Nyuuth 19 - RUAC KUƆTH IN RƐL RƆ

Tɛ̈th lɔaac nhial

¹ Kɛ kɔr kä mɛmɛ cua mi ce̱tkɛ jɔw bunä nɛɛni ti ŋuan liŋ nhial, wäkɛ i̱, “Liaknɛ Kuoth! Ka̱n kɛnɛ puɔny kɛ buɔ̱m kɛ nyin Kuothdan,

² kɛ ɣöö luɔ̱ɔ̱kɛ kɛ thuɔ̱ɔ̱k, kä kɛ cuŋ, cɛ ler in di̱i̱t luk, min ci wi̱c muɔ̱ɔ̱n ya̱r kɛ ciaŋ leerädɛ, kä cɛ riɛm la̱a̱tnikɛ col.”

³ Kä cukɛ rɔ lɛni nyɔk i̱, “Liaknɛ Kuoth! Kɛ ɣöö wä tol ciëk nhial a thil pek.”

⁴ Kä cu di̱t ti jiɛn da̱ŋ rɛw wi̱cdɛ ŋuaan, kɛnɛ ley da̱ŋ ŋuaan tin tëk rɔ yuɔr piny palkɛ Kuoth in nyuur wi̱i̱ kɔam kuäärä, wäkɛ i̱, “Inɔnɔ. Liaknɛ Kuoth!”

Gua̱a̱th mi̱thni kuën Ruath Dɛ̈ɛ̈l

⁵ Kä cu jɔw ben wi̱i̱ kɔam kuäärä Kuɔth, wee i̱, “Liakɛ Kuothdan, yɛn la̱a̱tkɛ diaal, yɛn nɛy tin luɔ̱thkɛ jɛ, tin tɔatni kɛnɛ tin di̱t.”

⁶ Kä cua jɔw mi ce̱tkɛ jɔw bunä nath mi di̱i̱t liŋ, ce̱tdɛ kɛ wuɔ̱w lo̱nyä pi̱i̱ni ti ŋuan, kɛnɛ gi̱eer ma̱a̱ri nhial mi di̱i̱t, wäkɛ i̱, “Liaknɛ Kuoth! Kɛ ɣöö ruec Kuäär ni Kuothdan in Leny Buɔ̱mdɛ ti Diaal.

⁷ A lo̱ckɔn tɛth, kä liaknɛ jɛ, kä ka̱mnɛ jɛ puɔny. Kɛ ɣöö ci kuën Ruath Dɛ̈ɛ̈l cop, kä ci nyam min kuɛɛnɛ rɔ rialikä.

⁸ Ca jɛ nhök ɣöö bɛ rɔ rony kɛ bieyni ti ca tak agɔaa ti bo̱o̱r,” kɛ ɣöö bieyni tin ca tak agɔaa kɛ lät cuŋni nɛɛni tin ci Kuoth kɛ lɛy.

⁹ Kä cu jääk nhial ɣä jiök i̱, “Gɔ̱r mɛmɛ. A puɔ̱th tekɛ nɛy tin ca cɔal guäth mi̱thni kuën Ruath Dɛ̈ɛ̈l.” Kä cuɛ ɣä jiök i̱, “Ti̱ti̱ kɛ rieet Kuɔth ti thuɔ̱ɔ̱k.”

¹⁰ Kä cua rɔ yuɔr piny ciöknikɛ kɛ ɣöö, bä jɛ pal, kä duundɛ ɣöö cuɛ ɣä jiök i̱, “/Cu mɔmɔ lät! Ɛ ɣän läät kɛ ji̱ kɛɛl yɛnɛ dämuɔɔri tin ka̱pkɛ ruac nenä Yecu. Pal ni Kuoth. Kɛ ɣöö ruac nenä min ci Yecu ɛ lat ɛ jɛn yiëë göökni.”

