Nɛ-ɣɛm-yaa 1 - RUAC KUƆTH IN RƐL RƆ

¹ Ti̱ti̱ kɛ rieet Nɛ-ɣɛm-yaa gat Ɣä-kɛ̈l-yaa. Kɛ ruɔ̱n jiɛn da̱ŋ rɛw kɛ pay Kith-lew ruec ni mëë Är-tɛ̈k-cɛ̈th-tɛ mëë ta̱a̱ rɛɛk Cu-cɛ̈n in di̱i̱t,

Pal Nɛ-ɣɛm-yaa

² kɛ cäŋ cu Ɣä-na-ni ram kɛl kä dämaari ben kä Juda kɛnɛ wutni ti kɔ̱kiɛn. Kä cua̱ kɛ thiec kɛ duɔth ji̱ Juudh tëë ci kään pec, kɛnɛ Jɛ-ru-tha-lɛm.

³ Kä cukɛ ɣä jiök i̱, “Kɛn nɛy tëë ci kään pec ɛ ci luny wi̱c, tekɛ rɛy rikä po̱cä mi di̱i̱t ɛlɔ̱ŋ. Ci pa̱nyni Jɛ-ru-tha-lɛm tɛɛth kä ci mac thieknikɛ waŋ.”

⁴ Mëë cä ruac ɛmɔ liŋ, cua̱ nyuur kä cua̱ wiee, cua̱ pa̱r kɛ ni̱n, kä cua̱ mi̱th thɛk kä palä nhiam Kuɔth in la Kuoth Puɔ̱rä.

⁵ Kä cua̱ wee i̱, “Aɣ Kuoth Nhial in la Kuoth Puɔ̱rä, Kuoth in bum kä luɔ̱thkɛ, kä tiit mat ruac kɛnɛ nhök in thil pek kɛ nɛy tin nhɔakɛ ji̱ kä luth ŋuɔ̱tku,

⁶ päli ji̱thku piny, kä lɛp nyinku kɛ ɣöö bi pal jäŋädu liŋ mi palä mi täämɛ nhiamdu kɛ cäŋdäär kɛnɛ wäär kɛ kui̱ ja̱a̱ŋniku ni ji̱ I-thɛ-rɛl. Ɣän latdä dueerkɔ kɔn ji̱ I-thɛ-rɛl tëë cakɔ duer ji̱. Dueer tëë cä la̱t kɔnɛ dhɔr gua̱a̱r.

⁷ Cakɔ lät a jiäk kɛ ji̱, kä /ka̱nkɔ ŋuɔ̱tku kɛnɛ lueeku kɛ ciɛŋku tëë ci la̱r ja̱ŋdu ni Muthɛ luɔ̱th.

⁸ Kä car ruacdu mëë ci la̱t ja̱ŋdu ni Muthɛ, mëë ɛ ji̱n i̱, ‘Mi /cia ɣä bi ŋäth, bä yɛ riaw kä rɛy dööri,

⁹ duundɛ ɣöö mi wä yɛn luny kä ɣä kä bia ŋuɔ̱tkä luɔ̱th kä bia kɛ la̱t, ɛ cäŋɛ ni nɛɛkun tin ca pɛ̈c ni peek ɣɔaa, bäkɛ ma̱a̱t niɛ wi̱ni, kä bäkɛ nööŋ ni guäth in cä mɛk ɛn ɣöö ba ɣä pal thi̱n.’

¹⁰ Kɛ ja̱a̱ŋku kä kɛ nɛɛku tëë luɛli kɛ buɔ̱mdu min di̱i̱t.

¹¹ Kä lö Kuäär, a ji̱thdu liŋ pal jäŋädu, kɛnɛ pal ja̱a̱ŋniku tin luɔ̱thkɛ ciötdu. Kämni ja̱ŋdu tin go̱o̱rɛ ɛn walɛ, kä a jɛ jek kɔ̱a̱c lɔaac nhiam kua̱r.” Kɛ ni̱n tɔ̱tɔ̱ ɛ ɣän la mooc kuäär kɛ kɔaŋɔ.