Nyuuth 20 - RUAC KUƆTH IN RƐL RƆ

Run ti bathdɔɔr

¹ Kä cua jääk Kuɔth mi bëë piny nhial nɛn a te tetdɛ kɛ leep kɔ̱kä mi thil piny, kɛnɛ kuat mi dho̱k dho̱k.

² Kä cuɛ nyaŋ käp, ala thɔ̱l ëë wal, min la Gua̱n Jiäkni kiɛ Cɛy-tan, kä cuɛ jɛ yian kɛ run ti bathdɔɔr kɛl.

³ Kä cuɛ jɛ yuɔr rɛy kɔ̱kä, kä cuɛ jɛ gäk kä thanyɛ wi̱cdɛ thi̱n, kɛ ɣöö /cɛ döör bi nyɔk kɛ mɛtni amäni mi ci run ti bathdɔɔr kɛl thuɔ̱k. Kɛ kɔr kä mɛmɛ ba jɛ dhil lony kɛ gua̱a̱th mi tɔt.

⁴ Kä cua kɔamni kuäärä nɛn, kä nɛy tin nyuur thi̱n cakɛ ka̱m lua̱ŋ luɔ̱ɔ̱kni. Kä cua tiey nɛɛni ti ca näk kɛ kui̱ nenädiɛn kɛ Yecu kɛnɛ ruac Kuɔth nɛn bä. Kɛ nɛy tin /ka̱n ley pal kiɛ cätdɛ, kä /ka̱n biɛlɛ la̱th nhiam kaandiɛn kiɛ tetnikiɛn. Cukɛ rɔ̱ nyɔk kɛ tëk, kä cukɛ ruëc kɛɛl kɛ Kritho kɛ run ti bathdɔɔr kɛl.

⁵ (/Ken duɔth nɛɛni tin kɔ̱kiɛn rɔ̱ nyɔk kɛ tëk amäni mëë ci run ti bathdɔɔr kɛl thuɔ̱k.) Mɛmɛ ɛ jɛn jio̱l jiecä nath li̱th.

⁶ Tɛ̈th lɔaac kɛnɛ puɔ̱th mi di̱i̱t akɛ nɛy tin te rɛy nɛɛni tin ca rɔ̱ jiɛc li̱th kɛ nhiam. Kɛ kui̱ nɛɛni tɔ̱tɔ̱, thil lia̱a̱ in rɛwdɛ lua̱ŋ kɛ kɛ, bikɛ a bööth palä Kuɔth kɛnɛ Kritho, kä bikɛ ruëc kɛ jɛ kɛɛl kɛ run ti bathdɔɔr kɛl.

Juc Cɛy-tan

⁷ Kä mi wä run ti bathdɔɔr kɛl thuɔ̱k, ba Cɛy-tan lony yieenä,

⁸ kä bɛ ben kɛ ɣöö bɛ döör ben mɛ̈t tin te pekni ɣɔaa da̱ŋ ŋuan, ala ji̱ Gog kɛnɛ Ma-gog, kɛ ɣöö bɛ kɛ dol kɛ kui̱ köör. Kä ce̱t pekdiɛn kɛ liɛt bar.

⁹ Kä cukɛ ja̱l wi̱i̱ muɔ̱ɔ̱n ɛ di̱i̱t ɛmɛ, kä cukɛ wec nɛɛni tin ci Kuoth kɛ lɛy kɛnɛ wec in nhɔakɛ göl piny. Kä cu mac ben piny nhial kä Kuoth, kä cuɛ kɛ waŋ.

¹⁰ Kä cua gua̱n jiäkni min cikɛ mɛt yuɔr bar maac kɛnɛ wäl mi kɛc ŋuänydɛ, gua̱a̱th in te ley kɛnɛ gök in gua̱n kacä thi̱n, kä bakɛ moc ti bɛ̈c bɛ̈ɛ̈c kɛ cäŋ kɛnɛ wäär a thil pek.

Luk in jɔak

¹¹ Kä cua kɔm kuäärä mi bo̱r mi di̱i̱t kɛnɛ ram in nyuur thi̱n nɛn, kä cu piny kɛnɛ nhial rɔ̱ bar nhiamdɛ, kä cuɛ thil gua̱a̱th kɛ kui̱diɛn.

¹² Kä cua nɛy ti ci li̱w nɛn, nɛy tin di̱t kɛnɛ tin tɔatni, cuŋkɛ nhiam kɔam kuäärä, kä ca buɔkni lëëp. Ca bok dɔ̱diɛn min la bok teekä lɛp bä. Kä cua nɛy tin ci li̱w luk ce̱tkɛ lätkiɛn tëë ca gɔ̱a̱r rɛy buɔkni.

¹³ Cu bar nɛy tin ci li̱w rɛydɛ thöp, kä cu Lia̱a̱ kɛnɛ Ro̱l Jɔɔkni nɛy tin ci li̱w rɛydiɛn thöp, kä ca kɛn diaal luk kɛ kui̱ kä tëë ci kɛn kɛ la̱t.

¹⁴ Kä ɛnɔ cua Lia̱a̱ kɛnɛ Ro̱l Jɔɔkni yuɔr bar maac. Jɛn bar maac ɛmɛ ɛ lia̱a̱ in rɛwdɛ.

¹⁵ Kä ram mi /ka̱n ciötdɛ ran jek a ca gɔ̱r rɛy buɔk teekä, ca jɛ yuɔr bar maac.