Nyuuth 14 - RUAC KUƆTH IN RƐL RƆ

Ruath Dɛ̈ɛ̈l kɛnɛ nɛɛkɛ

¹ Kä cua guic, kä nɛnɛ, wi̱i̱ Pa̱a̱m Dha-yɔn cuŋ Ruath Dɛ̈ɛ̈l thi̱n! Kä te nɛy ti bathdɔɔri ti kuɔ̱r kɛl wi̱cdɛ jiɛn da̱ŋ ŋuan wi̱cdɛ ŋuan kɛɛl kɛ jɛ, ti ca ciötdɛ kɛnɛ ciöt Gua̱n gɔ̱a̱r nhiam kaandiɛn.

² Kä cua jɔw liŋ nhial mi ce̱tkɛ wuɔ̱w pi̱i̱ni ti ŋuan ti lo̱ny kɛnɛ ma̱a̱r nhial ti di̱t. Ɛn jɔw ëë cä liŋ ce̱tkɛ kɛ jɔw thuɔmni ti pua̱tkɛ kɛ thuɔmnikiɛn.

³ Kä cukɛ dit mi pay cak kɛt nhiam kɔam kuäärä kɛnɛ nhiam leeyni da̱ŋ ŋuan tin tëk, kɛ nhiam di̱tni. Thilɛ ram mi dee dit ɛmɔ ŋa̱c ɛ ni nɛy ti bathdɔɔri ti kuɔ̱r kɛl wi̱cdɛ jiɛn da̱ŋ ŋuan wi̱cdɛ ŋuan, tin ca luɛl wi̱i̱ muɔ̱ɔ̱n.

⁴ Ti̱ti̱ kɛ kɛn nɛy tin /ka̱n rɔ̱ ya̱r kɛ män, kɛ ɣöö kɛ nɛy ti thil nyuɔɔn. Kɛ kɛn nɛy tin guɔ̱ɔ̱rkɛ Ruath Dɛ̈ɛ̈l Kuɔth gua̱thni diaal tin wëë thi̱n. Kɛ nɛy ti ca kuɛl kä duɔth nath kɛ ɣöö bakɛ thöp Kuɔth kɛnɛ Ruath Dɛ̈ɛ̈l.

⁵ Kä thilɛ thukiɛn kac, kɛ ɣöö thilɛ kɛ bɛ̈l.

Ja̱a̱k nhial da̱ŋ diɔ̱k

⁶ Kä cua jääk nhial dɔ̱diɛn mi pär kɛ nhial nɛn, mi tekɛ thuk Kuɔth ti gɔw ti thil pek ti bɛ la̱t nɛy ti cieŋ wi̱i̱ muɔ̱ɔ̱n, kɛ döör diaal kɛnɛ thuk duëli, kɛ thuk ti gööl kɛ nɛy diaal.

⁷ Kä cuɛ jɛ lat kɛ jɔw mi di̱i̱t i̱, “Luɔ̱thɛ Kuoth kä puanyɛ jɛ, kɛ ɣöö ci gua̱a̱th luɔ̱kdɛ cop. Kä palɛ jɛ ɛn ram min ci nhial kɛnɛ piny cak, kɛ bar kɛnɛ löli pi̱i̱ni.”

⁸ Cu jääk nhial dɔ̱diɛn in rɛwdɛ jɛ guɔ̱ɔ̱r, wëë i̱, “Cɛ tɛɛth, cɛ tɛɛth ɛn Bɛ̈-bi-lɔn in di̱i̱t! Jɛn cɛ nɛy diaal jak kä mathkɛ kɔaŋdɛ jɛn kɔaŋ gaak leerädɛ.”

⁹ Kä cu jääk nhial dɔ̱diɛn in diɔ̱ɔ̱kdiɛn kɛ guɔ̱ɔ̱r, ruacɛ kɛ jɔw mi di̱i̱t i̱, “Nɛy tin palkɛ ley kɛnɛ cätdɛ, kä tek kɛ biɛl nhiam kaandiɛn kiɛ tetdiɛn,

¹⁰ bikɛ maath kɛ kɔaŋ waŋä lɔaac Kuɔth, mi ca wuɔc a /ka̱n liɔm rɛy lirä ŋɛɛnyädɛ, kä bɛ pua̱nykiɛn jakä bɛc kɛ mac kɛnɛ wal tin kɛc ŋuänydiɛn nhiam ja̱a̱kni nhial tin rɛ̈lkɛ rɔ̱ kɛnɛ nhiam Ruath Dɛ̈ɛ̈l.

