Nɛ-ɣɛm-yaa 9 - RUAC KUƆTH IN RƐL RƆ

Lat nath kɛ dueerkiɛn

¹ Kä kɛ cäŋ kä jiɛn da̱ŋ rɛw wi̱cdɛ ŋuaan kɛ jɛn pay bärɔw, cu ji̱ I-thɛ-rɛl rɔ̱ dol kä thɛ̈kɛ mi̱th kä ciɛŋ kɛn ni bieyni cuali kä ca wuɔ̱thkiɛn moc tup kɛ ɣöö jiɛth lo̱ckiɛn.

² Kä cu ji̱ I-thɛ-rɛl rɔ̱ lɛ̈y go̱lä kä nɛy tin kɔ̱ŋ, cukɛ rɔ̱ jiɛc kä cukɛ dueerkiɛn kɛnɛ jiäk gua̱nikiɛn lat.

³ Cukɛ rɔ̱ jiac cuɔ̱ŋ gua̱thnikiɛn, kä cukɛ kuën kä bok ŋuɔ̱tni Kuɔth Nhial ni Kuothdiɛn kɛ thaakni diɔ̱k, kä cukɛ dueerkiɛn lat kɛ thaakni diɔ̱k, kä cukɛ Kuoth Nhial ni Kuothdiɛn pal.

⁴ Kä cu Jɔ-cua kɛnɛ Bani kɛ Kɛ̈d-mi-el kɛnɛ Cɛ-bɛ̈n-yaa kɛ Buni kɛnɛ Ce-reb-yaa kɛ Bani kɛnɛ Kɛ-na-ni cuɔ̱ŋ kä ko̱t ji̱ Lii-bay palkɛ Kuoth Nhial ni Kuothdiɛn kɛ jɔw mi di̱i̱t.

⁵ Kä cu ji̱ Lii-bay kɛ Jɔ-cua kɛnɛ Kɛ̈d-mi-el kɛ Bani kɛnɛ Ɣä-cab-nɛ-yaa kɛ Ce-reb-yaa kɛnɛ Ɣo-di-yaa kɛ Cɛ-bɛ̈n-yaa kɛnɛ Pɛ-thɛ̈k-yaa wee i̱, “Jiacɛ rɔ̱ kä liakɛ Kuoth Nhial ni Kuothdun a thil pek. A puɔ̱th tekɛ ciötdɛ in bum kä a jɛ puanykɛ kɛ puɔny mi leny liakni diaal.”

Pal Ɛdhra kɛ lat dueeri

⁶ Kä cu Ɛdhra pal wëë i̱, “Ɛ ji̱n la Kuoth ni ji̱n kärɔa, kä ɛ ji̱n lät nhial ɔ kɛnɛ pua̱a̱r kɛ nyinkiɛn diaal, amäni piny kɛnɛ nyinkɛ diaal tin te thi̱n, kɛ yiër kɛnɛ nyinkiɛn diaal tin te rɛydiɛn, ci ti diaal moc kɛ tëk. Kä nyin nhial diaal palkɛ ji̱.

⁷ Kä ɛ ji̱n Kuoth Nhial, Kuoth ëë mɛɛk Ab-ram curi jɛ nööŋ raar kä Ur ro̱o̱l ji̱ Kɛ̈l-da-ya kä curi jɛ cɔl i̱ A-bɛ-ram.

⁸ Curi jɛ jek te lɔcdɛ kɛ ŋa̱th nhiamdu, kä curi mat ruac lat kɛ jɛ ɛn ɣöö bi kuaykɛ ka̱m mun ji̱ Kɛ-naan kɛnɛ ji̱ Ɣɛ̈th kɛ ji̱ Ɛ-mor kɛ ji̱ Pɛ-rii-dhi kɛ ji̱ Yɛ-buth kɛnɛ ji̱ Gir-gac. Curi ruacdu jak kä thuɔ̱k kɛ ɣöö ɛ ji̱n gua̱n cuŋni.

⁹ “Kä curi rik gua̱nikɔ nɛn kä I-jëp kä curi luliɛn liŋ rɛy Bar in Tith.

¹⁰ Kä ci ti ga̱ykɛ naath lät kä Pɛro kɛnɛ kuaanykɛ diaal kɛ ji̱ wecdɛ diaal kɛ ɣöö ŋäci ciaŋ ëë jiääk ëë ca lät kä gua̱a̱ri. Ci rɔ moc kɛ kɛ̈k mi te thi̱n amäni wa̱lɛ.

¹¹ Kä curi pi̱ Bar in Tith da̱a̱k nhiamdiɛn, a bikɛ jɛ jiɛth ni ko̱o̱tdä. Kä curi nɛy tëë guɔ̱ɔ̱rkɛ kɛ muɔl däär bar ce̱tnikɛ döl rɛy pi̱i̱ni ti ŋuan.

¹² Kä curi kɛ bo̱th kɛ pua̱r kɛ cäŋ däär, kä bo̱o̱thi kɛ kɛ mac kɛ wäär mi mockɛ buay dup in wäkɛ thi̱n.

