Nyuuth 22 - RUAC KUƆTH IN RƐL RƆ

Kir teekä

¹ Kä cu jääk nhial ɣä nyuɔ̱th kir pi̱i̱ni teekä ti wi̱er wi̱eer ce̱tkɛ neen, mi bä lönydɛ kɔm Kuɔth kɛnɛ Ruath Dɛ̈ɛ̈l,

² wëë kɛ där caarä wec. Kä kui̱ni kiɛɛr tëëkɛ jiath teekä mi kui̱r kɛ dɛy nikä wäl wi̱cdɛ rɛw kɛ ruɔ̱n, kuiirɛ dɛykɛ kɛ pay. Kä ji̱th jiaath bikɛ döör jakä gɔw.

³ Bɛ thil duɔ̱ɔ̱r mi ca bit mi bi te thi̱n. Kä bi kɔm Kuɔth kɛnɛ Ruath Dɛ̈ɛ̈l te thi̱n, kä bi ja̱a̱ŋkɛ jɛ pal.

⁴ Bikɛ waŋdɛ nɛn, kä bi ciötdɛ te nhiam kaandiɛn.

⁵ Bɛ cu thil wäär. Kä /ci naath buay lɛmbärä kiɛ cäŋ bi lɛ go̱r, kɛ ɣöö bi Kuäär ni Kuoth a buaydiɛn, kä bikɛ ruëc a thil pek.

Ben Yecu

⁶ Kä cu jääk nhial ɣä jiök i̱, “Kɛn rieet ti̱ti̱ ro̱ŋkɛ kɛ ŋa̱th, kä kɛ thuɔ̱ɔ̱k, kɛ ɣöö bi Kuäär ni Kuoth yieeni göökni jääk nhialɛ ja̱k kɛ ɣöö bɛ ja̱a̱ŋkɛ nyuɔ̱th min bi dhil tuɔɔk kɛ gua̱a̱th mi tɔt.”

⁷ “Kä nɛnɛ, bi ɣän mal ben! Puɔ̱th akɛ ram mi kääp rieet go̱o̱kä buɔk.”

⁸ Ɛ ɣän, Jɔ̱ɔ̱n, ɛn min ci ŋɔaani ti̱ti̱ liŋ kä cä kɛ nɛn. Kä mëë cä kɛ liŋ kä cä kɛ nɛn, cua rɔ yuɔr piny ciökni jääkä nhial min nyuth kɛ ɣä kɛ ɣöö dëë jɛ pal.

⁹ Kä duundɛ ɣöö cuɛ ɣä jiök i̱, “/Cu mɔmɔ la̱t! Ɛ ɣän läät kɛ ji̱ kɛɛl yɛnɛ dämuɔɔri tin la göök, amäni nɛy tin ka̱pkɛ rieet buɔk ɛmɛ. Pal ni Kuoth!”

¹⁰ Kä cuɛ ɣä jiök i̱, “/Cu rieet go̱o̱kä buɔk ɛmɛ tey kä naath, kɛ ɣöö ci gua̱a̱th thia̱k.

¹¹ A läät jiäkni ŋot kɛ mi lätdɛ jiäkɛ, kä a gua̱n nyuɔɔni ŋot rɛy nyuɔɔnikɛ, kä a gua̱n cuŋni ŋot kɛ mi lätdɛ cuŋ, kä a ram mi rɛl gɔɔydɛ rɔ ŋot kɛ mi rɛl gɔɔydɛ rɔ.”

¹² “Kä nɛnɛ, bi ɣän mal ben, kä nööŋä cutdä mi bä cuɔl, bä ramɔ cuɔ̱l mi ro̱ŋ kɛ la̱tdɛ.

¹³ Ɛ ɣän Nhiam, kä ɛ ɣän Jɔk, ɛ ɣän jio̱l, kä ɛ ɣän gik, ɛ ɣän tuk kä ɛ ɣän pek.”

¹⁴ Nɛy tin lakɛ bieynikiɛn ca kɛ poth, kɛ ɣöö dee kɛ tekɛ cuɔ̱ɔ̱ŋ kɛ mi̱eth jiath teekä, kɛnɛ ɣöö dee kɛ wä rɛy wec kɛ thukɛ.

¹⁵ Kä te ni jio̱o̱k kɛnɛ ti̱t, kɛ lëër kɛnɛ na̱a̱k nath, kɛ ji̱ palä kuthni jiɛn, kɛ nɛy diaal tin nhɔakɛ ciaŋ kacä raar wec.

¹⁶ “Ɛ ɣän, Yecu, ci jääkdä jäkä ji̱ mɔ kɛ ruac ɛmɛ kɛ kui̱ duëli Kuɔth. Ɛ ɣän cuut, kä ɛ ɣän kaar Dee-bid in la cier bakä.”

¹⁷ Cu Yiëë Kuɔth kɛnɛ kaw wee i̱, “Bër.” Kä a ram mi li̱ŋ wee i̱, “Bër.” Kä a ram mi näk rɛw ɛ bëë. Kä a ram mi go̱o̱r pi̱ teekä kän kɛ ala muc.

Riet in jɔak

¹⁸ Ɣän luëëkä nɛy diaal tin liɛŋkɛ ruaacni go̱o̱kä tin te rɛy buɔk ɛmɛ. Mi tëëkɛ ram mi wä duɔ̱ɔ̱r mat thi̱n, bi Kuoth ɛ ma̱t rik tin ca lat rɛy buɔk ɛmɛ.

¹⁹ Kä mi tëëkɛ ram mi wä rieet woc rɛy buɔk ruaacni go̱o̱kä ɛmɛ, bi Kuoth kui̱dɛ woc kä jiath teekä kɛnɛ wec in rɛl gɔɔydɛ rɔ, tin ca lat rɛy buɔk ɛmɛ.

²⁰ Ram min lat ŋɔaani ti̱ti̱, laarɛ jɛ i̱, “Ɛpuc bä mal ben.” Inɔnɔ. Ku ben, Kuäär ni Yecu!

²¹ A puɔ̱th Kua̱r ni Yecu tekɛ nɛy diaal tin ci Kuoth kɛ lɛy. Inɔnɔ.