Nɛ-ɣɛm-yaa 12 - RUAC KUƆTH IN RƐL RƆ

Ciööt bööthni palä kɛnɛ ji̱ Lii-bay

¹ Ti̱ti̱ kɛ bööth palä kɛnɛ ji̱ Lii-bay tëë luny jɔk kɛɛl kɛ Dhɛ-ru-ba-bɛl gat Cɛ-ɛ̈l-ti-el kɛnɛ Yɛ-cuwä. Thɛ-ra-yaa kɛnɛ Yir-mɛ-yaa kɛ Ɛdhra,

² kɛ Ä-mɛ̈r-yaa kɛnɛ Mɛ̈l-uk kɛ Ɣɛ̈-tuc,

³ kɛ Cɛ-bɛ̈n-yaa kɛnɛ Rɛ-ɣum kɛ Mɛ-re-moth,

⁴ kɛ Ido kɛnɛ Gi-ne-thoy kɛ Ä-bi-yaa,

⁵ kɛ Mi-ya-min kɛnɛ Mad-yaa kɛ Bil-gaa,

⁶ kɛ Cɛ-mɛ̈-yaa kɛnɛ Yo-ya-rib kɛ Yɛ-dɛ̈-yaa,

⁷ kɛ Thɛ̈lu kɛnɛ A-mok kɛ Ɣil-ki-yaa kɛ Yɛ-dɛ̈-yaa. Cu tɔ̱tɔ̱ a kɛn bööth bööthni palä kɛ gaatmani kɛ ni̱n Yɛ-cuwä.

⁸ Kä cu ti̱ti̱ a ji̱ Lii-bay. Yɛ-cuwä kɛnɛ Bi-nuwi kɛ Kɛ̈d-mi-el kɛnɛ Ce-reb-yaa kɛ Juda kɛnɛ Mɛ̈-tɛ̈n-yaa kɛnɛ gaatman cu ka këët din kɛ kui̱ tɛthkä lɔaac.

⁹ Kä cu Bak-bu-ki-yaa kɛnɛ Uno kɛ gaatmani lotädiɛn ga̱a̱mkɛ rɔ̱.

Gaat bo̱o̱thä palä ni Yɛ-cuwä

¹⁰ Kä cu Yɛ-cuwä a gua̱n Yo-ya-kim kä cu Yo-ya-kim a gua̱n Ɛl-ya-cib kä cu Ɛl-ya-cib a gua̱n Yo-ya-da,

¹¹ kä cu Yo-ya-da a gua̱n Jo-na-than, kä cu Jo-na-than a gua̱n Ya-duwa.

Bööth dho̱ri bööthni palä

¹² Kɛ ni̱n tëë Yo-ya-kim ɛ jɛn la bo̱o̱th palä min di̱i̱t ɔ, cu ti̱ti̱ a bööth dho̱ri bööthni palä. Dhɔr Thɛ-ra-yaa cu bo̱o̱thdɛ a Mɛ-ra-yaa, kä dhɔr Yir-mɛ-yaa cua Ɣä-nɛ̈n-yaa,

¹³ dhɔr Ɛdhra cua Mɛ-cu-lam, dhɔr Ä-mɛ̈r-yaa cua Yɛ-ɣo-ɣa-nan,

¹⁴ dhɔr Ma-lu-ki cua Jo-na-than, dhɔr Cɛ-bɛ̈n-yaa cua Jo-thɛp,

¹⁵ dhɔr Ɣa-rim cua Ɛ̈dna, dhɔr Mɛ-ra-yoth cua Ɣɛl-kay,

¹⁶ dhɔr Ido cua Dhɛ-kar-yaa, dhɔr Gi-nɛ-thon cua Mɛ-cu-lam,

¹⁷ dhɔr Ä-bi-yaa cua Dhik-ri, dhɔr Min-ya-min kɛnɛ Mo-ad-yaa cua Pil-tay,

¹⁸ dhɔr Bil-gaa cua Cä-muwä, dhɔr Cɛ-mɛ̈-yaa cua Yɛ-ɣo-na-than,

¹⁹ dhɔr Yo-ya-rib cua Mɛ̈-tɛ̈n-yaa, dhɔr Yɛ-dɛ̈-yaa cua Udhi,

²⁰ dhɔr Thɛ̈-lay cua Ka-lay, dhɔr A-mok cua E-bɛr,

²¹ dhɔr Ɣil-ki-yaa cua Ɣä-cɛ̈b-yaa, dhɔr Yɛ-dɛ̈-yaa cua Nɛ-tan-el.

Ciööt bööthni palä kɛnɛ ji̱ Lii-bay tëë ca gɔ̱r

²² Kä ciööt bööthni dho̱ri bööthni palä kɛnɛ ji̱ Lii-bay tëë ca gɔ̱r nikɛ ni̱n bööthni palä ni Ɛl-ya-cib kɛnɛ Yo-ya-da kɛ Yo-ɣa-nan kɛ Ya-duwa cu mäni ruec Dɔr-ya-wɛc kuäär Pa-rath.

