Nyuuth 21 - RUAC KUƆTH IN RƐL RƆ

Nhial kɛnɛ piny ti pay cak

¹ Kä ɛnɔ cua nhial kɛnɛ piny mi pay cak nɛn. Kɛ ɣöö ci nhial kɛnɛ piny tëë nhiam thuuk, kä ci bar thil.

² Kä cua wec Jɛ-ru-tha-lɛm in rɛl rɔ min pay la̱t nɛn, bëë piny nhial kä Kuoth a ca rialikä ce̱tkɛ kaw mi ci rɔ pik kɛ yio̱w kɛ kui̱ cɔaadɛ.

³ Kä cua jɔw mi di̱i̱t mi bëë kä kɔm kuäärä liŋ, wëë i̱, “Nɛnɛ, te gua̱a̱th ciɛŋä Kuɔth kɛɛl kɛ naath. Bɛ cieŋ kɛɛl kɛ kɛ ala Kuothdiɛn, kä bikɛ a nɛɛkɛ, kä bi Kuoth puɔ̱nydɛ te kɛɛl kɛ kɛ.

⁴ Kä bɛ mer nyinkiɛn diaal poc. Kä bɛ cu thil lia̱a̱, kɛnɛ pa̱r, kɛ wiee, kɛnɛ bɛ̈c pua̱ny, kɛ ɣöö ci ŋɔaani tëë kɔn thuuk.”

⁵ Kä cu ram min nyuur wi̱i̱ kɔam kuäärä wee i̱, “Nɛnɛ, payä ŋɔaani diaal la̱t agɔaa.” Kä jɛn bä cuɛ wee i̱, “Gɔ̱r mɛmɛ, kɛ ɣöö rieet ti̱ti̱ kɛ thuɔ̱ɔ̱k kä dëë kɛ ŋäth.”

⁶ Kä cuɛ ɣä jiök i̱, “Ca jɛ la̱t! Ɛ ɣän Nhiam, kä ɛ ɣän Jɔk, ɛ ɣän tuk, kä ɛ ɣän pek. Kä nɛy tin näk rɛw kɛ bäkɛ moc pi̱ kä lo̱o̱l pi̱i̱ni teekä ala muc.

⁷ Nɛy ti wä tiëm bikɛ ti diaal ti̱ti̱ guäl. Bi ɣän a Kuothdiɛn, kä bi kɛn a gaatkä.

⁸ Kä kɛ kui̱ nɛɛni ti dual duaal, ti thil ŋa̱th, kɛ ji̱ nyuɔɔni kɛnɛ na̱a̱k nath, kɛ lëër, kɛnɛ ti̱t, kɛ pa̱a̱l kuthni jiɛth, kɛnɛ ji̱ ka̱a̱cni diaal, bi gua̱a̱thdiɛn a bar maac mi pɛt kɛ wäl mi kɛc ŋuänydɛ min la lia̱a̱ in rɛwdɛ.”

Jɛ-ru-tha-lɛm mi pay cak

⁹ Kä cu ram kɛl kä ja̱a̱k nhial da̱ŋ bärɔw tin tekɛ thääk da̱ŋ bärɔw ti ci thia̱ŋ kɛ liaw tin jɔak da̱ŋ bärɔw ben kä ɣä, wëë i̱, “Bër, bä ji̱ nyuɔ̱th kaw, in la ciek Ruath Dɛ̈ɛ̈l.”

¹⁰ Rɛy yieekä cuɛ ɣä naŋ wi̱i̱ pa̱a̱m mi di̱i̱t mi bäär, kä cuɛ ɣä nyuɔ̱th wec Jɛ-ru-tha-lɛm mi rɛl rɔ bëë piny nhial kä Kuoth.

¹¹ Kä jaŋɛ kɛ gɔɔy Kuɔth. Ce̱t buaydɛ kɛ guɛɛy mi gɔaa mi bum jekdɛ, kä puɔthɛ ce̱tkɛ neen mi jaŋ jaŋ.

¹² Tëëkɛ päny mi di̱i̱t mi bäär mi tekɛ thuk da̱ŋ wäl wi̱cdɛ rɛw, kä te ja̱a̱k nhial da̱ŋ wäl rɛw thuknikɛ, kä ca ciööt gan I-thɛ-rɛl da̱ŋ wäl wi̱cdɛ rɛw gɔ̱a̱r puɔ̱ɔ̱ny thiekni.

¹³ Kä te kui̱ känyä ca̱ŋ kɛ thuk diɔ̱k, kɛ kui̱ caam kɛ thuk diɔ̱k, kɛ kui̱ cuëëc kɛ thuk diɔ̱k amäni kony ca̱ŋ tëë kɛ thuk diɔ̱k bä.

