Nyuuth 13 - RUAC KUƆTH IN RƐL RƆ

¹ Kä cu nyaŋ cuɔ̱ŋ rɛy litdä thuɔk bar. Ley mi päl raar bar Kä cua ley nɛn känyɛ raar bar, kä tëëkɛ tuɔ̱ŋ da̱ŋ wäl, kä tëëkɛ wuɔ̱th da̱ŋ bärɔw. Kä tëëkɛ kuɔ̱mni kuäärä da̱ŋ wäl tuɔ̱ŋnikɛ kä wuɔ̱thnikɛ te ciöt mi kueth Kuoth thi̱n.

² Kä ce̱t ley in cä nɛn kɛ kuac, ce̱t ciökɛ kɛ ciök nyɛkudhuny, kä ce̱t thokdɛ kɛ thok luɔny, cu nyaŋ jɛ ka̱m buɔ̱mdɛ kɛnɛ kɔm kuäärädɛ kɛ lua̱ŋ mi di̱i̱t.

³ Kä wi̱c lɛ̱̈ɛ̱̈ kɛl ce̱tdɛ kɛ mi tëëkɛ buɔ̱t mi ci jɛ näk, kä ca buɔ̱tdɛ in no̱ŋ jɛ lia̱a̱ jakä gɔaa. Kä cu ji̱ wec muɔ̱ɔ̱n diaal ga̱a̱ckɛ ley, kä cukɛ guɔ̱ɔ̱r.

⁴ Cu kɛn nyaŋ pal, kɛ ɣöö cɛ lua̱ŋdɛ ka̱m ley, kä cukɛ ley pal wäkɛ i̱, “Ɛŋa mi ce̱tkɛ ley? Kä ɛŋa mi dee nyiëëny kɛ jɛ?”

⁵ Kä cua ley moc kɛ thok mi ruac liakä, mi kuethɛ Kuoth, kä ca jɛ pa̱l buɔ̱m kɛ päth ti jiɛn da̱ŋ ŋuan wi̱cdɛ rɛw.

⁶ Cuɛ thokdɛ lɛp kɛ ɣöö bɛ Kuoth kuëth, kuethɛ ciöt Kuɔth kɛnɛ gua̱a̱th cieŋädɛ, ala nɛy tin ciaŋkɛ nhial.

⁷ Kä ɛnɔ bä cua jɛ pa̱l ɣöö bɛ ko̱r tɛr kɛ nɛy tin ci Kuoth kɛ lɛy, kä bɛ kɛ tiam. Ca jɛ ka̱m buɔ̱m wi̱i̱ thukni duëli diaal, kɛ naath kɛnɛ ji̱ thukni, kɛ döör diaal,

⁸ kä bi ji̱ wec muɔ̱ɔ̱n diaal jɛ pal, nɛy diaal tin /ka̱n ciöötkiɛn gɔ̱r ni tukä ɣɔaa rɛy warɛgakä teekä Ruath Dɛ̈ɛ̈l min ca ŋot.

⁹ Ɛ ram mi tekɛ ji̱th a jɛ li̱ŋ.

¹⁰ “Mi ba raan naŋ ala pɛ̈c, bɛ wä ala pɛ̈c. Kä ram mi näk raan kɛ thɛp, ba jɛ dhil näk kɛ thɛp.” Mɛmɛ ɛ jɛn ciöt kɛ kui̱ rutdä kɛnɛ ŋa̱th nɛɛni tin ci Kuoth kɛ lɛy.

Ley mi päl raar piny

¹¹ Kä ɛnɔ cua ley dɔ̱diɛn mi päl raar piny nɛn. Kä tëëkɛ tuɔ̱ŋ da̱ŋ rɛw ce̱tkɛ ruath dɛ̈ɛ̈l rɔɔmä, kä cuɛ ruac ce̱tkɛ nyaŋ.

¹² Lätdɛ kɛ lua̱ŋ lɛ̱̈ɛ̱̈ in jio̱l. Kä cuɛ wi̱c muɔ̱ɔ̱n kɛnɛ nɛy tin ciaŋ kɛ jɛ kä palkɛ ley in jio̱l, min ca buɔ̱tdɛ in no̱ŋ jɛ lia̱a̱ jakä gɔaa.

¹³ Lätdɛ nyuuthni ti di̱t ti ga̱ykɛ naath, a jakɛ mac kä bëë piny nhial a guɛckɛ ɛ naath.

¹⁴ Kä kɛ nyuuthni tin ga̱ykɛ naath tin ca pa̱l jɛ i̱ bɛ la̱t kɛ kui̱ lɛ̱̈ɛ̱̈, cuɛ nɛy tin ciaŋkɛ wi̱c muɔ̱ɔ̱n mɛt, cuɛ naath com kɛ ɣöö bikɛ puɔ̱ny la̱t mi ce̱tkɛ ley in ca moc buɔ̱t kɛ thɛp, kä ŋotdɛ kɛ tëk.

¹⁵ Kä cua jɛ pa̱l ɣöö bɛ puɔ̱ny in ce̱tkɛ ley ŋök yiëë, kɛ ɣöö dee puɔ̱ny cu ruac, kɛ ɣöö bɛ nɛy tin lökɛ pal pua̱a̱ny in ce̱tkɛ ley näk.

¹⁶ Kä cuɛ nɛy diaal, tin tiɛtni kɛnɛ tin di̱t, tin riäŋ kɛnɛ nɛy tin can, tin lɔr kɛnɛ kuaany kɛ ɣöö ba tet cuëëcdiɛn kiɛ nhiam kaandiɛn moc biɛl.

¹⁷ Kä thilɛ ram mi dee duɔ̱ɔ̱r kɔk kiɛ dee duɔ̱ɔ̱r kɔak, ɛ ni mi tëëkɛ biɛl min la ciöt lɛ̱̈ɛ̱̈, kiɛ pek cio̱tädɛ.

¹⁸ Kä ciöt ɛmɛ ɛ pɛl, kä ram mi tekɛ ŋäc go̱o̱r pek lɛ̱̈ɛ̱̈, kɛ ɣöö ɛ jɛn pek ran. Pekdɛ ɛ kur bäkɛl wi̱cdɛ jiɛn bäkɛl, wi̱cdɛ bäkɛl.