Ŋi̱i̱c 1 - RUAC KUƆTH IN RƐL RƆ

Ti diaal thilɛ kɛ luɔt

¹ Ti̱ti̱ kɛ ruaacni ŋi̱i̱cä gat Dee-bid kuäär kä Jɛ-ru-tha-lɛm.

² Cu ŋi̱i̱c wee, thilɛ jɛ luɔt thilɛ jɛ luɔt, tëk thilɛ jɛ luɔt! Ti diaal thilɛ kɛ luɔt.

³ Ɛŋu mi jek raanɛ kä lätkɛ diaal tin cɛ la̱t?

⁴ La ri̱c ɔ a wä, kä bi ri̱c ɔ ben, kä la mun a doth ni kɛ ta̱a̱dɛ.

⁵ La cäŋ a käny kä bɛ kony, kä la locɛ niɛ guäth in la känyɛ thi̱n.

⁶ La jiɔam a put wëë cuëëc, kä la putdɛ wëë caam. La jälɛ ri̱tdɛ rɔ, kä la locɛ niɛ guäth in bëë thi̱n.

⁷ Kä kiɛr diaal lo̱nykɛ rɛy baar, kä ŋotdɛ /ci bar ni thiäŋ. Kä pi̱w lockɛ niɛ guäth in bäkɛ thi̱n.

⁸ Ti diaal nööŋkɛ cuɔ̱c, a /ci raan kɛ dee luäŋ kɛ lat. /Ci waŋ ran thieŋ kɛ guec, kä /ci ji̱th ran thieŋ kɛ lieŋ.

⁹ Kä mi ci kɔŋ te thi̱n ɛ jɛn bi te thi̱n ɔ, kä mi ca kɔŋ la̱t ɛ jɛn ba la̱t ni jɛ mɔ. Kä thilɛ mi pay tuɔɔk rɛy ɣɔaa kɛɛliw.

¹⁰ Kä tëë kɛ mi dee raan ɛ lar i̱, “Nɛmɛ payɛ tuɔɔk”? Tëë thi̱n ni wal, a /ka̱nɛ ni ben.

¹¹ Thilɛ ram mi tiim mi ci wä ni wal, a cäŋɛ ni nɛy tɔ̱ bi ben tɔ̱, /ca kɛ bi tim, ɛ nɛy tɔ̱ ba kɛ guɔ̱ɔ̱r tɔ̱.

Ŋäc ŋɔaani thilɛ jɛ luɔt

¹² Ɣän ŋi̱i̱c cä kɔŋ a kuäär I-thɛ-rɛl kä Jɛ-ru-tha-lɛm.

¹³ Ɣän cua̱ jɛ go̱r kɛ ŋäc wecdä ɛn ɣöö dëë tin diaal tin ca la̱t rɛy ɣɔaa ŋa̱c. Cua̱ jɛ jek ɛ la̱t mi thiɛk ci Kuoth ɛ ka̱m naathɛ.

¹⁴ Cua̱ kɛn diaal nɛn kɛn tin ca la̱t rɛy ɣɔaa. Kä nɛnɛ, kɛn diaal thilɛ kɛ luɔt, ce̱tdɛ kɛ wuɔ̱ɔ̱r kɔr jiɔam.

¹⁵ Kä min ci gɔ̱a̱ŋ /ca dëë luäŋ kɛ ri̱c, kä tin thil /ca kɛ dee luäŋ kɛ kuën.

¹⁶ Kä cua̱ rɔ jiök i̱, “Ta̱a̱ kɛ ŋäc pɛlä mi di̱i̱t kä nɛy diaal tëë ci ruëc kä Jɛ-ru-tha-lɛm nhiamdä. Kä ci wi̱cdä thia̱a̱ŋ kɛ ŋäc kɛnɛ tiit ŋɔaani mi di̱i̱t.”

¹⁷ Kä cua̱ jɛ lɛ go̱r ɛn ɣöö bä ŋäc ŋɔaani kɛnɛ pɛl kɛ yɔ̱ɔ̱ŋ kɛ dɔ̱ɔ̱r lɛni ŋa̱c. Kä cua̱ jɛ lɛni jek ɛ wuɔ̱ɔ̱r kɔɔr jiɔam.

¹⁸ Kä mɔ ci ŋɔak lɛ ŋa̱c ɛlɔ̱ŋ ɔ, la diɛɛri ɛlɔ̱ŋ bä. Kä ram ci ŋäcdɛ rep la diɛɛrɛ rɔ a reep bä.