Ŋi̱i̱c 7 - RUAC KUƆTH IN RƐL RƆ

Cär kɛ kui̱ teekä

¹ Kɛ̈k mi gɔaa, gɔaa ni jɛn kä wäl yi̱i̱rä mi gɔaa, kä cäŋ li̱eth gɔaa ni jɛn kä cäŋ däpä.

² Gɔaa ni ɣöö wi̱i̱ dhɔr mi pär ji̱kɛ kä ɣöö wi̱i̱ dhɔr mi ŋar ji̱kɛ. Kɛ ɣöö lia̱a̱ ɛ jɛn guut nɛɛni diaal, kä ba jɛ tit ɛ nɛy tin tëk kɛ lɔcdiɛn.

³ Jiath lɔaac gɔaa ni jɛn kä to̱k, kɛ ɣöö jiath lɔaac jakɛ ca̱r kä gɔaa.

⁴ Lɔc raam mi pɛl pɛl te ni pa̱r thi̱n, kä lɔc raam mi dɔ̱a̱r te ni tɛ̈th lɔaac thi̱n.

⁵ Gɔaa ni ɣöö dee raan liŋ ni luek nɛɛni ti pɛl kä ɣöö deri liŋ ni tuar nɛɛni ti dɔa̱a̱r.

⁶ Ce̱tkɛ min la kuiy a tɛ̈ny rɛy maac, ɛ jɛn ce̱tkɛ to̱k dɔa̱a̱ri mɔ, kä nɔmɔ thilɛ jɛ luɔt.

⁷ Ciaŋ jiääk jakɛ ram mi pɛl kä dɔ̱a̱r, kä kök yärɛ ciaŋ ran.

⁸ Thuɔ̱k kä duɔ̱ɔ̱r gɔaa ni jɛn kä tukdɛ, kä päl lɔaac piny gɔaa ni jɛn kä liak.

⁹ /Cu rɔ jak kä mal gaak, kɛ ɣöö gak ɛ duŋ nɛɛni ti dɔa̱a̱r.

¹⁰ Kä /cu wee i̱, “Ɛŋu gɔw ni ni̱n tëë kɔn, kä ni̱n ti̱ti̱ ɔ?” Kɛ ɣöö /cɛ gɔaa ɛn ɣöö deri thiec inɔ.

¹¹ Pɛl ɛ mi dëë ba̱ny raan, gɔaaɛ. luäkɛ nɛy tin ŋot teekä.

¹² Pɛl gaŋɛ raan ce̱tkɛ min gaŋ yio̱w raan. Min gɔaa kä pɛl ɛ ɣöö gaŋɛ tëk raam in tekɛ jɛ.

¹³ Kä car min ci Kuoth ɛ la̱t. Kä ɛŋa mi dee mi cɛ gɔ̱ŋ ri̱c?

¹⁴ Mi gɔw ŋɔak kɛ ji̱ a lɔcdu tɛth, kä mi ci ŋɔak jiääk kɛ ji̱ carɛ bä, i̱ ci Kuoth raan cak ce̱tkɛ ram in dɔ̱ŋ. Kɛ kui̱c ɛmɔ ci raan min bi ben kɔɔrɛ dee ŋa̱c.

Ma̱r ma̱a̱ri kɛ kui̱ teekä

¹⁵ Cä ti diaal nɛn rɛy teekädä mi thil luɔt. Cä ram mi gua̱n cuŋni nɛn mi ci li̱w rɛy cuŋnikɛ, kä cä ram mi gua̱n dueeri nɛn mi ci jääny kɛ tëk rɛy lätni dueerikɛ.

¹⁶ Ɛ cuŋku ci bäl ɛlɔ̱ŋ, kä cu pɛl ɛlɔ̱ŋ. Ɛŋu bi rɔ däkɔ?

¹⁷ /Cu tekɛ dueer ɛlɔ̱ŋ, kä /cu rɔ jak kä dɔ̱a̱r. Ɛŋu bi rɔ jak kä li̱w a /ken ni̱n liethdu ni copɔ?

¹⁸ Gɔaa ɛ ɛn ɣöö bikɛ käp kɛn ti̱ti̱, kä /cu kɛl jak kä wä. Kɛ ɣöö ram mi luth Kuoth /ci ciɛŋ kɛ bi ba̱l kä ti diaal.

¹⁹ Pɛl mocɛ ram kɛl mi pɛl pɛl buɔ̱m mi di̱t ni jɛn kä ruëëc da̱ŋ wäl ti te rɛy wec.

²⁰ Kɛ thuɔ̱k thilɛ ram mi gua̱n cuŋni wi̱i̱ muɔ̱ɔ̱n mi lät cuŋ kä /ken dueer kɔŋ la̱t.

²¹ Kä /cu ruaacni diaal tin latkɛ ɛ naath liŋ, amäni mi bi kuanydu liŋ a kuethɛ ji̱.

²² Kɛ ɣöö ŋäci jɛ kɛ lɔcdu gua̱thni ti ŋuan kɛ ɣöö ci nɛy tin kɔ̱ŋ kɔn kuëth.

²³ Kä cua̱ kɛn ti diaal ti̱ti̱ ɣɔ̱n kɛ pɛl kä cua̱ wee i̱, “Ɛ ɣän i̱ pɛlä.” Duundɛ ɣöö cua̱ jɛ jek lenyɛ pɛlä.

²⁴ Cua̱ jek a cäŋ ti̱i̱ kɛ pɛl mi tëë i̱di, na̱nɛ ɛlɔ̱ŋ, thilɛ ram mi dëë luɔt teekä ŋa̱c.

²⁵ Kä cua̱ jɛ lɛ go̱r ɛn ɣöö dëë pɛl luɔtdɛ ŋa̱c kɛnɛ tha̱a̱ŋ ŋɔaani, kä cua̱ go̱r ɛn ɣöö bä dɔ̱ɔ̱r kɛnɛ nyuɔɔn in la yɔ̱ɔ̱ŋ dɔ̱ɔ̱rä luɔtdiɛn lɛ ŋa̱c.

²⁶ Cua̱ mi bɛc ni jɛn kä lia̱a̱ jek ciek, nhök in kämɛ ji̱, bɛ ji̱ käp ce̱tnikɛ cambak, kä tetkɛ ba ji̱ rɔk ce̱tkɛ kuat. Bi kään ni ram in tɛɛth lɔc Kuɔth, kä bɛ gua̱n dueeri ka̱p rɔ.

²⁷ Kä cu ŋi̱i̱c wee, nɛnɛ nɛmɛ ɛ jɛn min cä jek, kɛ ɣöö bä luɔt ŋɔaani jek, la matdä kɛl jɔk kä min dɔ̱ŋ,

²⁸ tin cä car kɛ wi̱cdä, kä thilɛ mi cä jek. Cua̱ jek ni wut kɛl mi gɔaa rɛy wutni ti bathdɔɔr, kä cuɛ thil ciek kɛl mi gɔaa mi cua̱ jek rɛy mään diaal.

²⁹ Kä min cä jek kä rɔa, ɛ ɣöö Kuoth cɛ raan cak kɛ cuŋ, duŋdɛ ɣöö ci naath kulɛ wä go̱r ni ti kɔ̱ŋ ti ŋuan.