Nyuuth 2 - RUAC KUƆTH IN RƐL RƆ

Wä thuɔk kä Ɛ-pɛ-thäth

¹ “Gɔ̱ri mɛmɛ jääk nhial in te dueel Kuɔth kä Ɛ-pɛ-thäth, ‘Ti̱ti̱ kɛ kɛn rieet raam in kääp kuɛl da̱ŋ bärɔw kɛ tet cuëëcdɛ, kä jäl kam cuuŋni lɛmbärni dääpä da̱ŋ bärɔw.

² “ ‘Ɣän ŋa̱cä lätkun, kɛ buɔ̱m läätädun kɛnɛ li̱epdun bitdä. Kä ɣän ŋa̱cä ɣöö /cia nɛy ti jiäk nhɔk rɛydun. Ci yɛn nɛy tin cɔalkɛ rɔ̱ i̱ jaak, kä /ci tɔ̱ a jaak ɣɔ̱n, kä cia kɛ jek ɛn ɣöö kɛ ji̱ kacä.

³ Kä ŋa̱cä jɛ bä ɛn ɣöö ta̱yɛ kɛ ruɔ̱t biɛtdä kä cia cuuc kɛ kui̱ cio̱tädä, kä /ka̱nɛ ŋɔa̱a̱ŋ.

⁴ Kä dɛ̈ɛ̈cä mɛmɛ kä yɛ, kɛ ɣöö cia nhök ëë tekɛ yɛ kɛ nhiam päl.

⁵ Kɛ kui̱ ɛmɛ tiɛmɛ pɛ̈ɛ̈n ëë ci pɛ̈ɛ̈n kɛ yɛ. Rietdɛ rɔ̱ kä jiäkun, kä la̱tdɛ lät tëë cia la̱t kɛ nhiam. Kä mi /ci yɛn rɔ̱ bi ri̱t, ɣän bä cuuŋ lɛmbärädun woc guäthdɛ, ɛ ni mi cia rɔ̱ ri̱t kä jiäkun.

⁶ Kä min gɔaa kä yɛ, ɛ ɣöö lo̱k yɛn lät ji̱ Ni-ko-läth tin lökä bä.

⁷ Ram mi tekɛ ji̱th, a jɛ liŋ min lär Yiëë Kuɔth ɛ duël Kuɔth. Ram mi ci naath joc bä jɛ jakä mi̱th kä jiath teekä min te rɛy kakä wal Kuɔth.’ ”

Wä thuɔk kä Thɛ-mer-na

⁸ “Kä gɔ̱ri nɛmɛ jääk nhial in te dueel Kuɔth kä Thɛ-mer-na i̱, ‘Ti̱ti̱ kɛ rieet raam in jio̱l kä ram in jɔak, mëë ci li̱w kä ci rɔ nyɔk kɛ tëk i̱,

⁹ “ ‘Ɣän ŋa̱cä riɛkdun kɛnɛ dakdun a cäŋ riäŋ yɛn bä. Kä ŋa̱cä guɛɛr nɛɛni tin wee i̱ kɛ ji̱ Juudh, kä /cikɛ ji̱ Juudh, nɛy ti cieŋ Cɛy-tan rɛydiɛn.

¹⁰ /Cuarɛ dual kɛ mɔ bi yɛ jak kä cuc ɔ. Nɛ̈nɛ jɛ, go̱o̱r gua̱n jiäkni ɣöö bɛ tha̱a̱ŋkun naŋ dueel yieenä, kɛ ɣöö dëë yɛ ɣɔ̱n, kä bia tekɛ rikɛ kɛ ni̱n da̱ŋ wäl. Ka̱pɛ ŋa̱thdun a bum amäni lia̱a̱, kä bä yɛ ka̱m kum teekä.

¹¹ Kä ɛ ram mi tekɛ ji̱th, a jɛ liŋ min lär Yiëë Kuɔth ɛ duël Kuɔth. Kä ram ɔ bi tiëm ɔ /ca jɛ bi näk ɛ lia̱a̱ in rɛwdɛ.’ ”

Wä thuɔk kä Per-ga-mäm

¹² “Kä gɔ̱ri nɛmɛ jääk nhial in te dueel Kuɔth kä Per-ga-mäm i̱, ‘Ti̱ti̱ kɛ rieet raam in te thɛp in moth kui̱ni da̱ŋ rɛw i̱,

¹³ “ ‘Ɣän ŋa̱cä gua̱a̱th in ciëŋɛ thi̱n, gua̱a̱th in te kɔm kuäärä Cɛy-tan thi̱n. Kä ŋotdɛ rɔamɛ ciötdä, kä /ken yɛn ŋa̱thdun kɛ ɣä gak, a cäŋɛ ni ni̱n tëë ca An-ti-path neendä min ŋa̱a̱thä näk rɛydun, guäth in ciëŋ Cɛy-tan thi̱n.

