Nyuuth 17 - RUAC KUƆTH IN RƐL RƆ

Ler in ci ko̱k

¹ Kä cu ram kɛl kä ja̱a̱k nhial da̱ŋ bärɔw tin tekɛ thääk da̱ŋ bärɔw ben, kä ɣä cuɛ wee i̱, “Bër, bä ji̱ ben nyuɔ̱th luk lerä in di̱i̱t in ci nyuur wi̱i̱ pi̱i̱ni ti ŋuan.

² Ci kua̱r wec muɔ̱ɔ̱n nyin leerä la̱t kɛ jɛ, kä kɛ kɔaŋ leerädɛ ci nɛy tin ciaŋkɛ wi̱c muɔ̱ɔ̱n yɔ̱ŋ kɛ jɛ.”

³ Kä cuɛ ɣä naŋ däär dɔaar kɛ yiëë, kä cua ciek nɛn nyuurɛ jɔk lɛ̱̈ɛ̱̈ mi lual mi ci thia̱a̱ŋ kɛ ciööt kuethni Kuɔth, kä tëëkɛ wuɔ̱th da̱ŋ bärɔw kɛnɛ tuɔ̱ŋ da̱ŋ wäl.

⁴ Ɛn ciek tëëkɛ bi̱i̱ mi mɛr, kɛnɛ bi̱i̱ mi lual, kä cɛ rɔ pik kɛ da̱a̱p, kɛnɛ guiy ti nyin gɔw kɛ dɔ̱a̱kni. Kä kääpɛ liɛɛr dääpä mi thiäŋ kɛ nyuɔɔn kɛnɛ jiäk leerädɛ kɛ tetdɛ.

⁵ Kä ca ciöt mi /ca luɔtdɛ ŋäc gɔ̱a̱r nhiam kaandɛ wëë i̱, “Bɛ̈-bi-lɔn in di̱i̱t, man lëëri kɛnɛ nyuɔɔn wec muɔ̱ɔ̱n.”

⁶ Kä cua ciek nɛn, cɛ yɔ̱ŋ kɛ riɛm nɛɛni tin ci Kuoth kɛ lɛy, kɛnɛ riɛm nëëni ti ca näk kɛ kui̱ Yecu. Mëë cä jɛ nɛn, cua ga̱a̱c ɛlɔ̱ŋ.

⁷ Kä duundɛ ɣöö cu jääk nhial ɣä jiök i̱, “Ɛŋu mi ga̱a̱c kɛ ji̱ ɛlɔ̱ŋ? Bä ji̱ la̱r luɔt kä min gääy naath kä ciek, kɛnɛ ley in tekɛ wuɔ̱th da̱ŋ bärɔw kɛ tuɔ̱ŋ da̱ŋ wäl min kap ciek.

⁸ Ley in ci nɛn cɛ kɔŋ te thi̱n, kä /cɛ lɛ ŋot thi̱n, bëë raar rɛy kɔ̱kä mi thil piny kä wëë däkä. Kä nɛy tin ciaŋkɛ wi̱c muɔ̱ɔ̱n tin /ka̱n ciöötkiɛn gɔ̱a̱r rɛy warɛgakä teekä ni tukä ɣɔaa, bikɛ ga̱a̱c mi wa ley wä nɛn. Kɛ ɣöö cɛ kɔŋ te thi̱n, kä /cɛ lɛ ŋot thi̱n, kä bɛ ben.

⁹ “Mɛmɛ go̱o̱rɛ ca̱r wec mi gɔaa kɛnɛ pɛl thiɛkä. Kɛn wuɔ̱th da̱ŋ bärɔw kɛ pääm da̱ŋ bärɔw tin nyuur ciek thi̱n. Kɛn bä kɛ kua̱r da̱ŋ bärɔw,

¹⁰ tin ci dhieec pɛ̈ɛ̈n thi̱n, kɛl tëkɛ kä ŋot kɛl /kenɛ ni ben, kä mi wëë wä ben bɛ ruëc kɛ gua̱a̱th mi tɔt kärɔa.

¹¹ Kä kɛ kui̱ lɛ̱̈ɛ̱̈ in ci kɔŋ te thi̱n, kä /ci lɛ ŋot thi̱n, jɛn ɛ bädäk kua̱ri kä ɛ kɛl kä kua̱r da̱ŋ bärɔw min ba däk.

¹² Kä tuɔ̱ŋ da̱ŋ wäl tin ci nɛn kɛ kua̱r da̱ŋ wäl ti ŋot a /ken ni ben kuäärä, kä duundɛ ɣöö bikɛ lua̱ŋ jek ce̱tkɛ kua̱r kɛ thaak kɛl, kɛɛl kɛ ley.

¹³ Kɛn cikɛ rɔ̱ mat kɛl, ka̱mkɛ lua̱ŋdiɛn kɛnɛ buɔ̱mdiɛn ley.

¹⁴ Kɛn bikɛ ko̱r tɛr kɛ Ruath Dɛ̈ɛ̈l, kä bi Ruath Dɛ̈ɛ̈l kɛ tiam, kɛ ɣöö jɛn ɛ Kuäär kua̱ri, kä ɛ Rueec ruëëcni, kä nɛy tin tekɛ jɛ kɛɛl ca kɛ cɔl, kä ca kɛ mɛk, kä ŋa̱thkɛ kɛ.”

¹⁵ Kä cu jääk nhial ɣä jiök i̱, “Pi̱ tin ci nɛn, guäth in nyuur ler thi̱n, kɛ bua̱n nɛɛni ti ŋuan, kɛnɛ döör kɛ thuk ti gööl.

¹⁶ Kä tuɔ̱ŋ da̱ŋ wäl tin ci nɛn, kɛn kɛ ley bikɛ ler nyir, bikɛ nyinkɛ diaal naŋ, kä ba jɛ päl ni juutdä, bikɛ ri̱ŋdɛ cam, kä waŋkɛ jɛ kɛ mac.

¹⁷ Kɛ ɣöö ci Kuoth ɛ la̱th lo̱cnikiɛn i̱, ba ca̱pdɛ la̱t kɛ nhökdiɛn, kɛ tho̱p kuäärädiɛn ley, amäni mi wä ruaacni Kuɔth a thuɔ̱ɔ̱k.

¹⁸ Kä ciek in ci nɛn ɛ wec in di̱i̱t in ruaac kua̱r wec muɔ̱ɔ̱n.”