Nyuuth 6 - RUAC KUƆTH IN RƐL RƆ

Di̱i̱li

¹ Täämɛ cua̱ Ruath Dɛ̈ɛ̈l nɛn lɛpɛ di̱i̱l kɛl kä di̱i̱li da̱ŋ bärɔw, cua ley kɛl kä ley da̱ŋ ŋuan tin tëk liŋ cio̱tdɛ kɛ jɔw mi ce̱tkɛ mar nhial i̱, “Bër!”

² Kä cua guic, kä nɛnɛ, tëëkɛ jio̱k tuɔ̱ruɔ̱k mi bo̱r, kä te ram in kɔt jɛ kɛ bäär. Kä cua jɛ ka̱m kum kuäärä, kä cuɛ ben raar ala tieem, kɛ ɣöö bɛ tiëm.

³ Kä mëë cɛ di̱i̱l in rɛwdɛ lɛp, cua ley in rɛwdɛ min tëk liŋ cio̱tdɛ i̱, “Bër!”

⁴ Kä cu jio̱k tuɔ̱ruɔ̱k dɔ̱diɛn mi mɛr ben raar. Cua ram min kɔt jɛ nhök ɣöö bɛ mal woc wi̱i̱ muɔ̱ɔ̱n kɛ ɣöö bi naath rɔ näk. Kä cua jɛ ka̱m thɛp mi di̱i̱t.

⁵ Kä mëë cɛ di̱i̱l in diɔ̱ɔ̱kdiɛn lɛp, cua ley in diɔ̱ɔ̱kdiɛn in tëk liŋ, cio̱tdɛ i̱, “Bër!” Kä nɛnɛ, cua jio̱k tuɔ̱ruɔ̱k mi ca̱r nɛn bëë raar, kä te ram in kɔt jɛ kɛ theemni ŋɔaani tetädɛ.

⁶ Kä cua mi ce̱tkɛ jɔw ran liŋ däär leeyni da̱ŋ ŋuan tin tëk, wëë i̱, “A ki̱lu nuɔ̱p kɛl a yio̱w ti tɔt, kä a ki̱luni nuɔ̱p da̱ŋ diɔ̱k la yio̱w ti tɔt, kä duundɛ ɣöö /cuarɛ liɛɛth kɛnɛ kɔaŋ ŋar ŋar!”

⁷ Kä mëë cɛ di̱i̱l in ŋuaandiɛn lɛp, cua jɔw lɛ̱̈ɛ̱̈ in ŋuaandiɛn in tëk liŋ, wëë i̱, “Bër!”

⁸ Kä cua guic, kä nɛnɛ, tëëkɛ jio̱k tuɔ̱ruɔ̱k mi yian, kä cɔalkɛ ciöt raam min kɔt jɛ i̱ “Lia̱a̱”, kä guɔ̱ɔ̱rkɛ jɛ ɛ Ro̱l jɔɔkni. Kä cua kɛ ka̱m lua̱ŋ kɛ ɣöö ba kɛl ŋuaani kä ji̱ wec muɔ̱ɔ̱n näk kɛ ko̱r, kɛnɛ buɔth, kɛ liaw, kɛnɛ ley dɔaar.

⁹ Kä mëë cɛ di̱i̱l in dhieecdiɛn lɛp, cua tieyni nɛɛni ti ca näk kɛ kui̱ latdiɛn kɛ ruac Kuɔth kɛnɛ kui̱ nenädiɛn nɛn thaar yi̱kä.

¹⁰ Cukɛ wak kɛ jɔw mi di̱i̱t i̱, “Kuoth in Leny Buɔ̱mdɛ ti Diaal Kuäär ni Kuoth, min rɛl gɔɔydu rɔ, kä thuɔ̱k, ɛ gua̱a̱th mi ni̱n di ɛn nin bi luk ni ji̱ wec muɔ̱ɔ̱n, kä bi col ni riɛmda kä kɛ mɔ?”

¹¹ Kä ca ramɔ kä kɛ moc kɛ bi̱i̱ mi bo̱r, kä cua kɛ jiök kɛ ɣöö bikɛ lɔ̱ɔ̱ŋ kɛ gua̱a̱th mi bär kä tɔt, amäni mi wa̱a̱ pek ji̱ la̱t kɛ̈ɛ̈liɛn kɛnɛ dämanikiɛn näk kɛn diaal, ce̱tkɛ mëë cakɛ näk.

¹² Kä mëë cɛ di̱i̱l in bäkɛliɛn lɛp, cua guic, kä nɛnɛ, cuɛ tekɛ lath piɛny mi di̱i̱t. Kä cu cäŋ cuɔl ce̱tnikɛ bi̱i̱ cuaalä mi ca̱r, kä cu pay kɛɛliw tiɛth ce̱tkɛ riɛm.

¹³ Kä cu cier nhial pën ce̱tkɛ dɛy ŋɔa̱a̱p mi ca yɔ̱k ɛ jiɔam.

¹⁴ Kä cu pua̱a̱r riaw ce̱tkɛ ko̱l gɔ̱rä mi ci rɔ riy, kä cua pääm kɛnɛ dhuɔ̱li diaal woc gua̱thnikiɛn.

¹⁵ Kä ɛnɔ kua̱r wec muɔ̱ɔ̱n kɛnɛ ruëëc, kɛ bööth rɛ̈m kɛnɛ nɛy tin riäŋ, kɛ nɛy tin buɔ̱m buɔ̱ɔ̱m, amäni nɛy diaal, kuany kiɛ ram mi lɔr, cukɛ rɔ tɛ̱̈ɛ̱̈ kɔ̱a̱kni päämni, kɛnɛ kam päämni.

¹⁶ Kä cukɛ pääm cɔl i̱, “Pɛ̈nɛ wi̱i̱da, kä tɛ̱̈ɛ̱̈ ɛ kɔ nhiam raam in nyuur kɔam kuäärä, kɛnɛ waŋ lɔaac Ruath Dɛ̈ɛ̈l.

¹⁷ Kɛ ɣöö ci cäŋ waŋä lɔaacdiɛn in di̱i̱t cop, kä ɛŋa mi dee jɛ rut?”