Nɛ-ɣɛm-yaa 3 - RUAC KUƆTH IN RƐL RƆ

Nyɔak ta̱th pa̱a̱ny Jɛ-ru-tha-lɛm

¹ Ɛ jɛn cu bo̱o̱th palä min di̱i̱t ni Ɛl-ya-cib rɔ jiɛc kɛnɛ dämani ni bööth palä cukɛ duɔ̱ɔ̱p Thuɔk Deet täth. Cukɛ jɛ lɛy kä cukɛ thi̱eknikɛ la̱th thi̱n, cukɛ jɛ la̱t a wä nikä Cuut Kuri cu mäni Cuut Ɣä-nan-el.

² Kä cu ji̱ Jɛ-ri-ko tha̱a̱ŋ kal täth, kä cu Dha-kur gat Im-ri gua̱a̱th in thieek kɛ jɛ täth.

³ Kä cu gaat Ɣɛ̈-thɛ-naa Thok Rɛc täth. Cukɛ wääthnikɛ cuŋ, kä cukɛ thi̱eknikɛ la̱th thi̱n. Kä cukɛ do̱o̱pni kɛnɛ gääknikɛ la̱t bä.

⁴ Kä cu Mɛ-re-moth gat U-ri-yaa gat Ɣɛ̈-kodh duɔthdɛ täth. Kä cu Mɛ-cu-lam gat Bɛ-rɛk-yaa gat Mɛ-ce-dha-bel duɔth in dɔ̱ŋ täth. Kä cu Dha-dok gat Bäna duɔth in dɔ̱ŋ täth.

⁵ Cu ji̱ Tɛ-kowä tha̱a̱ŋdɛ täth, duundɛ ɣöö /ken nɛɛkiɛn tin luɔ̱thkɛ lät piny nɛɛni tin guɛckɛ kɛ lät.

⁶ Kä cu Yo-ya-da gat Pa-the-ɛ̈k kɛnɛ Mɛ-cu-lam gat Bɛ-tho-dɛ-yaa Thok ëë Wal täth. Cukɛ wääthnikɛ la̱t, kä cua thi̱eknikɛ la̱th thi̱n, kä cukɛ do̱o̱pni kɛnɛ gääknikɛ la̱t.

⁷ Kä cua kui̱c in dɔ̱ŋ täth ɛ Mɛ-lɛ̈t-yaa raan Gib-yon kɛnɛ Ya-don raan Me-ro-noth kɛ wutni Gib-yon kɛnɛ wutni Midh-pa tëë ruackɛ ɛ ruëëc wi̱i̱ni kuec Kiɛɛr Yu-pɛ-ree-tidh.

⁸ Kä cua kui̱c in dɔ̱ŋ la̱t ɛ U-dhi-el gat Ɣar-ä-yaa tääth dääpä. Cu Ɣä-nɛ̈n-yaa läät liɛth yi̱i̱rä kui̱c in dɔ̱ŋ täth. Cukɛ Jɛ-ru-tha-lɛm luɔc ni guäthdɛ a räth ni Pääny Raar.

⁹ Kä cua kui̱c in dɔ̱ŋ täth ɛ Rɛ-pa-yaa gat Ɣur rueec kuec Jɛ-ru-tha-lɛm kɛl.

¹⁰ Kä cu Yɛ-dɛ̈-yaa gat Ɣä-ru-map kui̱c in lot ni dhɔrɛ täth, kä cu Ɣɛ̈-tuc gat Ɣä-cab-nɛ-yaa kui̱c in dɔ̱ŋ täth.

¹¹ Kä cu Mɛ̈l-ki-yaa gat Ɣa-rim kɛnɛ Ɣɛ̈-cub gat Pɛ̈-ɣɛ̈th-mo-ab kui̱c in dɔ̱ŋ täth kɛnɛ Cuut Buɔ̱l jurayni.

¹² Kä cu Cɛ̈-lum gat Ɣɛ̈-lo-ɣec rueec kuec Jɛ-ru-tha-lɛm kui̱c in dɔ̱ŋ täth kɛnɛ nyieekɛ.

¹³ Kä cu Ɣa-nun kɛnɛ ji̱ Dha-no-a Thok Lo̱o̱lä täth. Cukɛ jɛ nyɔk kɛ ta̱th, kä cua thieknikɛ kɛnɛ do̱o̱pni kɛ gääknikɛ la̱t, kä cukɛ päny mi tekɛ jua̱th tetni ti bathdɔɔr täth a räth nikä Thok Wäär.

¹⁴ Cu Mɛ̈l-ki-yaa gat Re-kab rueec Beth-ɣɛ̈-ka-rɛm Thok Wäär la̱t, cuɛ thieknikɛ kɛnɛ do̱o̱pni kɛ gääknikɛ la̱t bä.