¹³ Kä curi ben wi̱i̱ pa̱a̱m Thi-nay, kä curi ruac kɛ kɛ ni nhial, kä curi kɛ la̱t ciɛŋ ti cuŋ kɛnɛ ŋuɔ̱t ti thuɔ̱ɔ̱k kɛ luëëk ti gɔw.

¹⁴ Kä cikɛ jak kä ŋa̱ckɛ cäŋ lɔ̱ŋädu min rɛl rɔ, kä cikɛ la̱t luëëku kɛnɛ ciɛŋku kɛ ŋuɔ̱tku kɛ ja̱ŋdu ni Muthɛ.

¹⁵ Kä cikɛ moc kɛ mi̱eth ni nhial kɛ kui̱ buathdiɛn, kä cikɛ moc pi̱w rɛy pa̱a̱m kɛ kui̱ rɛ̈wdiɛn, kä cikɛ la̱r ɣöö ba mun ëë ci ya̱ckɛ wä ka̱n.

¹⁶ “Duundɛ ɣöö cu gua̱ndɔɔŋnikɔ lät a jiäk kɛ buɔ̱m wecdiɛn /ka̱n luɔ̱th ni luëëku.

¹⁷ Cukɛ lieŋdɛ lo̱k kä /kenkɛ tëë ga̱ykɛ naath tëë ci la̱t rɛydiɛn tit. Cu buɔ̱m ni wuɔ̱thkiɛn a ba kuëny ni rɔ̱ bo̱o̱th mi lockɛ kuaanyä kä I-jëp. Duundɛ ɣöö ɛ ji̱n Kuoth mi tekɛ pälikä, kä tekɛ kɔ̱a̱c lɔaac kä kuiy gakdɛ kä tekɛ nhök mi di̱i̱t, ɛ jɛn /keni kɛ ba̱ny piny ɔ.

¹⁸ A cäŋɛ ni mëë cikɛ rɔ̱ ta̱th ruath tha̱a̱k mëë wäkɛ i̱, ‘Nɛmɛ ɛ jɛn Kuothdun ëë no̱o̱ŋ yɛ raar kä I-jëp,’ ca duer mi di̱i̱t la̱t.

¹⁹ Kä kɛ kɔ̱a̱c lɔaacdu /keni kɛ päl rɛy dɔaar. Kä /ken pua̱r ëë bo̱o̱thkɛ kɛ cäŋdäär kɛ met ba̱ny piny, kä /ken mac ëë la bo̱o̱th kɛ kɛ wäär mëë mockɛ buay dup ëë wäkɛ thi̱n kɛ met ba̱ny piny bä.

²⁰ Kä curi yiëëdu in gɔaa jak kä nyuuthɛ kɛ. Kä /keni kɛ pën mi̱eth, kä cikɛ moc pi̱w kɛ kui̱ rɛ̈wdiɛn.

²¹ Kä curi kɛ tit kɛ run ti jiɛn ŋuaan rɛy dɔaar, kä thilɛ mi cu dak kä kɛ. /Ken bieynikiɛn da̱k kä /kenɛ ciökiɛn pua̱a̱t.

²² Curi kɛ jak kä ka̱nkɛ kuääri kɛnɛ döör, curikɛ jak kä ka̱nkɛ muɔ̱n tin thieek kɛ kɛ. Kä cukɛ mun Thi-yon kuäär Ɛc-bon kɛnɛ mun Ög kuäär Ba-can ka̱n.

²³ Kä curi gaatkiɛn jak kä ŋuan ce̱tnikɛ kuɛl nhial, kä curi kɛ nööŋ muun ëë ci la̱r gua̱ni kɛ ɣöö ba wä ciɛŋ.

²⁴ Cu gaatkiɛn mun wä ka̱n kä cua ciɛŋ, kä curi ji̱ Kɛ-naan tëë ciaŋkɛ mun joc ni nhiamdiɛn, curi kɛ la̱th tetnikiɛn kɛɛl kɛ kua̱rkiɛn kɛ ji̱ wec, kɛ ɣöö bikɛ kɛ lät kä mɔ go̱o̱r kɛn ɛ mɔ.

²⁵ Cukɛ wi̱i̱ ti buɔ̱m buɔ̱ɔ̱m kɛnɛ mun mi gɔaa mac, kä cukɛ duël ti ci thia̱a̱ŋ kɛ ti diaal ti gɔw ciɛŋ, kɛ jieer ti ca tɛt kɛ ka̱a̱k dɛɛni wal kɛ kui̱ kɔaŋ kɛ jiɛn Ɔ-lip kɛ dɛy jiɛn ti ŋuan. Cukɛ mi̱th a bikɛ ria̱ŋ a cu pua̱nykiɛn puɔth, cu lo̱ckiɛn tɛɛth rɛy gɔyni tëë ci ka̱mkɛ.

