Nɛ-ɣɛm-yaa 6 - RUAC KUƆTH IN RƐL RƆ

Löök Nɛ-ɣɛm-yaa tin kɔ̱ŋ

¹ Täämɛ mëë ca la̱r Thɛ̈n-bɛ̈-lat kɛnɛ To-bi-yaa kɛ Gɛ-cɛm raan Ä-rab kɛ duɔth ji̱ tɛ̈ra ɛn ɣöö cä päny täth kä thilɛ kam mi ci duɔth (Cäŋɛ ni mëë ŋot thiekni /ka̱nkɛ ni la̱th thi̱n),

² cu Thɛ̈n-bɛ̈-lat kɛnɛ Gɛ-cɛm ɣä jäk kä raan wäkɛ i̱, “Bër banɛ röm wi̱c kɛl rɛy tɔ̱ɔ̱rä Ono.” Kua lɛ lot ni ɣöö ba ɣä lät kä mi jiääk.

³ Kä cua̱ kɛ jäk kä naath wa̱a̱ i̱, “Ɣän la̱tdä la̱t mi di̱i̱t, ɣän /cä bi ben. Ɛŋu dëë la̱t ka̱p cuɔ̱ŋɔ a ba̱nyä jɛ piny kua̱ lɛ wä kä yɛ mɔ?”

⁴ Cukɛ ɣä jäk kä ruac ɛ mɔ nikä ŋuaan kä cua̱ kɛ loc nikɛ jɛ luɔc ɛmɔ.

⁵ Kɛ jɛn duɔ̱ɔ̱p ɛ mɔ ci Thɛ̈n-bɛ̈-lat ɣä jäk kä kuanydɛ kɛ ja̱k in dhieecdiɛn a te tetdɛ kɛ warɛgak mi /ka̱n gäk.

⁶ Kä ɛn warɛgak ca gɔ̱r i̱, “Ca jɛ lat rɛy dööri, kä ci Gɛ-cɛm jɛ lar bä ɛn ɣöö ji̱n yɛnɛ ji̱ Juudh go̱rɛ kac raar, ɛ jɛn tääth yɛnɛ pänyɔ. Kä ji̱n go̱o̱ri ɣöö bia̱ kuääriɛn kɛ min ca lat.

⁷ Kä ci rɔ kuëny go̱o̱k ti ruac kɛ kui̱du kä Jɛ-ru-tha-lɛm i̱, ‘Tëë kɛ kuäär kä Juda.’ Kä täämɛ ba ruac ɛmɔ la̱t kuäär ce̱tnikɛ rieet ti̱ti̱. Kɛ kui̱c ɛmɔ bër ban ben ruac.”

⁸ Kä cua̱ jɛ jäk kä ruac i̱, “Thilɛ ti ce̱tkɛ tɔ̱ ci lat tɔ̱ ti ci tuɔɔk. Carkɛ ji̱n kɛ wi̱cdu kärɔa.”

⁹ Kɛn diaal görkɛ ni ɣöö bakɔ dual, caar kɛn ɛ i̱, “Bikɛ dual a /ca la̱t bi la̱t.” Kɛ kui̱c ɛmɔ täämɛ lö Kuoth ku ɣä moc kɛ buɔ̱m.

¹⁰ Kɛ cäŋ kɛl cua̱ wä dhɔr Cɛ-mɛ̈-yaa gat Dɛ-la-yaa gat Mɛɛ-ta-bɛl min ca ga̱k dhɔrɛ, cuɛ wee i̱, “Wanɛ duɔl rɛy luaak Kuɔth, kä ga̱knɛ thieknikɛ kä thi̱n, kɛ ɣöö bikɛ ben ba ji̱ ben näk, bi naath ben kɛ wäär ti ba ji̱ ben näk.”

¹¹ Duundɛ ɣöö cua̱ wee i̱, “Ɛ dëë ram mi ce̱tkɛ ɣä rɔ ku bar? Kiɛ dëë ram mi ce̱tkɛ ɣä wä rɛy luaak Kuɔth kɛ ɣöö bä tëk? Ɣän /cä bi wä rɛy luaak.”

¹² Kä cua̱ jɛ ŋa̱c ɛn ɣöö /ken Kuoth ɛ ja̱k, duundɛ ɣöö latdɛ ruac go̱o̱kä nɛmɛ kɛ kui̱dä kɛ ɣöö ca jɛ kɔk ɛ Thɛ̈n-bɛ̈-lat kɛnɛ To-bi-yaa.

¹³ Kɔakɛ jɛ kɛ ɣöö bɛ ɣä jak kä dual a bä duer cu la̱t, kä bä cu tekɛ kɛ̈k mi jiääk kɛnɛ pöc.

¹⁴ Kä lö Kuothdä tim Thɛ̈n-bɛ̈-lat kɛnɛ To-bi-yaa kɛ tin diaal tin ci kɛn kɛ la̱t, kä tim gök ciëk ni No-ɛ̈d-yaa kɛnɛ tha̱a̱ŋ göökni tin jakɛ ɣä kä dual.

Thuɔ̱k la̱t

¹⁵ Cu ta̱th pa̱a̱ny thuɔ̱k kɛ ni̱n ti jiɛn dhieec wi̱cdɛ rɛw kɛ cäŋ kä jiɛn da̱ŋ rɛw wi̱cdɛ dhieec kä pay bäkɛl (kornyoot).

¹⁶ Kä mëë ca jɛ liŋ ɛ ji̱ tɛ̈ra diaal kä ca jɛ nɛn ɛ döör diaal tin te thiekäda, cukɛ dual ɛlɔ̱ŋ kɛ ɣöö ci kɛn ɛ ŋa̱c ɛn ɣöö la̱t ɛmɛ thuɔ̱kɛ jɛ kɛ luäk Kuɔthda.

¹⁷ Ɛn guäth ɛmɔ cu ji̱ Juda tin luɔ̱thkɛ warɛgakni ti ŋuan jäk kä To-bi-yaa, kä la bä luɔc warɛgakni To-bi-yaa kä kɛ.

¹⁸ Kɛ ɣöö nɛy ti ŋuan kä Juda ca rɔ̱ yac kɛ ɣöö ɛ cɔ nya Cɛ-kɛ̈n-yaa gat Araa, kä ci gatdɛ ni Yɛ-ɣo-ɣa-nan nya Mɛ-cu-lam gat Bɛ-rɛk-yaa kuɛn.

¹⁹ Kä cukɛ gɔɔy la̱tdɛ lat nhiamdä, kä la̱tkɛ jɛ ruacdä. Cu To-bi-yaa ɣä jäk kä warɛgakni kɛ ɣöö bä dual.