¹⁴ Kä duundɛ ɣöö ɣän ta̱a̱kɛ ti tɔt ti dɛ̈ɛ̈cä kä yɛ. Tëë tha̱a̱ŋkun ɛn wi̱ni ti ka̱pkɛ ŋi̱i̱c Bil-am, mëë ŋi̱i̱c Ba-lak kɛ ɣöö bɛ ji̱ I-thɛ-rɛl jakä la̱tkɛ duer, kɛ mi̱ethdiɛn kɛ mi̱th ti ca thöp kuth jiɛn, kɛnɛ ɣöö bikɛ la̱t leerä la̱t.

¹⁵ Inɔ bä te yɛn kɛ tha̱a̱ŋkun ti guɔ̱ɔ̱rkɛ ŋi̱i̱c ji̱ Ni-ko-läth.

¹⁶ Kɛ kui̱ ɛmɔ, rietdɛ rɔ kä jiäkun. Kä mi /ciɛ jɛn, bä ben kä yɛ kɛ pɛ̈th, kä bä ben nyiëëny kɛ kɛ kɛ thɛp thuɔkdä.

¹⁷ Kä ɛ ram mi tekɛ ji̱th, liŋ min lär Yiëë Kuɔth ɛ duël Kuɔth. Kä ram ɔ bi tiëm ɔ bä jɛ ka̱m tha̱a̱ŋ mana mi ca tɛ̱̈ɛ̱̈, kä bä jɛ ka̱m päm mi bo̱r, mi tekɛ ciöt mi pay gɔ̱a̱r thi̱n, kä thilɛ ram mi ŋäc jɛ ɛ ni ram in ci jɛ jek.’ ”

Wä thuɔk kä Thay-tay-ra

¹⁸ “Kä gɔ̱ri nɛmɛ jääk nhial in te dueel Kuɔth kä Thay-tay-ra i̱, ‘Ti̱ti̱ kɛ rieet Gatdä Kuɔth, min tekɛ wäŋ ti bo̱l ce̱tkɛ mac, kä ce̱t ciökɛ kɛ ciɛk in yian mi ca toth.

¹⁹ “ ‘Ɣän ŋa̱cä lätkun, nhökdun, ŋa̱thdun kɛnɛ ciaaŋ la̱tdun, amäni ruɔ̱tdun kɛ ŋɔaani bitdä. Kä ŋa̱cä jɛ ɛn ɣöö lätkun tin jɔak lënykɛ lät tëë nhiam.

²⁰ Kä dɛ̈ɛ̈cä nɛmɛ kä yɛ, ɛn ɣöö cia I-dhɛ-bɛl pa̱l ŋi̱i̱cdɛ, ɛn ciek in cɔl rɔɔdɛ i̱ gök. Cɛ nɛɛkä mɛt, kɛ ŋi̱i̱cdɛ kɛ ɣöö bikɛ nyin leerä la̱t kɛnɛ mi̱ethdiɛn kɛ mi̱th ti ca thöp kuth jiɛn.

²¹ Ɣän cä jɛ moc gua̱a̱th kɛ ɣöö bɛ rɔ ri̱t kä jiäkɛ, kä duundɛ ɣöö lo̱kɛ riet kɛ rɔ kä leerɛ.

²² Nɛnɛ, bä jɛ moc kɛ juey, kä bä nɛy tin ca nyin leerä kɛ la̱t jɛ kɛɛl yuɔr rɛy rikä mi bɛc bɛc. Ɛ ni mi pa̱lkɛ lätkɛ tin jiäk.

²³ Kä bä gaatkɛ näk. Kä bi duël Kuɔth diaal ɛ ŋa̱c ɛn ɣöö ɛ ɣän ram mi go̱o̱r ni lɔc ran kɛnɛ ca̱rɛ. Kä bä ram ɔ cuɔ̱l min lat rɔ kɛ lätkun.

²⁴ Kä kɛ kui̱dun, yɛn nɛy tin te kä Thay-tay-ra tin /ka̱nɛ ŋi̱i̱c ɛ jiääk ɛmɛ guɔ̱ɔ̱r, yɛn /ka̱n nɛmɛ ŋa̱c min cɔɔl nɛy tin kɔ̱ŋ jɛ i̱ “pɛl Cɛy-tan,” ɣän cä lar ɛn ɣöö /cä yɛ bi lɛ moc riɛk dɔ̱diɛn.

²⁵ Ka̱pɛ min tekɛ yɛ a bum, amäni mi cä luny jɔk.

²⁶ Ram mi ti̱em kä lät lätkä amäni guut ɣɔaa, ɣän bä jɛ ka̱m lua̱ŋ wi̱i̱ dööri.

²⁷ Kä bɛ kɛ ruac kɛ kɛɛt yieethä, ce̱tkɛ dha̱a̱ri muɔ̱ɔ̱n ti ci tiath.

²⁸ Kä ɛ jɛn buɔ̱m ëë ca ka̱m ɣä ɛ Gua̱a̱r. Kä ram ɔ wä tiëm ɔ bä jɛ ka̱m cier bakä.

²⁹ Ram mi tekɛ ji̱th, a jɛ liŋ min lär Yiëë Kuɔth ɛ duël Kuɔth.’ ”