²⁶ “Duundɛ ɣöö cukɛ thil luth cua riet ni rɔ̱ ji̱, cua yuɔr ni ŋuɔ̱tku jɔkdiɛn kä na̱kɛ gööku tëë luëkɛ kɛ, kɛ ɣöö deekɛ luny kä ji̱, cua la̱t ni dueer ti di̱t.

²⁷ Kɛ kui̱c ɛmɔ curi kɛ la̱th tetni ji̱ tɛ̈riɛn tëë cuakɛ cuc, kä mëë cikɛ ku cuuc, cukɛ luäk go̱r kä ji̱, kä curi kɛ liŋ ni puɔ̱ɔ̱rä. Kä kɛ kɔ̱a̱c lɔaacdu min di̱i̱t curi kɛ moc kɛ lua̱a̱k tëë cuakɛ luäk kä ji̱ tɛ̈riɛn.

²⁸ Kä mëë cikɛ tekɛ mal, cukɛ ti jiäk nyɔk kɛ lätni nhiamdu, kä curi kɛ la̱th tetni ji̱ tɛ̈riɛn kɛ ɣöö bakɛ ruac. Kä ŋotdɛ mëë cikɛ luny kä ji̱ thiëckɛ luäk. Curi kɛ liŋ ni nhial, kä kɛ kɔ̱a̱c lɔaacdu cikɛ luäk nikä ti nyin ŋuan.

²⁹ Curi kɛ luek kɛ ɣöö bikɛ loc kä ŋuɔ̱tku. Kä cukɛ ŋot kɛ mi liakɛ ni rɔ̱ kä /ca luëëku luth, kä cua la̱t ni duer kä ŋuɔ̱tku tin dëë raan jak kä tëk, cikɛ riet ni ji̱ jɔkdiɛn kɛ buɔ̱m wecdiɛn lökɛ ɣöö liɛŋkɛ ruac.

³⁰ Curi ciɛŋkiɛn rut kɛ run ti ŋuan, kɛ yiëëdu curi kɛ luek kɛ thok göökni. Kä cukɛ ŋot /ci kɛn ɛ liŋ. Kɛ kui̱c ɛmɔ curi kɛ la̱th tetni ji̱ thieekädiɛn.

³¹ Kä kɛ kɔ̱a̱c lɔaacdu min di̱i̱t /keni kɛ moc pek, kä /keni kɛ pa̱l ruëëc. Kɛ ɣöö ɛ ji̱n Kuoth mi gɔaa mi kɔ̱c lɔc.

³² “Kɛ kui̱c ɛmɔ täämɛ lö Kuothda, ɛ ji̱n Kuoth mi di̱i̱t mi bum kä dual naath kɛ jɛ, mi tiit mat ruacdɛ kɛnɛ nhökdɛ min thil pek, /cu bɛ̈c bɛ̈ɛ̈c diaal ti̱ti̱ guic i̱ kuiy kɛ, kɛn ti ci ben kä kɔ ti, kɛ kua̱rkɔ kɛnɛ ruëëckɔ kɛ bööth paläda kɛnɛ göökɔ kɛ gua̱nikɔ kɛnɛ nɛɛku diaal nikɛ ni̱n kua̱ri A-thi-ri-ya amäni walɛ.

³³ Kä kɛ ti diaal ti ci ben kä kɔ ti, ci lät ni gɔaa cakɔ kulɛ la̱t ni dueer.

³⁴ /Ken kua̱rkɔ kɛnɛ bööthkɔ kɛ bööth paläda kɛ göökɔ kɛ gua̱nikɔ guɔ̱ɔ̱r ni ŋuɔ̱tku, kä /ka̱n luëëku tit kɛnɛ luek ëë ci lueek nikɛ.

³⁵ A cäŋɛ ni mëë tekɛ kuäärädiɛn, a tɛth lo̱ckiɛn kɛ gɔy tëë ci ka̱mkɛ muun in riäŋ riäŋ, /ka̱n ji̱ lätikä kä /ka̱n rɔ̱ ri̱t kä lät jiäknikiɛn.

³⁶ Kä nɛnɛ, kɛ kɔn kuaany ɛn walɛ, muun ëë ci ka̱m gua̱nikɔ, kɛ ɣöö ba dɛy jiɛnkɛ cam kɛnɛ gɔykɛ tin kɔ̱ŋ, kɛ kɔn kuaany.

³⁷ Kä kɛ kui̱ dueerikɔ, nyinkɛ tin gɔw wäkɛ kä kua̱r tin ci la̱th wi̱i̱da. Ruackɛ pua̱nykɔ kä la̱a̱tkɛ ɣɔ̱ɔ̱kɔ ce̱tkɛ min nhɔk kɛn ɛ, ta̱kɔ kɛ riɛk mi di̱i̱t.”

Nɛy tëë latkɛ mat ruac

³⁸ “Kɛ kui̱ kä ti diaal ti̱ti̱ cuakɔ mat ruac ɛmɛ la̱t a ca gɔ̱r, kä ci bööthkɔ kɛnɛ ji̱ Lii-bay kɛ bööth paläda jɛ thany.”