Nɛ-ɣɛm-yaa 5 - RUAC KUƆTH IN RƐL RƆ

Luäk Nɛ-ɣɛm-yaa kɛ can

¹ Täämɛ cu wutni ti ŋuan kɛnɛ mänkiɛn wiee ɛlɔ̱ŋ kɛ kui̱ ganmani ni ji̱ Juudh.

² Wä tha̱a̱ŋkiɛn i̱, “Kɔn kɛ gaatkɔ kɛnɛ nyieekɔ ŋuan nɛy ɛlɔ̱ŋ, go̱o̱r nɛy bɛl ti bakɔ cam kɛ ɣöö bakɔ tëk.”

³ Kä wä tha̱a̱ŋ nath i̱, “Kɔn cakɔ ka̱a̱kɔ kɛnɛ ka̱a̱k wal kɛ kui̱ kɔaŋ kɛ dho̱rkɔ kɔk ni bɛl kɛ kui̱ buath.”

⁴ Kä cu tha̱a̱ŋ nath ŋot kɛ mi wäkɛ i̱, “Cakɔ yio̱w dɛn ti luny nɛy kɛ kuäär ala tho̱lbo̱k kɛ kui̱ ka̱a̱knikɔ kɛnɛ ka̱a̱k wal kɛ kui̱ kɔaŋ.

⁵ Kä kɔn täämɛ cäät nɛy kɛ gaatmanikɔ, kä cäät gaatkɔ kɛ gaatkiɛn, kä ŋotdɛ kɛ mi bakɔ dhɔɔlkɔ kɛnɛ nyieekɔ kuɔ̱k ɣöö bi kɛn a kuaany, a ci tha̱a̱ŋ nyieetkɔ ku thuŋ a kuaany, kä /cakɔ kɛ dëë luäŋ kɛ luäk kɛ ɣöö ka̱a̱kɔ kɛnɛ cakɛ ka̱n ɛ nɛy ti kɔ̱kiɛn.”

⁶ Ɣän mëë cä wieediɛn kɛnɛ rieet ti̱ti̱ liŋ, cua̱ gaak ɛlɔ̱ŋ.

⁷ Cua̱ kɛ la̱th lɔɔcdä, kä cua̱ nɛy tin luɔ̱thkɛ kɛnɛ ruëëc bɛl. Cua̱kɛ jiök i̱, “Yɛn ciaŋɛ gaatmuɔɔri a jiäk!” Kä cua̱ kɛ ciöl duɔl mi bi ruac kɛ kɛ,

⁸ kä cua̱kɛ jiök i̱, “Ce̱tnikɛ mëë canɛ gaatmanikɔn ni ji̱ Juudh tëë ca kök döör kɔn kɔk. Ɛn täämɛ kɔk yɛn gaatmuɔɔri, derɛ ku la ɣöö ba kɛ nyɔk kɛ kök kä yɛ?” Cukɛ biɛt, kɛ ɣöö thilɛ riet mi dëë lar.

⁹ Kä cua̱ wee i̱, “Ɛn nɛ la̱tdɛ mi /cɛ gɔaa. Ɛ /ci yɛn dëë ku guɔ̱ɔ̱r ni luth Kuɔthdan kɛ ɣöö bia ciaŋ dööri tin la ji̱ tɛ̈ran päl?

¹⁰ Duundɛ ɣöö ɣän kɔnɛ gaatmaar kɛ ji̱ kɔaarä cua̱kɔ naath dën yio̱w kɛnɛ bɛl. Kɔn pa̱lnɛ tin görnɛ.

¹¹ Luɔ̱cɛ kɛ ka̱a̱kiɛn kɛnɛ ka̱a̱k wal kɛ kui̱ kɔaŋ kɛ dho̱rkiɛn kɛ jiɛn Ɔ-lip, kä pa̱lnɛ kɛ liɛɛth kɛnɛ yio̱w kɛ bɛl kɛnɛ kɔaŋ tin ca dɛn ɛ kɛn niɛ walɛ.”

¹² Kä cukɛ wee i̱, “Bakɔ kɛ luɔ̱ckɛ kä thilɛ mi bakɔ thiec kä kɛ. Bakɔ la̱t ni min ci lar.” Kä cua̱ bööth palä cɔl, kä cua̱kɛ jak kä yaac kɛn rɔ̱ kɛ ɣöö ba la̱t ni min ci kɛn ɛ lar.

¹³ Kä cua̱ bi̱i̱ lɛtädä tɛŋ wa̱a̱ i̱, “Bi Kuoth nɛy tin /cia ruac ɛmɛ bi tit tɛ̈ŋ jɔ̱ɔ̱r dho̱rikiɛn kɛnɛ muɔ̱nkiɛn. A ram ɛmɔ tɛ̈ŋkɛ raar a bɛ thil ŋu.” Kä cu duɔl kɛɛliw wee i̱, “Inɔnɔ.” Kä ɛ liak wä kä Kuoth Nhial. Kä cu naath la̱t ni min ca lar.

Gɔɔy Nɛ-ɣɛm-yaa

¹⁴ Kä nikɛ gua̱a̱th ëë kuanykɛ ni ɣä ala rueecdiɛn muun Juda, nikɛ ruɔ̱n jiɛn da̱ŋ rɛw amäni ruɔ̱n jiɛn diɔ̱k wi̱cdɛ rɛw ruëc kua̱r ni Är-tɛ̈k-cɛ̈th-tɛ, kɛ run wäl rɛw, ɣän kiɛ gaatmaar thilɛ ram mi ci mi̱eth in la duŋ kua̱r met cam.

¹⁵ Rueec ëë te nhiamdä cɛ naath moc kɛ riɛk mi di̱i̱t, cɛ mi̱eth kɛnɛ kɔaŋ ka̱n kä naath amäni yio̱w ti jiɛn da̱ŋ ŋuaan. Amäni kuaanykiɛn ciaŋkɛ naath ɛ jiäk. Duundɛ ɣöö /ka̱n mi ce̱tkɛ nɔ la̱t, kɛ ɣöö luɔ̱thä Kuoth.

¹⁶ Cua̱ la̱th ni rɔ lät pa̱a̱ny ɛmɛ, /ka̱n go̱r ni mun, kä kuaanykä diaal cua dol ni rɔ kɛ kui̱ la̱t.

¹⁷ Kä cuɛ ŋot mi̱ethä kɛɛl wi̱i̱ tokä kɛ nɛy ti kuɔ̱r wi̱cdɛ jiɛn da̱ŋ dhieec, ji̱ Juudh kɛnɛ ruëëc, a /ci nɛy tin bëë kä kɔ kä döör tin thieekɛ kɔ te thi̱n.

¹⁸ Kɛ cäŋ kɛl la thäk kɛl kɛnɛ dët da̱ŋ bäkɛl, kɛ manpalɛ̈ɛ̈k mi rialkɛ ikä kɛ kui̱dä, kä la tëë kɛ kɔaaŋ ti ŋuan kɛ kɔr ni̱ni da̱ŋ wäl. Kä /ka̱n mi̱eth in la la̱tkɛ kä rueec met thiec kɛ ɣöö ɛ ɣa̱c mi thiɛk kä nɛy ti̱ti̱.

¹⁹ Tim ɣä kɛ kui̱ gɔɔyädä lö Kuothdä, kɛ kui̱ kä ti diaal tin cä lät kä nɛy ti̱ti̱.