Nyuuth 12 - RUAC KUƆTH IN RƐL RƆ

Ciek kɛnɛ nyaŋ yiëër mi di̱i̱t

¹ Kä cu nyuuth mi gääy naath jɔɔc nhial. Tëëkɛ ciek mi ci rɔ rony kɛ cäŋ, kä te pay ciöknikɛ, kä te wi̱cdɛ kɛ kum ciɛri da̱ŋ wäl rɛw.

² Jɛn ruetdɛ, kä cuɛ wiee kɛ mäc dapä, kɛnɛ bɛ̈c ciöt gatdä.

³ Kä cu nyuuth dɔ̱diɛn jɔɔc nhial. Tëëkɛ nyaŋ mi lual mi di̱i̱t, mi tekɛ wuɔ̱th da̱ŋ bärɔw kɛ tuɔ̱ŋ wäl, kɛ kuɔ̱mni kuäärä da̱ŋ bärɔw wuɔ̱thnikɛ.

⁴ Cu juälɛ pek ciɛri in diɔ̱ɔ̱kdiɛn nhial rol, kä yorɛ kɛ piny wi̱i̱ muɔ̱ɔ̱n. Kä cu nyaŋ cuɔ̱ŋ nhiam ciëk in ci thia̱k kɛ dap, kɛ ɣöö bɛ gatɔ wa dapɔ roc.

⁵ Cuɛ dap kɛ dho̱o̱l, min bi döör diaal ruac kɛ kɛɛt yieethä. Kä cua gatdɛ naŋ nhial kä Kuoth wi̱i̱ kɔam kuäärädɛ.

⁶ Kä cu ciek rɔ bar guäth mi te baaŋ, mi ci Kuoth ɛ rialikä kɛ kui̱dɛ, guäth in ba mi̱eth thi̱n kɛ ni̱n ti bathdɔɔr kɛl wi̱cdɛ kur rɛw, wi̱cdɛ jiɛn bäkɛl.

Juc Mi-ka-el kɛ nyaŋ

⁷ Kä cu ko̱r tuɔɔk nhial. Cu Mi-ka-el kɛnɛ ja̱a̱kɛ nyiëëny kɛ nyaŋ yiëër in di̱i̱t, min cu ko̱r tɛr kɛnɛ ja̱a̱kɛ.

⁸ Kä duundɛ ɣöö cua nyaŋ puɔ̱t, kä cuɛ cu thil gua̱a̱th kɛ kui̱diɛn nhial.

⁹ Kä cua nyaŋ in di̱i̱t yuɔr piny, min la thɔ̱l ëë wal, in cɔalkɛ i̱ “Gua̱n Jiäkni”, kiɛ “Cɛy-tan”, mëë ci ɣɔw kɛɛliw mɛt. Cua jɛ yuɔr piny kɛnɛ ja̱a̱kɛ kɛɛl.

¹⁰ Kä cua jɔw mi di̱i̱t liŋ nhial, wëë i̱, “Täämɛ ci ka̱n kɛnɛ buɔ̱m kɛ kuäär Kuɔthdan kɛ lua̱ŋ Mɛ-thiadɛ cop, kɛ ɣöö ca ram in gɔny dämanikɔn yuɔr piny, min gɔnykɛ kɛ cäŋ kɛnɛ wäär nhiam Kuɔthdan.

¹¹ Kä cukɛ jɛ tiam kɛ riɛm Ruath Dɛ̈ɛ̈l kɛnɛ ruac nenädiɛn, kɛ ɣöö /cikɛ tëkdiɛn nhɔk a cukɛ li̱w.

¹² A lɔcdu ku tɛɛth, lö nhial, kɛnɛ yɛn tin cieŋ rɛydɛ! Kä riɛk akɛ piny kɛnɛ bar, kɛ ɣöö ci gua̱n jiäkni ben piny kä yɛ kɛ waŋ lɔaac mi di̱i̱t, kɛ ɣöö ŋäcɛ jɛ i̱ ci gua̱a̱thdɛ ciak!”

¹³ Mëë ci nyaŋ ɛ nɛn ɛn ɣöö ca jɛ yuɔr piny, cuɛ riŋ kɔɔr ciëk in ci dap kɛ gat mi dho̱o̱l.

¹⁴ Kä duundɛ ɣöö cua ciek ka̱m gɔ̱k kuëth in di̱i̱t da̱ŋ rɛw, kɛ ɣöö derɛ rɔ bar kɛ thɔ̱l barɛ rɔ däär dɔaar, guäth in ba jɛ wä mi̱eeth thi̱n kɛ run da̱ŋ diɔ̱k kɛ nuth.

¹⁵ Cu thɔ̱l pi̱ ti ce̱tkɛ kir ŋɔak kɔɔr ciëk kɛ thokdɛ, kɛ ɣöö bɛ jɛ lɔak dɔɔr kɛ nyɔc.

¹⁶ Kä duundɛ ɣöö cu piny ciek ben luäk. Cu piny rɔ lɛp, kä cuɛ kir in ci nyaŋ kɛ ŋɔk kɛ thokdɛ math.

¹⁷ Kä cu nyaŋ gaak kɛ ciek, cuɛ rɔ ri̱t cuɛ ko̱r wä tɛr kɛ duɔth gan ciek, nɛy tin ka̱pkɛ ŋuɔ̱t Kuɔth, kä tiɛtkɛ nën Yecu.