¹⁴ Kä ca päny wec cuŋ wi̱i̱ päämni da̱ŋ wäl wi̱cdɛ rɛw, kä ca ciööt ja̱a̱kni Ruath Dɛ̈ɛ̈l da̱ŋ wäl wi̱cdɛ rɛw gɔ̱r thi̱n.

¹⁵ Kä ɛn jääk nhial in ruac kɛ ɣä tëëkɛ theem kɛɛtdä dääpä mi bɛ thɛm ni wec kɛnɛ thukɛ, kɛ pänydɛ.

¹⁶ Kä kui̱c wec diaal pärkɛ, päär bärɛ kɛnɛ ɣäp ɣääpdɛ. Mëë cɛ wec thɛm kɛ kɛɛtdɛ cuɛ jek tëëkɛ ki̱lu mi̱ti̱ri ti bathdɔɔri rɛw wi̱cdɛ kur da̱ŋ ŋuaan, päär bärɛ kɛnɛ ɣäp ɣääpdɛ kɛ bärɛ wädɛ nhial.

¹⁷ Mëë cɛ pänydɛ thɛm bä, cuɛ jɛ jek i̱ kɛ jua̱th tetni ti kuɔ̱r kɛl wi̱cdɛ jiɛn ŋuaan wi̱cdɛ ŋuaan kɛ pek thëm ran, min them kɛ jääk nhial.

¹⁸ Kä ca pänydɛ la̱t kɛ pääm ti jaŋ jaaŋ, kä wec puɔ̱nydɛ ɛ da̱a̱p mi lɛy lɛy mi ce̱tkɛ neen.

¹⁹ Cuɔ̱ɔ̱ŋ pa̱a̱ny wec ca kɛ biɛl kɛ guiy diaal ti di̱t kökdiɛn, min nhiam kɛ guiy ti jaŋ jaaŋ, rɛwdɛ kɛ guiy ti yiël, diɔ̱ɔ̱kdiɛn kɛ guiy ti riali, ŋuaandiɛn kɛ guiy ti tɔ̱ɔ̱c,

²⁰ kä dhieecdiɛn kɛ guiy ti ca̱a̱r, bäkɛliɛn kɛ guiy ti ma̱li ti gɔw, bärɔwdiɛn kɛ guiy ti col tɔ̱ɔ̱cdiɛn, bädäkdiɛn kɛ guiy ti duäy, bäŋuandiɛn kɛ guiy ti tuɔkni, wäliɛn kɛ guiy ti buɔy tɔ̱ɔ̱cdiɛn, wälkɛliɛn kɛ guiy ti thiääŋ, wälrɛwdiɛn kɛ guiy ti ya̱ni.

²¹ Kä ca thiekni da̱ŋ wälrɛw la̱t kɛ dɔ̱a̱kni da̱ŋ wälrɛw. Ca thi̱i̱kɔ la̱t kɛ dɔ̱k kɛl, kä ca caar la̱t kɛ da̱a̱p mi lɛy lɛy mi ce̱tkɛ neen.

²² Kä cuɛ thil luak Kuɔth mi cua̱ nɛn rɛy wec, kɛ ɣöö luak Kuɔthdɛ ɛ jɛn Kuäär ni Kuoth in Leny Buɔ̱mdɛ ti Diaal, kɛnɛ Ruath Dɛ̈ɛ̈l.

²³ Kä /ci wec buay ca̱ŋ kɛnɛ pay lɛ go̱r, kɛ ɣöö gɔɔy puɔnyä Kuɔth ɛ jɛn la buaydɛ mɔ, kä lɛmbärɛ ɛ Ruath Dɛ̈ɛ̈l.

²⁴ Bi döör diaal ja̱l kɛ buaydɛ, kä bi kua̱r wec muɔ̱ɔ̱n wuɔ̱tdiɛn nööŋ rɛydɛ.

²⁵ /Ca thukɛ bi met gäk kɛ cäŋdäär, kä bɛ thil wäär ɛn wi̱ni.

²⁶ Kä bi naath wuɔ̱t kɛnɛ luth dööri diaal nööŋ rɛydɛ.

²⁷ Kä thilɛ duɔ̱ɔ̱r mi jiääk mi bi wä rɛydɛ, kiɛ ram mi lät nyuɔɔn, kiɛ ka̱a̱cni, ɛ ni nɛy tin ca ciöötkiɛn gɔ̱a̱r rɛy buɔk teekä Ruath Dɛ̈ɛ̈l.