Ŋi̱i̱c 3 - RUAC KUƆTH IN RƐL RƆ

Tëë kɛ gua̱a̱th kɛ ti diaal

¹ Tëë kɛ gua̱a̱th kɛ ti diaal, tin tuɔɔk rɛy ɣɔaa.

² Tëë kɛ gua̱a̱th kɛ da̱p ran, kä tëë kɛ gua̱a̱th kɛ lia̱a̱ ran. Tëë kɛ gua̱a̱th pi̱thä, kä tëë kɛ gua̱a̱th in yuɔ̱tkɛ jɛ raar.

³ Tëë kɛ gua̱a̱th kɛ näk ran, kä tëë kɛ gua̱a̱th kɛ gɔɔy ran kä juey. Tëë kɛ gua̱a̱th mi da̱kɛ duɔ̱ɔ̱r, kɛ gua̱a̱th mi la̱tkɛ duɔ̱ɔ̱r.

⁴ Tëë kɛ gua̱a̱th kɛ lul, kɛ gua̱a̱th kɛ to̱k. Tëë kɛ gua̱a̱th jiɛthkä lɔaac, kɛ gua̱a̱th kɛ duth.

⁵ Tëë kɛ gua̱a̱th kɛ riaw päämni piny, kä tëë kɛ gua̱a̱th kɛ ruɔ̱liɛn. Tëë kɛ gua̱a̱th kɛ ɣöö bi naath rɔ̱ bom, kä tëë kɛ gua̱a̱th kɛ ɣöö /ci naath rɔ bi bom.

⁶ Tëë kɛ gua̱a̱th kɛ jek duɔ̱ɔ̱rä, kɛ gua̱a̱th kɛ ba̱thdɛ. Tëë kɛ gua̱a̱th kɛ ti̱et duɔ̱ɔ̱rä, kɛ gua̱a̱th kɛ yiäkdɛ.

⁷ Tëë kɛ gua̱a̱th kɛ rët duɔ̱ɔ̱rä, kɛ gua̱a̱th kɛ köcdɛ. Tëë kɛ gua̱a̱th bitdä, kɛ gua̱a̱th ruac.

⁸ Tëë kɛ gua̱a̱th kɛ nho̱k, kɛ gua̱a̱th kɛ lo̱k. Tëë kɛ gua̱a̱th kɛ ko̱r, kɛ gua̱a̱th kɛ mal.

⁹ Kä ɛŋu mi ci ram mi lät jɛ ɛ jek rɛy la̱tdɛ mɔ?

¹⁰ Ɣän cä riɛk in ci Kuoth ɛ ka̱m naath nɛn.

¹¹ Cɛ ti diaal lät kä gua̱thkiɛn tin luɔtkɛ rɔ̱ kɛ kɛ. Kä cɛ raan moc kɛ ca̱r, kä ŋotdɛ /cɛ min ci Kuothɛ la̱t ni tukä amäni guut ŋäc.

¹² Kä ŋa̱cä jɛ thilɛ mi gɔaa kä naath, ɛ ni ɣöö bi lo̱ckiɛn tɛɛth kä ba gɔy la̱t min ŋot kɛ kɛ tëk.

¹³ Kä ɛn nɔmɔ bä ɛ muc Kuɔth ɛn ɣöö bi raan tekɛ mi camɛ kä bɛ maath kä bi lɔcdɛ tɛɛth rɛy lätnikɛ diaal.

¹⁴ Kä ŋa̱cä jɛ ɛn ɣöö mi ci Kuoth ɛ la̱t, bɛ te thi̱n amäni cäŋ kɛl. Thilɛ mi ba mat thi̱n, kä thilɛ mi ba woc thi̱n. Lät Kuoth nɔmɔ kɛ ɣöö ba jɛ luɔ̱th ɛ naath.

¹⁵ Kä mi te thi̱n ni wal. Kiɛ mɔ bi tuɔɔkɔ, ɛ jɛn mëë te thi̱n ni wal. Kä Kuoth lätdɛ ni mëë ci kɔŋ te wa̱nɔ.

Luk kɛnɛ min te nhiam kɛ nyin Kuɔth

¹⁶ Kä cua̱ mi dɔ̱ŋ lɛ nɛn bä rɛy ɣɔaa, cua̱ ji̱ dueeri nɛn guäth luɔ̱k, kä cua̱ kɛ nɛn bä guäth cuŋni.

¹⁷ Kä cua̱ ruac kɛ lɔcdä, bi Kuoth gua̱n cuŋni kɛnɛ gua̱n dueeri luk kɛɛl, kɛ ɣöö cɛ gua̱a̱th rialikä kɛ ciɛŋ diaal, kɛ gua̱a̱th kɛ lät diaal.

¹⁸ Kä cua̱ lɛ ruac kɛ lɔcdä bä i̱ kɛn nɛy ti̱ti̱ ɣɔ̱n Kuoth nikɛ, kɛnɛ ɣöö bɛ nyuɔ̱th kɛ i̱ ce̱tkɛ nikɛ ley.

¹⁹ Kɛ ɣöö riɛk nath ce̱tdɛ kɛ riɛk leeyni. Bi raan li̱w ce̱tnikɛ lia̱a̱ lɛ̱̈ɛ̱̈. Kɛ ɣöö te kɛn diaal kɛ yiëë ɔ kɛlɔ, thilɛ mi gɔaa kä raan mi lenyɛ ni ley. Kɛn diaal thilɛ kɛ luɔt.

²⁰ Kɛn diaal wä kɛ niɛ guäth ɔ kɛl ɔ. Kɛn diaal kɛ tur, kä bikɛ loc tuur kɛn diaal.

²¹ Kɛ ɣöö thilɛ ram mi ŋäc jɛ ɛn ɣöö bi yiëë ran wä nhial kä bi yiëë lɛ̱̈ɛ̱̈ wä muun.

²² Kä cua̱ jɛ nɛn thilɛ mi gɔaa kɛ raan ɛ ni ɣöö bɛ la̱t ni la̱tdɛ kɛ ɣöö thilɛ mi dɔ̱ŋ mi derɛ la̱t. Kɛ ɣöö thilɛ ram mi dee jɛ nöŋ min ci lɔ̱ɔ̱ tuɔɔk kɔɔrɛ.