Nyuuth 7 - RUAC KUƆTH IN RƐL RƆ

Ji̱ I-thɛ-rɛl ti bathdɔɔri ti kuɔ̱r wi̱cdɛ jiɛn da̱ŋ ŋuaan wi̱cdɛ ŋuaan (144,000)

¹ Kɛ kɔr kä mɛmɛ cua ja̱a̱k nhial da̱ŋ ŋuan nɛn cuŋä pekni ɣɔaa da̱ŋ ŋuan, gëlkɛ jiɔam wec muɔ̱ɔ̱n da̱ŋ ŋuan jɔk, kɛ ɣöö bɛ thil jiɔam mi put wi̱i̱ muɔ̱ɔ̱n kiɛ bar kiɛ kä jiɛn.

² Kä cua jääk nhial dɔ̱diɛn nɛn wëë nhial kä käny ca̱ŋ, kä tëëkɛ thääny Kuɔth in tëk. Kä cuɛ ja̱a̱k nhial da̱ŋ ŋuan tin ca ka̱m buɔ̱m kɛ ɣöö ba wi̱c muɔ̱ɔ̱n kɛnɛ bar däk cɔl kɛ jɔw mi di̱i̱t.

³ Ɛn jääk cuɛ wee i̱, “/Cuarɛ wi̱c muɔ̱ɔ̱n kiɛ bar kiɛ jiɛn däk, amäni mi wakɔ la̱a̱t Kuɔthda nhiam kaandiɛn wä moc biɛl kɛ thääny.”

⁴ Kä cua pek nath tin ca moc biɛl liŋ, kɛ bathdɔɔri ti kuɔ̱r kɛl wi̱cdɛ jiɛn da̱ŋ ŋuan wi̱cdɛ ŋuan (144,000), kä döör gan I-thɛ-rɛl diaal.

⁵ Cua bathdɔɔri wäl wi̱cdɛ rɛw moc kɛ biɛl, kä ji̱ thuɔk duëël Juda, kɛ bathdɔɔri wäl rɛw kä ji̱ thuɔk duëël Rɛ-u-ban, kɛ bathdɔɔri wäl rɛw kä ji̱ thuɔk duëël Gad,

⁶ kɛ bathdɔɔri wäl rɛw kä ji̱ thuɔk duëël A-cɛr, kɛ bathdɔɔri wäl rɛw kä ji̱ thuɔk duëël Nap-ta-li, kɛ bathdɔɔri wäl rɛw kä ji̱ thuɔk duëël Ma-na-thɛ,

⁷ kɛ bathdɔɔri wäl rɛw kä ji̱ thuɔk duëël Cim-on, kɛ bathdɔɔri wäl rɛw kä ji̱ thuɔk duëël Li-bay, kɛ bathdɔɔri wäl rɛw kä ji̱ thuɔk duëël Yi-tha-kar,

⁸ kɛ bathdɔɔri wäl rɛw kä ji̱ thuɔk duëël Dhɛ-bu-lun, kɛ bathdɔɔri wäl rɛw kä ji̱ thuɔk duëël Jo-thɛp, kɛ bathdɔɔri wäl wi̱cdɛ rɛw ti ca moc kɛ biɛl kä ji̱ thuɔk duëël Ben-ya-min.

Nɛy ti ŋuan kä döör diaal

⁹ Kɛ kɔr kä mɛmɛ cua guic, kä nɛnɛ, tëëkɛ buɔ̱n nath mi di̱i̱t ɛlɔ̱ŋ mi thilɛ ram mi dee kɛ luäŋ kɛ kuën, bäkɛ röli kɛnɛ döör diaal, kɛ nɛy diaal, kɛnɛ ji̱ thukni diaal ti gööl, cuŋkɛ nhiam kɔam kuäärä kɛnɛ Ruath Dɛ̈ɛ̈l, ciaŋkɛ bieyni ti bo̱o̱r, kä te tetkiɛn kɛ kar kaanä.

¹⁰ Kä cukɛ wiee kɛ jɔw mi di̱i̱t i̱, “Ka̱n ɛ duŋ Kuɔthda min te nyuurä wi̱i̱ kɔam kuäärä kä ɛ duŋ Ruath Dɛ̈ɛ̈l Kuɔth!”

¹¹ Kä cu ja̱a̱k nhial diaal kɔm kuäärä, kɛnɛ di̱t, kɛ ley da̱ŋ ŋuan tin tëk göl piny. Kä cukɛ rɔ̱ yuɔr piny buupä nhiam kɔam kuäärä palkɛ Kuoth,

¹² wäkɛ i̱, “Inɔnɔ! A puɔ̱th kɛnɛ puɔny, kɛ pɛl kɛnɛ lär tɛthä lɔaac, kɛ luth kɛnɛ buɔ̱m, kɛ lua̱ŋ tekɛ Kuothdan amäni cäŋ kɛl! Inɔnɔ.”

¹³ Kä cu ram kɛl kä di̱t ɣä thiec i̱, “Kɛ ŋaani, kɛn ti ciaŋkɛ bieyni ti bo̱o̱r ti, kä bäkɛ nikä?”

¹⁴ Kä cua jɛ loc i̱, “Kuäär, ŋäc kɛ ji̱n.” Kä cuɛ ɣä jiök i̱, “Ti̱ti̱ kɛ kɛn nɛy tin pay ben raar rɛy rikä min di̱i̱t. Cikɛ bieynikiɛn lak, kä ci kɛn kɛ jakä buɔy kɛ riɛm Ruath Dɛ̈ɛ̈l.

¹⁵ Kɛ kui̱ ɛmɔ tekɛ nhiam kɔam kuäärä Kuɔth, kä palkɛ jɛ kɛ cäŋ kɛnɛ wäär rɛy luaak Kuɔth, kä bi ram in nyuur wi̱i̱ kɔam kuäärä kɛ gaŋ kɛ ta̱a̱dɛ kɛɛl kɛ kɛ.

¹⁶ /Ci buɔth kɛ bi nyɔk kɛ näk kiɛ rɛw, Kä /ci cäŋ kɛ bi nyɔk kɛ näk, kiɛ leth.

¹⁷ Kɛ ɣöö bi Ruath Dɛ̈ɛ̈l in te däär kɔam kuäärä a yieendiɛn, kä bɛ kɛ böth rɛy pi̱i̱ni tin muɔckɛ naath tëk, kä bi Kuoth mer nyinkiɛn diaal poc.”