²³ Cua ciööt bööthni dho̱ri kuayni ji̱ Lii-bay gɔ̱a̱r rɛy buɔk kuɛ̈ɛ̈ni amäni ni̱n Yo-ɣa-nan gat Ɛl-ya-cib.

Tho̱p lätni rɛy luaak Kuɔth

²⁴ Kä cu bööth ji̱ Lii-bay a, Ɣä-cɛ̈b-yaa kɛnɛ Ce-reb-yaa kɛ Yɛ-cuwä gat Kɛ̈d-mi-el, kɛ gaatmani tin cuŋ lotädiɛn a ga̱a̱mkɛ rɔ̱ kɛ diit tɛthkä lɔaac, ce̱tnikɛ mëë ca lat ɛ raan Kuɔth ni Dee-bid.

²⁵ Kä cu Mɛ̈-tɛ̈n-yaa kɛnɛ Bak-bu-ki-yaa kɛ O-bad-yaa kɛ Mɛ-cu-lam kɛ Tɛ̈l-mon kɛnɛ Ɛ̈-kub a ga̱a̱ŋ thuɔk kal, guɛckɛ thuk duëli tɔ̱ɔ̱wä.

²⁶ Cua kɛn nɛy tëë lät kɛ ni̱n Yo-ya-kim gat Yɛ-cuwä gatdöö Yo-dha-dak, kɛnɛ Nɛ-ɣɛm-yaa min la rueec kɛ Ɛdhra min la bo̱o̱th palä kä gɔ̱ɔ̱r.

Lëy Nɛ-ɣɛm-yaa kɛ päny Jɛ-ru-tha-lɛm

²⁷ Mëë lɛ̈ykɛ päny Jɛ-ru-tha-lɛm, cua ji̱ Lii-bay go̱r gua̱thni diaal tin tekɛ thi̱n kɛ ɣöö bakɛ nööŋ kä Jɛ-ru-tha-lɛm ba ti̱em leyä ben la̱t kɛ tɛ̈th lɔaac kɛ diit puɔnyni tɛthkä lɔaac kɛnɛ puɔ̱t buɔ̱li kɛnɛ thuɔmni.

²⁸ Cua këët din nööŋ kɛɛl bä rɛy cieŋ in thieek kɛ Jɛ-ru-tha-lɛm kɛnɛ wi̱i̱ Nɛ-to-paa,

²⁹ kɛ Beth-gil-gal kɛnɛ rɛy ciëŋ Gabä kɛ Ɛ̈dh-ma-wɛth, kɛ ɣöö kɛn këët din ca rɔ̱ lät kä wi̱i̱ thieekä Jɛ-ru-tha-lɛm.

³⁰ Kä mëë ci bööth palä kɛ ji̱ Lii-bay rɔ̱ lak, cukɛ naath lak, kä cukɛ thiekni wec kɛnɛ päny lak bä.

³¹ Kä cua̱ ruëëc Juda jak kä ko̱t wi̱i̱ pa̱a̱ny. Kä cua̱ bua̱a̱n da̱ŋ rɛw ti di̱t kuany ti ba diit tɛthkä lɔaac kɛt. Cu buɔ̱n kɛl wä kɛ kui̱c cuëëc kɛ wi̱c pa̱a̱ny wäkɛ Thok Wäär.

³² Kä cua kɛ guɔ̱ɔ̱rɛ Ɣo-ca-yaa kɛnɛ tha̱a̱ŋ bööthni ji̱ Juda,

³³ kɛɛl kɛ Ä-dhar-yaa kɛnɛ Ɛdhra kɛ Mɛ-cu-lam,

³⁴ kɛ Juda kɛnɛ Ben-ya-min kɛ Cɛ-mɛ̈-yaa kɛnɛ Yir-mɛ-yaa,

³⁵ kɛ tha̱a̱ŋ bööthni palä kɛ kaaŋni, kɛ Dhɛ-kar-yaa gat Jo-na-than gat Cɛ-mɛ̈-yaa gat Mɛ̈-tɛ̈n-yaa gat Mi-ka-yaa gat Dha-kur gat A-thap,

³⁶ kɛ ji̱ maarädɛ ni Cɛ-mɛ̈-yaa kɛnɛ Ä-dhar-el kɛ Mi-la-lay kɛnɛ Gi-la-lay kɛ Maac kɛnɛ Nɛ-tan-el kɛ Juda kɛnɛ Ɣä-na-ni, kɛ thuɔmni ti ce̱tkɛ nyin Dee-bid raan Kuɔth. Kä cua kɛ bo̱th ɛ gɔ̱ɔ̱r ni Ɛdhra.

