Nɛ-ɣɛm-yaa 2 - RUAC KUƆTH IN RƐL RƆ

Wä Nɛ-ɣɛm-yaa kä Jɛ-ru-tha-lɛm

¹ Kɛ pay Ni-than kɛ ruɔ̱n jiɛn da̱ŋ rɛw ruëc Kua̱r ni Är-tɛ̈k-cɛ̈th-tɛ mëë te kɔaŋ nhiamdɛ, cua̱ jɛ tith kä cua̱ jɛ ka̱m kuäär. Ɛn guäth ɛmɔ /kenɛ ɣä met nɛn ɛ jiäk lɔcdä.

² Kä cu kuäär ɣä jiök i̱, “Ɛŋu jɔc nhiamdu ce̱tkɛ ram mi jiäk lɔcdɛ, kä thilɛ ji̱ juey? Thilɛ ŋu ɛ ni jiääk lɔaac.” Kä cua̱ dual ɛlɔ̱ŋ.

³ Kä cua̱ kuäär jiök i̱, “Bi kuäär jääny kɛ tëk amäni cäŋ kɛl! Kä ci nhiamdä dëë jiääk i̱di mi ci wec in ca gua̱ndɔɔŋnikɔ kony thi̱n da̱k, kä ci mac thieknikɛ waŋ?”

⁴ Kä cu kuäär ɣä jiök i̱, “Kä ɛŋu mi go̱o̱ri?” Kä cua̱ Kuoth Puɔ̱ɔ̱rä pal.

⁵ Kä cua̱ kuäär jiök i̱, “Mi nhɔk kuäär ɛ, a dëë gɔɔy jek kä ji̱, jäk ni ɣä kä Juda, wec in ca gua̱ndɔɔŋnikɔ kony thi̱n, dëë jɛ wä nyɔk kɛ ta̱th.”

⁶ Kä cu kuäär ɣä jiök a te ciek kua̱r nyuurä gekädɛ i̱, “Bi wä kɛ pek mi ni̱n di, kä bi luny jɔk i̱ nɛy?” Cu kuäärɛ nhɔk ɛn ɣöö bä wä, kä cua̱ jɛ la̱r ni̱n.

⁷ Cua̱ jɛ jiök i̱, “Mi nhɔk kuäär ɛ, ɛ ɣä muɔckɛ kɛ warɛgak mi bä nöŋ ruëëc wi̱i̱ni tin te kui̱c Kiɛɛr Yu-pɛ-ree-tidh, kɛ ɣöö ba ɣä nhök wä amäni mi cä cop kä Juda.

⁸ Kä ɛ ɣä muɔckɛ kɛ warɛgak mi nöŋä A-thap gääŋ ruɔ̱ɔ̱p kua̱r, kɛ ɣöö derɛ ɣä moc kɛ jiɛn ti dëë wä lät ni thiekni duëël in bum, in thieek kɛ luak Kuɔth, kɛnɛ kal wec, kɛ duel in bä wä cieŋ thi̱n.” Kä cu kuäär ɣä ka̱m ti diaal tin cä thiec, kɛ ɣöö te puɔ̱th Kuɔthdä kɛɛl kɛ ɣä.

⁹ Cua̱ ben kä ruëëc wi̱i̱ni tin te kui̱c Kiɛɛr Yu-pɛ-ree-tidh, kä cua̱kɛ ka̱m warɛgakni kua̱r. Cu kuäär bööth rɛ̈m kɛnɛ ji̱ jiöŋkööri ja̱k kɛɛl kɛ ɣä.

¹⁰ Kä mëë ci Thɛ̈n-bɛ̈-lat raan Beth-o-ron kɛnɛ To-bi-yaa raan Am-on tin la̱a̱t mɛmɛ liŋ, cu lɔcdiɛn jiääk ɛlɔ̱ŋ mëë ca ŋa̱c ɛn ɣöö tëë kɛ ram mi ruac kɛ kui̱ gan I-thɛ-rɛl.

¹¹ Kä cua̱ wä kä Jɛ-ru-tha-lɛm, cua̱ cieŋ ɛn wi̱ni kɛ ni̱n da̱ŋ diɔ̱k.

¹² Ɛ jɛn cua̱ rɔ jiɛc kɛ wäär ɣän kɔnɛ wutni kɔ̱kiɛn ti tɔt, kä cuɛ thil ram mi cua̱ la̱r min ci Kuothdä jɛ la̱th lɔɔcdä ɛn ɣöö dëë lät kä Jɛ-ru-tha-lɛm. Kä thilɛ ley ti te ɣä ɛni min kɔatdä.

¹³ Kɛ wäär cua̱ wä raar kɛ Thok Lo̱o̱lä a wä kä Wa̱t Pi̱i̱ni Guɔɔri, kä cua̱ wä nikɛ Thok Wäär, kä cua̱ päny Jɛ-ru-tha-lɛm in ci tɛɛth kɛnɛ thieknikɛ tin ci mac kɛ pɛt nɛn.

¹⁴ Kä cua̱ lɛ wä kɛ duɔ̱ɔ̱p Thuɔk Liɛɛl cua̱ wä ni Thok Puɔ̱ɔ̱l kua̱r, duundɛ ɣöö cuɛ thil gua̱a̱th mi dëë cooth kɛ ley in kɔatdä.

¹⁵ Kä cua̱ jiɛɛn kɛ wäär kɛ duɔ̱ɔ̱p lo̱o̱lä wa̱a̱ päny guic, kä cua̱ luny jɔk, cua̱ wä rɛc kɛ Thok Lo̱o̱lä.

¹⁶ Kä /ken la̱a̱t gua̱a̱th in cä wä thi̱n kiɛ min cä wä la̱t ŋa̱c, kɛ ɣöö /ka̱n ji̱ Juudh kɛ bööth palä kɛnɛ nɛy tin ruëëc kɛ bööth kɛnɛ duɔth nath tin ba la̱t la̱t ni la̱r ruac.

¹⁷ Kä cua̱ kɛ jiök i̱, “Cia riɛk in ta̱nɛ thi̱n nɛn. Jɛ-ru-tha-lɛm cɛ da̱k kä ci thieknikɛ waaŋ kɛ mac. Bia wanɛ päny Jɛ-ru-tha-lɛm täth, kɛ ɣöö ci kɔn bi lɛ ŋot kɛ pöc.”

¹⁸ Kä cua̱ kɛ la̱r ɣöö te Kuothdä kɛɛl kɛ ɣä kɛnɛ mëë ci kuäärɛ la̱r ɣä. Kä cukɛ ɣä loc i̱, “Tuɔknɛ ta̱th.” Kä cua rɔ̱ bum kɛ la̱t mi bi gɔaa kɛ kɛ diaal.

¹⁹ Kä mëë ci Thɛ̈n-bɛ̈-lat raan Beth-o-ron kɛnɛ To-bi-yaa kɛ ji̱ Am-on kɛ Gɛ-cɛm raan Ä-rab jɛ liŋ cukɛ nɛy dɔl wä kɛ i̱, “Kä ɛŋu ɛnɛ la̱tdɛ mi? Ɛ ku yɛn luɔ̱c ni rɔ̱ kuäär?”

²⁰ Kä cua̱ kɛ loc i̱, “Bi Kuoth puɔ̱rä kɔ moc gɔɔy, kä kɔn ja̱a̱ŋkɛ bakɔ la̱t tok. Duundɛ ɣöö kɛ kui̱dun thilɛ yɛ gua̱a̱th kiɛ cuɔ̱ɔ̱ŋ kiɛ kɛ̈k kä Jɛ-ru-tha-lɛm.”