¹⁵ Kä cu Cɛ̈-lum gat Kɔl-ɣo-dhɛ rueec Midh-pa Thok Liɛɛl la̱t, kä cuɛ jɛ kum kä cuɛ thieknikɛ kɛnɛ do̱o̱pni kɛ gääknikɛ la̱t, kä cuɛ Pul Thay-loam min te rɛy kakä kua̱r täth a räth ni kä ko̱o̱tni tin wä kɛ naath piny Däär wec Dee-bid.

¹⁶ Kä kui̱cdɛ cu Nɛ-ɣɛm-yaa gat Adh-buk rueec kuec kɛl wec Beth-dhuur täth a wä ni lotdä kɔ̱a̱k kunyä Dee-bid, a räth ni puul kɛnɛ dhɔr wutni tin buɔ̱m buɔ̱ɔ̱m.

Ji̱ Lii-bay tëë la̱tkɛ päny

¹⁷ Cu ji̱ Lii-bay kui̱c kɛl täth piny Rɛ-ɣum gat Bani, kä cu Ɣä-cɛ̈b-yaa rueec kuec kɛl wec Kiila gua̱th in guur jɛ täth.

¹⁸ Kä kɛ kɔrɛ cu tääth ni gaatmani piny Ba-way gat Ɣe-na-dad rueec kuec kɛl wec Kiila.

¹⁹ Kä cu E-dhɛr gat Jɔ-cua rueec Midh-pa kui̱c in dɔ̱ŋ min lot ni kui̱c in wä nhial a räth nikä gɔŋtɔt täth.

²⁰ Kä cu Ba-ruk gat Dhɛ̈-bay kui̱c in dɔ̱ŋ täth a känɛ jɛ ni kä gɔŋtɔt a räth ni kä thi̱i̱k dhɔaar Ɛl-ya-cib bo̱o̱th palä min di̱i̱t.

²¹ Kä cu Mɛ-re-moth gat U-ri-yaa gat Ɣɛ̈-kodh ɛ la̱t a känɛ jɛ nikä thi̱i̱k dhɔaar Ɛl-ya-cib wä mäni thuɔ̱k dhɔaar Ɛl-ya-cib.

Bööth palä tëë te täth pa̱a̱ny

²² Kä kɛ kɔrɛ cu bööth palä tëë te wi̱i̱ni tin thia̱k tääth.

²³ Kɛ kɔriɛn cu Ben-ya-min kɛnɛ Ɣɛ̈-cub luɔt dho̱rikiɛn täth. Kä cu Ä-dhar-yaa gat Mä-the-yaa gat Ä-nan-yaa tääth gekä dhɔaarɛ.

²⁴ Kä cu Bi-nuwi gat Ɣe-na-dad kui̱c in dɔ̱ŋ täth ɛ känɛ jɛ ni dhɔr Ä-dhar-yaa a wä ni gukä cu mäni gɔŋtɔt,

²⁵ kä cu Pa-lal gat U-dhay tääth lotdä gɔŋtɔtdä kɛnɛ Cuut duëël kua̱r min thieek kɛ kal ga̱a̱ŋni. Kä kɛ kɔrɛ cu Pɛ-da-yaa gat Pɛ̈r-oc,

²⁶ kɛnɛ la̱a̱t luaak Kuɔth tin cieŋ kä O-pɛl tääth amäni luɔt Thuɔk Pi̱i̱ni min wä kui̱ känyä ca̱ŋ kɛnɛ Cuut in la gaŋkɛ ni luak Kuɔth.

Ta̱a̱th tin kɔ̱kiɛn

²⁷ Kɛ kɔriɛn cu ji̱ Tɛ-kowä kui̱c in dɔ̱ŋ täth min lot ni Cuut in di̱i̱t a räth ni pääny O-pɛl.

²⁸ Kä cu bööth palä tääth ni nhial Thok Jio̱ŋko̱o̱ri täth ram ɔ a lotdɛ ni nhiam dhɔaarɛ.

²⁹ Kä cu Dha-dok gat I-mer tääth kɔɔriɛn lotdɛ ni nhiam dhɔaarɛ. Kä cu Cɛ-mɛ̈-yaa gat Cɛ-kɛ̈n-yaa yieen Thuɔk känyä ca̱ŋ tääth kɔɔrɛ.

³⁰ Kä cu Ɣä-nɛ̈n-yaa gat Cɛ-lɛm-yaa kɛnɛ Ɣa-nun bäkɛl gan Dha-lɔp kui̱c in dɔ̱ŋ täth. Kä cu Mɛ-cu-lam gat Bɛ-rɛk-yaa kui̱c in lot ni dhɔrɛ täth.

³¹ Kä cu Mɛ̈l-ki-yaa tääth dääpä tääth a wä ni dhɔr la̱a̱tni luaak Kuɔth kɛnɛ köök min lot ni Thok Gueecni a räth ni duëël in te nhial gɔŋtɔtdä.

³² Cua jɛ la̱t amäni kam duëël in te nhial gɔŋtɔtdä kɛnɛ Thok Deet ɛ ta̱a̱th dääpä kɛ köök.