Ŋi̱i̱c 9 - RUAC KUƆTH IN RƐL RƆ

Guut kɛl kä nɛy diaal

¹ Kä cua̱ kɛn ti diaal ti̱ti̱ car, kä cua̱ jek ɛn ɣöö tin la̱tkɛ ɛ gua̱n cuŋni kɛnɛ ram mi pɛl pɛl tëk kɛ Kuoth, kä thilɛ ram mi ŋäc jɛ ɛn ɣöö ɛ nhök kiɛ ɛ lo̱k liip jɛ mɔ.

² Kä nɛy diaal tekɛ kɛ guut kɛl, ram mi gua̱n cuŋni kɛnɛ gua̱n dueeri, mi gɔaa kiɛ mi jiääk, mi lɛy lɛy kɛnɛ mi /ci mɔ a lɛy lɛy, kä ram mi tho̱p muc kɛnɛ ram mi /ci muc tho̱p. Ta̱a̱ ɔ bi tekɛ jɛ mɔ kä ram mi gɔaa, bɛ tekɛ jɛ kä gua̱n dueeri. Kä min la tekɛ nɛy tin yackɛ rɔ, bɛ tekɛ nɛy tin la po̱c kɛ ya̱c.

³ Kä nɔmɔ ɛ duer kä tin diaal tin tuɔɔk ɛn rɛy ɣɔaa ɛ mi, ɛn ɣöö bi guut nɛɛni diaal a kɛl. Kä lo̱c nɛɛni diaal thiäŋkɛ kɛ jiäk, kä te yɔ̱ɔ̱ŋ lɔɔcdiɛn min ŋot kɛ teekä. Kä kɛ kɔrɛ bikɛ li̱w.

⁴ Kä tin diaal tin tëk tekɛ kɛ ŋa̱th, jio̱k mi tëk gɔaa ni jɛn kä lony mi ci li̱w.

⁵ Kä ŋäc tin tëk jɛ ɛn ɣöö bikɛ li̱w, kä tin ci li̱w thilɛ mi ŋäc kɛn ɛ, kä thilɛ mi ba nyɔk kɛ jek. Kä ca kɛ̈kdiɛn pa̱l rueec.

⁶ Ci nhökdiɛn kɛnɛ lo̱kdiɛn kɛ tiɛɛliɛn thuɔ̱k, thilɛ mi bi la kui̱diɛn kä tin diaal tin la̱t kɛ rɛy ɣɔaa.

⁷ Wër cam kuändu kä math kɔaŋdu kɛ tɛ̈th lɔaac. Kɛ ɣöö ci Kuoth la̱tdu nhɔk.

⁸ Läthni ni bieyni ti bo̱o̱r, kä lapni wi̱cdu la yi̱i̱ri kɛ liɛɛth ni ciaŋ.

⁹ Ciëŋɛ agɔaa yɛnɛ ciekdu min nhɔki kɛ ni̱n teekädu diaal tin thil luɔt tin ci Kuoth kɛ ka̱m ji̱ ɛn rɛy ɣɔaa ɛmɛ. Kɛ ɣöö ɛ jɛn min ca ca̱k ji̱ rɛy teekä kɛnɛ lätku rɛy ɣɔaa.

¹⁰ Kä lät ni mɔ deri luäŋ kɛ lät ni mɔ kɛ buɔ̱mdu. Kɛ ɣöö thilɛ ca̱r kiɛ la̱t kiɛ pɛl ɛn muun ɔ bi wä thi̱n ɔ.

¹¹ Kä cä mi dɔ̱ŋ lɛni nɛn rɛy ɣɔaa. Ɛn ɣöö /ci kɛ nɛy tin pual puaal wuurä la naath a leny tɔ̱, kä /ci kɛ nɛy tin buɔ̱m buɔ̱ɔ̱m la ko̱r a tɛɛrɔ, kä /ci kɛ nɛy tin pɛl jekɛ mi̱eth tɔ̱, kä /ci kɛ nɛy tin ŋa̱ckɛ ŋɔak jek kɛ ria̱ŋ tɔ̱, kiɛ ji̱ tiitdä jek kɛ nhök tɔ̱. La cup ni gua̱a̱th duɔ̱ɔ̱rä kɛnɛ baŋ kä kɛn diaal.

¹² Kɛ ɣöö thilɛ ram mi ŋäc cäŋ liethdɛ. Ce̱t kɛn nikɛ min la rec a ka̱pkɛ kɛ cambak, kä kääp dhuur diit, inɔ dɛ̈pkɛ naath ɛ cäŋ jiäkni, bɛ pär nikɛ ikä.

Pɛl gɔaa ni jɛn kä dɔ̱ɔ̱r

¹³ Kä cua nyuuth ɛmɛ lɛ nɛn kɛ kui̱ pɛlä rɛy ɣɔaa min cu lɔcdä jɛ nhɔk ɛlɔ̱ŋ.

¹⁴ Tëë kɛ wec mi tɔt kä kui̱c ji̱kɛ. Kä cu kuäär mi bum bum jɛ ben go̱l, kä cuɛ jɛ ta̱th päny mi di̱i̱t.

¹⁵ Kä ɛn wec ɛmɔ te ram mi can mi pɛl pɛl thi̱n, kä cuɛ wec luäk kɛ pɛlɛ. Kä cuɛ ŋot thilɛ ram mi cu wut ɛ can ɛ mɔ tim.

¹⁶ Duundɛ ɣöö cua̱ wee i̱, “Pɛl gɔaa ni jɛn kä buɔ̱m, a cäŋɛ ni mɔ ca pɛl wutdä mɔ can ɛmɔ lo̱k ɔ, kä thilɛ ram mi ci rieetkɛ liŋɔ.”

¹⁷ Kä lieŋ ruaacni raam mi pɛl pɛl bitdä, gɔaa ni jɛn kä rɔal kua̱r rɛy dɔa̱a̱ri.

¹⁸ Pɛl gɔaa ni jɛn kä yio̱w ko̱o̱r, duuŋdɛ ɣöö ku gua̱n dui̱rä gɔy ti ŋuan lɛ dup.