³⁷ Kä cukɛ wä kɛ Thok Pirä pi̱i̱ni, wäkɛ a luɔtkɛ ni nhiamdiɛn kɛ duɔ̱ɔ̱p in wä wi̱c Dee-bid, cukɛ loc wi̱i̱ pa̱a̱ny wäkɛ kɛ wi̱c duëël Dee-bid wäkɛ Thok Pi̱i̱ni kui̱ känyä ca̱ŋ.

³⁸ Cu buɔ̱n in rɛwdɛ wä kɛ kui̱c caam. Kä cua̱ kɛ guɔ̱ɔ̱r kɛ tha̱a̱ŋ nath kɛ wi̱c pa̱a̱ny, wä nɛy kɛ wi̱c Bi̱lɛkä Buɔ̱l jurayni, wä nɛy Pääny in Taar,

³⁹ cuakɔ wä kɛ Thok Ɛ-pa-rim kɛnɛ Thok ëë wal kɛ Thok Rɛc kɛnɛ Biɛɛ Ɣä-nan-el kɛ Biɛɛ Kuri a wä ni Thok Deet, cukɛ wä cuɔ̱ŋ ni Thok Ga̱a̱ŋni.

⁴⁰ Cu kɛn bua̱a̱n da̱ŋ rɛw tin kɛ̈tkɛ diit puɔnyä tɛthä lɔaac wä cuɔ̱ŋ ni rɛy luaak Kuɔth, cu mäni ɣän kɔnɛ tha̱a̱ŋ ruëëcni,

⁴¹ amäni bööth palä, ni Ɛl-ya-kim kɛnɛ Mä-the-yaa kɛ Min-ya-min kɛnɛ Mi-ka-yaa kɛ Ɛl-yo-ɛ-nay kɛnɛ Dhɛ-kar-yaa kɛ Ɣä-nɛ̈n-yaa kɛ kaaŋnikiɛn,

⁴² cu mäni Mä-the-yaa kɛnɛ Cɛ-mɛ̈-yaa kɛ Ɛl-a-dhar kɛnɛ Udhi kɛ Yɛ-ɣo-ɣa-nan kɛnɛ Mɛ̈l-ki-yaa kɛ Ee-lam kɛ E-dhɛr. Kä cu këët din ki̱et kɛɛl kɛ bo̱o̱thdiɛn ni Yidh-ra̱-yaa.

⁴³ Cukɛ muc ti ŋuan thöp ɛn cäŋ ɛmɔ, cu lo̱ckiɛn tɛɛth kɛ ɣöö ci Kuoth kɛ moc kɛ tɛ̈th lɔaac mi di̱i̱t. Cu män kɛnɛ gaat lo̱ckiɛn tɛɛth bä. Cua jɔw tɛthä lɔaac nath kä Jɛ-ru-tha-lɛm liŋ ni guäth mi na̱n.

Tin ŋuɔ̱nkɛ kɛ kui̱ palä rɛy luaak Kuɔth

⁴⁴ Ɛn guäth ɛmɔ cua naath kuany ti bia̱ gueec duëël kuakni tin ba thol, dɛy jiɛn tin nhiam kɛnɛ wa̱l wa̱a̱li. Kɛn nɛy tɔ̱tɔ̱ kɛ ti̱eet kɛ tin ba thol rɛy ka̱a̱kni wi̱i̱ni, tin ca thiec kɛ kui̱ bööthni palä kɛnɛ ji̱ Lii-bay ce̱tnikɛ min ca lar ɛ ŋuɔ̱t. Cu ji̱ Juda lo̱ckiɛn tɛɛth kɛ bööth palä tin lät kɛnɛ ji̱ Lii-bay.

⁴⁵ Cukɛ lät Kuɔthdiɛn la̱t, kä cukɛ lät la̱k nath la̱t, ce̱tkɛ min ca la̱t ɛ këët din kɛnɛ ga̱a̱ŋ thuɔk kal ce̱tnikɛ mëë ca lar ɛ Dee-bid kɛnɛ gatdɛ ni Thɔ-lo-mon.

⁴⁶ Ni wal, kɛ ni̱n Dee-bid kɛnɛ A-thap, la te bo̱o̱th thi̱n kä këët din mi bo̱o̱th diit tɛthä lɔaac kɛnɛ diit puɔnyä Kuɔth.

⁴⁷ Kä kɛ ni̱n Dhɛ-ru-ba-bɛl kɛnɛ Nɛ-ɣɛm-yaa, la ji̱ I-thɛ-rɛl diaal këët din kɛnɛ ga̱a̱ŋ thuɔk kal a käm kui̱diɛn ni ciaŋ. Kä la kɛn kui̱ ji̱ Lii-bay a läth go̱lä, kä bi ji̱ Lii-bay kui̱ gan Ä-ron lɛ la̱th go̱lä.