Nyuuth 18 - RUAC KUƆTH IN RƐL RƆ

Pɛ̈ɛ̈n Bɛ̈-bi-lɔn

¹ Kɛ kɔr kä mɛmɛ cua jääk nhial dɔ̱diɛn nɛn, mi bëë piny nhial, tëëkɛ lua̱ŋ mi di̱i̱t. Kä cuɛ piny mɛr kɛ gɔɔy buɔyädɛ.

² Kä cuɛ ciöt kɛ jɔw mi bum, wëë i̱, “Cɛ pɛ̈ɛ̈n, cɛ pɛ̈ɛ̈n, ɛn Bɛ̈-bi-lɔn in di̱i̱t! Cɛ la ni gua̱a̱th cieŋä kuthni ti jiäk, ɛ gua̱a̱th cieŋä din ti jiäk, kä ɛ gua̱a̱th leeyni diaal tin jiäk.

³ Kɛ ɣöö ci döör diaal yɔ̱ŋ kɛ kɔaŋ leerädɛ mi jiääk, kä ci kua̱r wec muɔ̱ɔ̱n leer la̱t kɛ jɛ, kä ci ji̱ ko̱kä wec muɔ̱ɔ̱n ria̱ŋ kɛ nyin leerädɛ.”

⁴ Kä cua jɔw dɔ̱diɛn mi bëë nhial liŋ, wëë i̱, “Bia raar kä jɛ, lö nɛɛkä, kɛ ɣöö /ci yɛn rɔ̱ bi mat dueerikɛ, kä /cia rɔ̱ bi mat rɛy riknikɛ,

⁵ kɛ ɣöö ca dueerkɛ duɔ̱l a räthkɛ ni nhial, kä ci Kuoth jiäkɛ tim.

⁶ La̱tdɛ jɛ kä mi ce̱tkɛ min cɛ lät kä yɛ, kä cuɔ̱lɛ jɛ ikä kä rɛɛw kɛ kui̱ lätnikɛ. Liömɛ jɛ kɔaŋ mi kɛc mi thiääŋ liɛɛr ëë la kämɛ yɛ.

⁷ Ce̱tkɛ min liakɛ rɔɔdɛ, kä cieŋɛ agɔaa, ka̱mɛ jɛ pek bɛcä mi päär kɛnɛ lul lɔaac. Kɛ ɣöö laarɛ jɛ kɛ lɔcdɛ i̱, ‘Ɣän, ruëcä ala kuäär ciëk. /Ci ɣän a ciek jɔkä, kä /ci lɔcdä bi met jiath.’

⁸ Kɛ kui̱c ɛmɔ, bi rikɛ ben kɛ cäŋ kɛl, liaw, kɛ pa̱r, kɛ buɔth, kä ba jɛ waŋ kɛ mac, kɛ ɣöö bum Kuäär ni Kuoth in luk jɛ.”

⁹ Kä bi kua̱r wec muɔ̱ɔ̱n, tin ca nyin leerä kä ci cieŋ agɔaa kɛ jɛ wiee ɛlɔ̱ŋ, kä bikɛ jɛ par mi wäkɛ tol waŋädɛ nɛn.

¹⁰ Kä bikɛ cuɔ̱ŋ nänä, kɛ ɣöö dualkɛ, kɛ ɣöö bikɛ cuɔ̱cdɛ nyuak, kä ɛ kɛn i̱, “Riɛk kua riɛk mi di̱t ɛ di! Lö wec mi di̱i̱t, Ji̱n wec Bɛ̈-bi-lɔn mi bum! Cu lukdu cu ben kɛ thaak kɛl.”

¹¹ Kä cu ji̱ ko̱kä wec muɔ̱ɔ̱n wiee kä parkɛ jɛ, kɛ ɣöö thilɛ ram mi kɔk kuakiɛn,

¹² thilɛ ram mi kɔk da̱a̱pdiɛn, kɛ ciɛk in bo̱r, kɛ guiy kɛnɛ dɔ̱a̱kni ti gɔw ɛlɔ̱ŋ, kɛ bieyni ti ca tak agɔaa, kɛ ti mɛ̈ri, kɛnɛ bieyni ti luaal, kɛ jiɛn diaal ti gɔw ŋuänydiɛn, kɛnɛ kuak diaal ti ca la̱t kɛ guɔ̱r, kɛ ti ca la̱t kɛ jiɛn ti di̱t kökdiɛn, kɛnɛ ciɛk in yian, kɛ yiëëth, amäni päm mi puɔth puɔth,

¹³ kɛ wal ti gɔw ŋuänydiɛn kɛ wal yi̱i̱rä, kɛnɛ wäl mi waŋkɛ, kɛ kɔaŋ, kɛnɛ liɛɛth, kɛ do̱o̱k kɛnɛ bɛl, kɛ ɣɔ̱k kɛnɛ rɔɔm, kɛ jio̱o̱k tuɔ̱ruɔ̱k kɛnɛ thurbiɛɛli ti yɔ̱a̱ckɛ, kɛ kuaany, tin la nɛy ti tëk.