Ram in kɔt jio̱k tuɔ̱ruɔ̱k in bo̱r

¹¹ Kä ɛnɔ cua nhial nɛn cɛ rɔ lɛp, kä nɛnɛ, tëëkɛ jio̱k tuɔ̱ruɔ̱k mi bo̱r! Kä ram min ko̱t jɔkdɛ, cɔalɛ Ram mi Gɔaa, kä Thuɔ̱k jɛn la lukɛ kä tɛɛrɛ ko̱r kɛ cuɔ̱ɔ̱ŋ.

¹² Ce̱t nyinkɛ kɛ bo̱l maac, kä te wi̱cdɛ kɛ kuɔ̱mni kuäärä ti ŋuan. Kä tëëkɛ ciöt mi ca gɔ̱a̱r jɛ mi thil ram mi ŋäc jɛ, ɛ ni jɛn kärɔa.

¹³ Kä ca jɛ rony kɛ bi̱i̱ mi ca cua̱th rɛy riɛm, kä cɔalkɛ ciötdɛ i̱, “Ruac Kuɔth.”

¹⁴ Cu rɛm nhial ti ca rony kɛ bieyni ti puath puaath ti bo̱o̱r ti gɔw jɛ guɔ̱ɔ̱r kɛ jio̱o̱k tuɔ̱ruɔ̱k ti bo̱o̱r.

¹⁵ Kä bä thɛp mi moth moth raar thokdɛ mi bɛ näk ni döör, kä bɛ kɛ ruac kɛ kɛɛt yieethä. Kä bɛ kɔaŋ nhiac raar gua̱a̱th nhiecä dɛɛni wal kɛ ŋɛ̈ny waŋä lɔaac Kuɔth in Leny Buɔ̱mdɛ ti Diaal.

¹⁶ Kä tëëkɛ ciöt mi ca gɔ̱a̱r puɔ̱ny bieydɛ, kɛnɛ ɣämdɛ i̱, “Kuäär kua̱ri kä Rueec ruëëcni.”

¹⁷ Kä cua jääk Kuɔth nhial nɛn cuŋä rɛy ca̱ŋ, kä cɔɔlɛ diit nhial tin pär kɛ jɔw mi di̱i̱t i̱, “Bia, duɔlɛ rɔ kɛ kui̱ mi̱eth Kuɔth in di̱i̱t,

¹⁸ kɛ ɣöö bia ri̱ŋ kua̱ri ben cam, kɛnɛ ri̱ŋ kua̱ri rɛ̈m, kɛ ri̱ŋ wäthni köör, kɛ ri̱ŋ jiöŋkööri kɛnɛ ji̱kiɛn, kɛ ri̱ŋ nɛɛni diaal, nɛy tin lɔr kɛnɛ kuaany, nɛy tin tɔatni kɛnɛ tin di̱t.”

¹⁹ Kä cua ley kɛnɛ kua̱r wec muɔ̱ɔ̱n kɛ rɛmkiɛn nɛn ca rɔ̱ dol, kɛ ɣöö bikɛ ko̱r tɛr kɛ ram min ko̱t jɔk jiöök tuɔ̱ruɔ̱k, kɛnɛ rɛmdɛ.

²⁰ Kä cua ley käp kɛɛl kɛ gök mi gua̱n kacä min ci nyuuthni la̱t nhiamdɛ, tin mɛ̈tkɛ nɛy tin ca biɛl lɛ̱̈ɛ̱̈ jek kɛnɛ nɛy tin palkɛ cätdɛ. Kɛn rɛw ti̱ti̱ cua kɛ yuɔr yier maac mi waŋ kɛ wäl mi kɛc ŋuänydɛ a tëkɛ.

²¹ Kä ca tha̱a̱ŋkiɛn tin ci duɔth ŋuɔ̱t kɛ thɛp raam in ko̱t jɔk jiöök tuɔ̱ruɔ̱k, ɛ jɛn thɛp in bä raar thokdɛ. Kä cuɛ diit diaal ria̱ŋ kɛ mi̱eth ri̱i̱ŋkiɛn.