Nyuuth 16 - RUAC KUƆTH IN RƐL RƆ

Thääk waŋä lɔaac Kuɔth

¹ Kä cua jɔw mi di̱i̱t liŋ rɛy luaak Kuɔth, jio̱kɛ ja̱a̱k nhial da̱ŋ bärɔw i̱, “Wiaa, wuɔcɛ thääk waŋä lɔaac Kuɔth da̱ŋ bärɔw wi̱i̱ muɔ̱ɔ̱n.”

² Kä ɛnɔ cu jääk in nhiam wä, cuɛ min te rɛy thaakdɛ wä wuɔc wi̱i̱ muɔ̱ɔ̱n, kä cu jiööri ti ŋuɔ̱th ŋuɔ̱ɔ̱th ti bɛc päl kä nɛy tin tekɛ biɛl lɛ̱̈ɛ̱̈ kɛnɛ nɛy tin palkɛ cätdɛ.

³ Cu jääk nhial in rɛwdɛ min te rɛy thaakdɛ wä wuɔc rɛy bar, a cuɛ ce̱tnikɛ riɛm raam mi ci li̱w, kä cu ŋɔaani diaal tin tëk rɛy bar li̱w.

⁴ Cu jääk nhial in diɔ̱ɔ̱kdiɛn min te rɛy thaakdɛ wä wuɔc rɛy kiɛri kɛnɛ löli pi̱i̱ni, kä cukɛ rɔ̱ loc ala riɛm.

⁵ Kä cua jääk pi̱i̱ni liŋ wëë i̱, “Luɔ̱ɔ̱ku tin ci la̱t kɛ cuŋ, lö Kɛl in Rɛl Gɔɔydɛ Rɔ, ji̱n min te thi̱n kä ci dɔŋ te thi̱n.

⁶ Kɛ ɣöö ci naath riɛm nɛɛni ti ci Kuoth kɛ lɛy kɛnɛ göök wuɔ̱th piny, cikɛ moc riɛm mi ba math. Ɛ jɛn min ro̱ŋ kɛ kɛ!”

⁷ Kä cua jɔw liŋ wi̱i̱ yi̱kä wëë i̱, “Ɣɔ̱ɔ̱n, Kuäär ni Kuoth, in Leny Buɔ̱mdu ti Diaal. Luɔ̱ɔ̱ku kɛ thuɔ̱ɔ̱k kä kɛ cuŋ!”

⁸ Cu jääk nhial in ŋuaandiɛn min te rɛy thaakdɛ wuɔc kä cäŋ, kä cua jɛ pa̱l ɣöö bɛ naath waŋ kɛ mac.

⁹ Cu naath waaŋ kɛ leth mi di̱i̱t, kä cukɛ ciöt Kuɔth in tekɛ buɔ̱m wi̱i̱ rikni ti̱ti̱ kuëth. Kä /kenkɛ rɔ ri̱t dueeri kɛ ɣöö dëë jɛ ka̱m liak.

¹⁰ Cu jääk nhial in dhieecdiɛn min te rɛy thaakdɛ wuɔc wi̱i̱ kɔam kuäärä lɛ̱̈ɛ̱̈, kä cu kuäärɛ cuɔl ala muth. Kä cu naath lëëpkiɛn kac kɛ bɛ̈c pua̱nynikiɛn.

¹¹ Kä cukɛ Kuoth nhial kuëth kɛ kui̱ bɛcädiɛn kɛnɛ buɔ̱ɔ̱tkiɛn, kä /ka̱n rɔ ri̱t lätnikiɛn.

¹² Cu jääk nhial in bäkɛliɛn min te rɛy thaakdɛ wuɔc kiir Yu-pɛ-ree-tidh in di̱i̱t, kä cuɛ do̱n, kɛ ɣöö ba duɔ̱ɔ̱p rialikä kɛ kui̱ kua̱ri tin bëë kä käny ca̱ŋ.

¹³ Kä cua yiey da̱ŋ diɔ̱k ti jiäk ti ce̱tkɛ guëëk nɛn bäkɛ raar thok nyaŋ in di̱i̱t kɛnɛ thok lɛ̱̈ɛ̱̈, kɛ thok go̱kä mi gua̱n kacä.

¹⁴ Kɛn yiey ti jiäk ti̱ti̱ la̱tkɛ nyuuthni ti ga̱ykɛ naath, kä räthkɛ ni kä kua̱r wec muɔ̱ɔ̱n kɛɛliw, kɛ ɣöö ba kɛ dol kɛ kui̱ köör kɛ cäŋ Kuɔth in Leny Buɔ̱mdɛ ti Diaal in di̱i̱t.

¹⁵ “Nɛnɛ, ɣän ba̱a̱ ce̱tkɛ kueel! Puɔ̱th akɛ ram te jinä, mi yoop bi̱i̱dɛ kɛ ɣöö /cɛ bi ja̱l juutdä, a bɛ pöc kɛ naath.”

¹⁶ Kä cukɛ rɔ̱ dol guäth mi cɔali “Ar-ma-ge-dɔn” kɛ thok Ɣi-bɛ-ru.

¹⁷ Cu jääk nhial in bärɔwdiɛn min te rɛy thaakdɛ wuɔc rɛy jiɔam, kä cu jɔw mi di̱i̱t ben raar luaak Kuɔth bëë kɔam kuäärä, wëë i̱, “Ca jɛ la̱t!”

¹⁸ Cuɛ tekɛ yiel kɛ wuɔ̱w mi di̱i̱t, kɛnɛ ma̱a̱r nhial, kɛ lath piɛny mi di̱i̱t mi /ken kɔŋ te thi̱n ni mëë te naath wi̱i̱ muɔ̱ɔ̱n, cu lath piɛny cu di̱t inɔ.

¹⁹ Cu wec in di̱i̱t rɔ da̱a̱k kä diɔ̱ɔ̱k, kä cu wi̱i̱ dööri tëth. Cu Kuoth Bɛ̈-bi-lɔn in di̱i̱t tim, cuɛ jɛ jakä mäthɛ kɛ kɔaŋ waŋä lɔaac Kuɔth in te rɛy lirä.

²⁰ Kä cu dhuɔ̱li diaal rɔ bar, cuɛ thil pääm ti dëë jek.

²¹ Kä cuɛ tekɛ nhiaal guiyni ti di̱t ti ce̱t thiakdiɛn kɛ ki̱lu gɛrɛ̈mni ti jiɛn dhieec, cukɛ pɛn kä naath, amäni mëë wäkɛ Kuoth kuëth kɛ kui̱ rikä nhiaal guiyni, kɛ ɣöö ɛ riɛk guiyni mi jiääk.