¹⁴ Kä bi ji̱ ko̱kä jɛ jiök i̱, “Ci dɛy tin go̱o̱r lɔcdu kɛ jiɛɛn kä ji̱, kä ci nyinku tin gɔw diaal kɛnɛ gɔɔydu cu bath kä ji̱, kä /cakɛ bi nyɔk kɛ jek.”

¹⁵ Ji̱ ko̱kä ti̱ti̱ tin ca ria̱ŋdiɛn jek ɛn wi̱c, bikɛ cuɔ̱ŋ nänä, kɛ dual kä ɣöö bikɛ cuɔ̱cdɛ nyuak, wiee kä bikɛ pa̱r kɛ jɔw mi di̱i̱t i̱,

¹⁶ “Riɛk kua riɛk mi di̱t ɛ di, kɛ kui̱ wec in di̱i̱t, mi ca rony kɛ bieyni ti ca tak agɔaa, ti mɛ̈ri kɛnɛ ti luaal, kä ca jɛ pik kɛ da̱a̱p, kɛnɛ guiy ti gɔw, kɛ dɔ̱a̱kni ti gɔw!

¹⁷ Ca ria̱ŋ ɛmɛ kiɛth dɔɔr kɛɛliw kɛ thaak kɛl!” Kä bi kua̱r babuuri diaal, kɛ ja̱a̱l, kɛ la̱a̱t babuuri, kɛ nɛy diaal tin kɔ̱ŋ tin jëkɛ mi̱ethdiɛn rɛy bar, cukɛ cuɔ̱ŋ nänä.

¹⁸ Kä cukɛ wiee mëë cikɛ tol waŋädɛ nɛn wäkɛ i̱, “Ɛ wec in mith ce̱tkɛ wec in di̱i̱t ɔ?”

¹⁹ Kä cukɛ tup yuɔr wuɔ̱thnikiɛn min wieekɛ kä pärkɛ, kä wieekɛ kɛ jɔw mi di̱i̱t, wäkɛ i̱, “Riɛk kua riɛk mi di̱t ɛ di, lö wec in di̱i̱t, gua̱a̱th in ci ji̱ babuuri rɛy bar ria̱ŋ jek kä jɛ! Ca jɛ däk kɛ thaak kɛl!

²⁰ A lɔcdu tɛth kɛ kui̱dɛ, lö nhial, yɛn nɛy tin ci Kuoth kɛ lɛy, kɛ ja̱a̱k kɛnɛ göök! Kɛ ɣöö ci Kuoth ɛ kuɛth kɛ kui̱ kä min cɛ lät kä yɛ.”

²¹ Kä cu jääk nhial mi bum päm mi ce̱tkɛ päm gua̱r mi di̱i̱t ka̱n, kä cuɛ jɛ yuɔr rɛy bar, wëë i̱, “Ce̱tkɛ ɛnɔ ba Bɛ̈-bi-lɔn wec in di̱i̱t yuɔr piny, kä /ca jɛ bi nyɔk kɛ jek.

²² Kä /ca jɔw pua̱a̱tni thuɔmni, kɛ këët din, kɛ kuɔ̱ɔ̱th kaaŋni, bi met li̱eŋ rɛydu. Kä /ca bël mi lät ti diaal bi nyɔk kɛ jek rɛydu, kä /ca jɔw piɛl pa̱a̱m bi met liŋ rɛydu.

²³ /Ci buay lɛmbärä bi met jɔɔc rɛydu. Kä /ca jɔw cɔa nyaal kɛnɛ kaw bi nyɔk kɛ li̱eŋ rɛydu, kɛ ɣöö ji̱ ko̱kädu bum ni kɛn wi̱i̱ muɔ̱ɔ̱n, kä ci ji̱ wec muɔ̱ɔ̱n diaal mɛ̈t kɛ lät ti̱i̱tädu.

²⁴ Kä ca jek ni riɛm göökni kɛnɛ nɛy tin ci Kuoth kɛ lɛy rɛydɛ, kɛn nɛy diaal tëë ca ŋuɔ̱t wi̱i̱ muɔ̱ɔ̱n.”