Nyuuth 10 - RUAC KUƆTH IN RƐL RƆ

Jääk nhial kɛnɛ ko̱l gɔ̱rä mi tɔt

¹ Kä cua jääk nhial dɔ̱diɛn mi bum nɛn, bëë piny nhial, ca kum kɛ pua̱r, kä te tik Kuɔth nhial wi̱i̱dɛ. Kä ce̱t nhiamdɛ kɛ cäŋ kä ce̱t ciökɛ kɛ bo̱l maac.

² Te tetdɛ kɛ ko̱l gɔ̱rä mi tɔt mi ca lɛp. Kä cɛ cio̱o̱k cuëëcdɛ la̱th bar, kä te cio̱o̱k caamdɛ raar.

³ Kä cuɛ ciöt kɛ jɔw mi diit, mi ce̱tkɛ bur luɔny. Kä mëë cɛ ciöt, cu ma̱a̱r da̱ŋ bärɔw ma̱a̱r.

⁴ Kä mëë ci ma̱a̱r da̱ŋ bärɔw ma̱r, cua jɛ dee gɔ̱r, kä duundɛ ɣöö cua jɔw liŋ nhial wëë i̱, “Dil min ca la̱r ji̱ ɛ ma̱a̱r da̱ŋ bärɔw, kä /cu jɛ gɔ̱r piny.”

⁵ Kä cu jääk nhial in cä nɛn cuŋä bar kɛnɛ rar, tet cuëëcdɛ tar nhial,

⁶ kä cuɛ rɔ yac kɛ ram min tëk kɛ tëk mi thil pek, min ci nhial cak kɛnɛ tin te rɛydɛ, kɛ piny kɛnɛ tin te rɛydɛ, kɛ bar, kɛnɛ tin te rɛydɛ. Kä cu jääk wee i̱, “/Cɛ bi lɛ gal.

⁷ Kä ni̱n tɔ̱ bi jääk nhial in bärɔwdiɛn ɛ koth ni kaaŋ, bi ruac Kuɔth in cuäŋ naath a thuɔ̱k, ce̱tkɛ mëë cɛ la̱r ja̱a̱ŋkɛ ni göök.”

⁸ Kä cu jɔw ëë cä liŋ nhial lɛni ruac kɛ ɣä, wëë i̱, “Wër, käni ko̱l gɔ̱rä in ca lɛp tetdä jäkä nhial in te cuŋä bar kɛnɛ rar.”

⁹ Kä ɛnɔ cua wä kä jääk nhial, cua jɛ jiök kɛ ɣöö bɛ ɣä ka̱m ko̱l gɔ̱rä in tɔt. Kä cuɛ ɣä jiök i̱, “Käni jɛ kä cam ɛ, bɛ kɛ̈c jiidu, kä bɛ liɛm thokdu ce̱tkɛ tuaar.”

¹⁰ Cua ko̱l gɔ̱rä in tɔt ka̱n tetdä jäkä nhial, kä cua jɛ cam, limɛ thokdä ce̱tkɛ tuaar, kä mëë cä jɛ cam, cuɛ jicdä jakä kɛc ɛ ɣɔr.

¹¹ Kä cukɛ ɣä jiök i̱, “Bi ruac Kuɔth dhil nyɔk kɛ lat kɛ kui̱ nath, kɛ döör, kɛnɛ thuk ti gööl, kɛ kua̱r.”