¹¹ Kä bi tol maac in waaŋkɛ wä nhial amäni cäŋ kɛl. Kä bɛ thil lɔ̱a̱ŋ, kɛ cäŋ kiɛ wäär, kä nɛy tin palkɛ ley kɛnɛ cätdɛ, amäni ram ɔ ci biɛl cio̱tädɛ jek ɔ.”

¹² Mɛmɛ ɛ ciöt kɛ kui̱ rutdä nɛɛni ti ci Kuoth kɛ lɛy tin ka̱pkɛ ŋuɔ̱t Kuɔth kɛnɛ ŋa̱th Yecu.

¹³ Kä cua jɔw mi bëë nhial liŋ, wee i̱, “Gɔ̱r mɛmɛ. A puɔ̱th tekɛ nɛy tin ci li̱w rɛy Kua̱r ni Kuoth a wee wä.” Laar Yiëë Kuɔth ɛ i̱, “Ɛpuc bikɛ tekɛ lɔ̱a̱ŋ kä lätkiɛn, kɛ ɣöö tin ci kɛn kɛ la̱t guɔ̱ɔ̱rkɛ kɛ!”

Ŋër wec muɔ̱ɔ̱n

¹⁴ Kä cua guic, kä nɛnɛ, tëëkɛ pua̱r mi bo̱r, kä tëëkɛ ram mi nyuur wi̱i̱ puɔ̱rä mi ce̱tkɛ Gat Ran, kä te wi̱cdɛ kɛ kum kuäärä mi ca la̱t kɛ da̱a̱p, kä te tetdɛ kɛ carcaar mi moth!

¹⁵ Kä cu jääk Kuɔth nhial dɔ̱diɛn ben raar luaak Kuɔth, cɔɔlɛ ram in nyuur wi̱i̱ puɔ̱rä kɛ jɔw mi di̱i̱t i̱, “Käni carcaaru, kä ŋeri kɛ ɣöö ci gua̱a̱th ŋër cop, kɛ ɣöö ci nyin wec muɔ̱ɔ̱n ciɛk.”

¹⁶ Kä ɛnɔ cu ram mi nyuur wi̱i̱ puɔ̱rä carcaarɛ yi̱th wi̱i̱ muɔ̱ɔ̱n, kä cua nyin wec muɔ̱ɔ̱n ŋɛr.

¹⁷ Kä cu jääk nhial mi dɔ̱diɛn ben raar luaak Kuɔth in te nhial, kä jɛn bä tëëkɛ carcaar mi moth.

¹⁸ Kä cu jääk nhial dɔ̱diɛn ben raar wi̱i̱ yi̱kä, ɛ jɛn jääk in tekɛ lua̱ŋ kɛ mac, kä cuɛ ram in tekɛ carcaar mi moth cɔl kɛ jɔw mi di̱i̱t i̱, “Käni carcaaru kä dol dɛy buɔ̱cni wec muɔ̱ɔ̱n, kɛ ɣöö ci dɛykiɛn lɔɔr.”

¹⁹ Kä ɛnɔ cu jääk nhial carcaar yi̱th wi̱i̱ muɔ̱ɔ̱n, kä cuɛ dɛy buɔ̱cni wec muɔ̱ɔ̱n dol, kä cuɛ kɛ yuɔr guäth nhiecä dɛɛni wal in di̱i̱t in la gua̱a̱th waŋä lɔaac Kuɔth.

²⁰ Kä ɛn gua̱a̱th nhiecä dɛɛni wal tëë raar jɔk wec, kä cu riɛm lo̱o̱ny guäth nhiecä dɛɛni wal ce̱tkɛ yier mi cop luëŋdɛ ŋuäk jiöök tuɔ̱ruɔ̱k mi cu pal ni guäth mi tekɛ ki̱luni ti kur rɛw.