Nɛ-ɣɛm-yaa 8 - RUAC KUƆTH IN RƐL RƆ

Kuen Ɛdhra kɛ naath ŋuɔ̱t

¹ Cu nɛy diaal rɔ dol guäth kɛl dɛɛkä nhiam Thuɔk Pi̱i̱ni. Kä cukɛ gɔ̱ɔ̱r ni Ɛdhra thiec kɛ ɣöö bɛ bok ŋuɔ̱tni Muthɛ mëë ci Kuoth Nhial jɛ ka̱m ji̱ I-thɛ-rɛl nööŋ.

² Kä cu bo̱o̱th palä ni Ɛdhra bok ŋuɔ̱tni nööŋ nhiam dolä, wutni kɛ män amäni nɛy diaal tin dëë jɛ liŋ, kɛ cäŋ in jio̱liɛn kɛ bärɔw päthni.

³ Kä cuɛ jɛ kuɛn a cɛ nhiamdɛ luɔc dɛɛkä Thuɔk Pi̱i̱ni nikɛ runwaŋ ɛlɔ̱ŋ cu mäni cäŋ däär, nhiam wutni kɛnɛ män kɛ nɛy diaal tëë dëë jɛ liŋ. Kä cu nɛy diaal ji̱thkiɛn pa̱l piny liɛŋkɛ bok ŋuɔ̱tni.

⁴ Kä ɛn Ɛdhra tëë cuŋä wi̱c jiaath mi ca la̱t kɛ kui̱ kä nɛmɛ. Kä cu Mɛ̈-tith-yaa kɛnɛ Cɛmä kɛ Ä-na-yaa kɛnɛ U-ri-yaa kɛ Ɣil-ki-yaa kɛnɛ Mä-the-yaa cuɔ̱ŋ gekädɛ kui̱c cuëëc, kä cu Pɛ-da-yaa kɛnɛ Mi-ca-el kɛ Mɛ̈l-ki-yaa kɛnɛ Ɣa-cum kɛ Ɣɛ̈c-bɛ̈-da-naa kɛnɛ Dhɛ-kar-yaa kɛ Mɛ-cu-lam cuɔ̱ŋ gekädɛ kui̱c caam.

⁵ Kä cu Ɛdhra bok lɛp nhiam nɛɛni diaal, kä guic nɛy diaal ɛ kɛ ɣöö te ni jɛn nhial. Kä mëë cɛ bok lɛp cu nɛy diaal rɔ̱ jiac cuɔ̱ŋ.

⁶ Kä cu Ɛdhra Kuoth Nhial ni Kuoth in di̱i̱t Poth. Kä cu nɛy diaal jɛ loc i̱, “Inɔnɔ, inɔnɔ,” a kapkɛn tetkiɛn nhial. Kä cukɛ wuɔ̱thkiɛn guɔ̱l piny palkɛ Kuoth Nhial.

⁷ Kä cu Yɛ-cuwä kɛnɛ Bani kɛ Ce-reb-yaa kɛnɛ Ya-min kɛ Ɛ̈-kub kɛnɛ Cɛ̈-bɛ-thay kɛ Ɣo-di-yaa kɛnɛ Mä-the-yaa kɛ Kɛ-li-ta kɛnɛ Ä-dhar-yaa kɛ Yo-dha-bad kɛnɛ Ɣa-nan kɛ Pɛ-la-yaa kɛ ji̱ Lii-bay naath luäk kɛ lat ŋuɔ̱tni lɔɔc nath guäth in ŋot naath gua̱thnikiɛn.

⁸ Cukɛ bok ŋuɔ̱tni Kuɔth kuɛn agɔaa, cukɛ lat ni luɔt ruac kɛ ɣöö bɛ wä lɔɔc nath ɛgɔaa ɛn min ca pay kuɛn.

⁹ Kä cu rueec ni Nɛ-ɣɛm-yaa kɛnɛ bo̱o̱th palä kɛ gɔ̱ɔ̱r ni Ɛdhra kɛ ji̱ Lii-bay tëë ŋi̱eeckɛ naath nɛy diaal jiök i̱, “Ɛn cäŋ ɛmɛ ɛ cäŋ mi rɛl gɔɔydɛ rɔ kä Kuoth Nhial ni Kuothdun. /Cuarɛ pär kä /cuarɛ wiee.” Kɛ ɣöö ci naath wiee mëë ca rieet ŋuɔ̱tni liŋ.

