɛ̈n nhial, kä pɛtdɛ ce̱tkɛ rith, kä cuɛ pɛn peek kiɛri kɛnɛ löli pi̱i̱ni in diɔ̱ɔ̱kdiɛn.

¹¹ Cɔal ciötdɛ ɛn cier ɛmɛ i̱ “Jiath mi kɛc ɛ ɣɔr.” Cu pek pi̱i̱ni in diɔ̱ɔ̱kdiɛn rɔ looc ni pi̱ ti kɛc, kä cu nɛy ti ŋuan li̱w kɛ kɛn pi̱ tɔ̱tɔ̱, kɛ ɣöö cakɛ jakä ti kɛ̈c kɛ̈ɛ̈c.

¹² Cu jääk nhial in ŋuaandiɛn kaaŋdɛ koth, kä cua pek ca̱ŋ in diɔ̱ɔ̱kdiɛn bak, kɛnɛ pek path, kɛ pek ciɛri in diɔ̱ɔ̱kdiɛn bä. Kä cu pek buɔyädiɛn in diɔ̱ɔ̱kdiɛn cu cuɔl. Cua pek ca̱ŋ in diɔ̱ɔ̱kdiɛn pën buay, cu mäni pek wa̱r inɔ bä.

¹³ Kä cua̱ guic, cua̱ kuey mi pär kɛ där puɔ̱ɔ̱rä liŋ, wieeɛ kɛ jɔw mi di̱i̱t, “Riɛk, riɛk, riɛk akɛ nɛy tin cieŋ wi̱i̱ muɔ̱ɔ̱n, kɛ gua̱a̱th in bi päl kɛ jɔw kaaŋni tin bi ja̱a̱k nhial da̱ŋ diɔ̱k tin kɔ̱kiɛn kɛ koth!”