¹⁰ Kä cu Nɛ-ɣɛm-yaa kɛ jiök i̱, “Wiaa dho̱rikun, wiaa camɛ mi̱th tin com kä mathɛ kɔaŋ in gɔaa kä muɔcɛ nɛy tin thilɛ mi ca rialikä. Kɛ ɣöö ɛn cäŋ ɛmɛ ɛ cäŋ mi rɛl gɔɔydɛ rɔ kä Kuääran. Ɛ lo̱ckun /ci jiɛth, kɛ ɣöö tɛ̈th lɔaac Kuɔth Nhial ɛ jɛn la buɔ̱mdun ɔ.”

¹¹ Kä cu ji̱ Lii-bay nɛy diaal jak kä bit wä kɛ i̱, “Biɛtdɛ, kɛ ɣöö ɛn cäŋ ɛmɛ rɛlɛ rɔ, ɛ lo̱ckun /ci jiɛth.”

¹² Kä cu nɛy diaal wä dho̱rikiɛn wäkɛ mi̱th kä wäkɛ maath kä cua nɛy tin thil mi ca rialikä jäkikä, kä cu lo̱ckiɛn tɛɛth kɛ ɣöö ci rieet tin ca la̱tkɛ wä lɔɔcdiɛn.

Cäŋ ti̱mä bi̱lɛkä

¹³ Kɛ cäŋ in rɛwdɛ cu bööth dho̱ri diaal kɛ bööth palä kɛ ji̱ Lii-bay ben kä gɔ̱ɔ̱r ni Ɛdhra kɛ ɣöö ba rieet ŋuɔ̱tni ben ŋa̱c.

¹⁴ Kä cukɛ jɛ jek rɛy ŋuɔ̱tni tëë ci Kuoth Nhial kɛ la̱t Muthɛ ɛn ɣöö bi ji̱ I-thɛ-rɛl cieŋ rɛy bi̱lɛni kɛ gua̱a̱th ti̱mä kɛ bärɔw päthni,

¹⁵ kä bikɛ jɛ gɔ̱r kä ba jɛ lat rɛy wi̱i̱nikiɛn diaal kɛnɛ Jɛ-ru-tha-lɛm i̱, “Wiaa wuɔ̱thni päämni wiaa nööŋɛ kar jiaath Ɔ-lip kɛnɛ thɔa̱a̱r kɛ buɔ̱w kɛ jiɛn tin kɔ̱ŋ, kɛ ɣöö bia bi̱lɛni ben la̱t ce̱tnikɛ min ca gɔ̱r.”

¹⁶ Kä cu naath wä wa jiɛn nööŋ, kä cua rɔ̱ lät kä bi̱lɛni, cu ramɔ lät wi̱i̱ duëëlɛ rɛy kälikiɛn kɛnɛ rɛy kal luaak Kuɔth, kɛ day in jac Thok Pi̱i̱ni kɛ day in jac Thok Ɛ-pa-rim.

¹⁷ Cu nɛy diaal tëë luny jɔk pecä lät kɛ bi̱lɛni kä cukɛ cieŋ thi̱n. Nikɛ ni̱n Jɔ-cua gat Nun amäni cäŋ ɛmɛ, /ken ji̱ I-thɛ-rɛl ti̱em mi ce̱tkɛ nɛ met la̱t. Cu lo̱ckiɛn tɛɛth ɛlɔ̱ŋ.

¹⁸ Kä kɛ cäŋ kɛ cäŋ nikɛ cäŋ ëë nhiam kɛnɛ cäŋ ëë jɔak, la Ɛdhra bok ŋuɔ̱tni Kuɔth a kuɛɛn. Kä cukɛ ti̱em la̱t kɛ ni̱n bärɔw, kä kɛ bädäk ni̱ni cukɛ duɔl mi rɛl rɔ dol ce̱tnikɛ ciɛŋkɛ.