Nɛ̈m 3 - RUAC KUƆTH IN RƐL RƆ

Da̱k Ni-nɛ-be mi ci päk

¹ Riɛk akɛ wec mi te rɛydɛ kɛ riɛm, mi ci thia̱a̱ŋ kɛ ka̱a̱cni, kɛnɛ kuak ti thilɛ pëcdiɛn pek!

² Kä liɛŋɛ jɔw waatdä kɛnɛ gi̱r gi̱i̱r ciökni thurbiɛɛli, kɛ kop koop ciökni jiöŋkööri kɛnɛ dhi̱k dhi̱i̱k thurbiɛɛli!

³ Kä ci ji̱ jiöŋkööri rɔ̱ rialikä, kä räŋ thɛpni, kä riaw mutni, kä ŋuan nɛy tin ca näk, kɛ ri̱ŋ nath ti /ca luäŋ kɛ kuën, tëth ni naath kɛ ri̱ŋ nɛɛni tin ci li̱w.

⁴ Ɛn wec cɛ ce̱tnikɛ ciek mi riär, kä pɛɛl naath kɛ kuthkɛ, kä jakɛ döör kä kuaany kɛ leerɛ, kä jakɛ naath kä ja̱a̱ŋ kɛ walkɛ.

⁵ Kä cu Kuoth Nhial in la Ruey Ɣɔaa wee i̱, “Ɛ ɣän gua̱n tɛ̈ru, kä bä ya̱a̱tku woc a bi duɔth ni juutdä. Kä bä döör kɛnɛ kua̱r jak kä guɛckɛ ji̱ juutdä.

⁶ Kä ɣän bä ji̱ kum kɛ jiäk kä bä ji̱ ciɛŋ a jiäk, kä ba guɛckɛ ni ji̱ ɛ naath.

⁷ Kä nɛy diaal tɔ̱ ba ji̱ nɛn tɔ̱, bikɛ ga̱a̱c kɛ ji̱ kä bikɛ wee i̱, ‘Ci Ni-nɛ-be da̱k, kä ɛŋa bi jɛ ku lɛ par ɔ?’ Kä bä ram mi bi ji̱ bum kulɛ jiek nikä?”

⁸ A ku gɔaa ni ji̱n kä The-bɛth min te gekä kiɛɛr, min ca wil ɛ pi̱w, min gaŋkɛ ɛ yier, kä pänydɛ pi̱w?

⁹ Kä buɔ̱mdɛ Kuc kɛnɛ I-jëp, a thil guut. Kä tekɛ kɛ mat kɛ Put kɛnɛ Lib-ya.

¹⁰ Kä cuɛ ŋot cua The-bɛth naŋ ala pɛ̈c, kä cua nyintiɛtnikɛ näk duɔ̱pni diaal. Kä cua wutnikɛ diaal tin luɔ̱thkɛ, da̱a̱k kɛ yor gaakni, kä cua wutnikɛ tin di̱t yian kɛ kuatni.

¹¹ Amäni ji̱n bä bia̱ yɔ̱ŋ kɔŋä, kä bi rɔ tɛ̱̈ɛ̱̈. Kä bi gua̱a̱th känä go̱r kä ji̱ tɛ̈r.

¹² Kä ti̱ecku tin buɔ̱m buɔ̱ɔ̱m diaal, ce̱tkɛ kɛ jiath ŋɔa̱a̱p mi ci ciɛk kɛ dɛykɛ tin nhiam, tin la pɛn mi ca jɛ yɔ̱k kä cam naath kɛ.

¹³ Kä nɛnɛ, rɛmku ce̱tkɛ kɛ män. Kä thiekni wecdu tekɛ ɣo̱o̱ŋä kä ji̱ tɛ̈ru, kä ci mac do̱o̱pnikiɛn waŋ.

¹⁴ Jiömɛ rɔ̱ pi̱w kɛ ɣöö ba yɛ go̱l, kä jakɛ ti̱eckun kä bum, wiaa ta̱thɛ mun thuɔpni, rialɛ thop ikä!

¹⁵ Ɛn wi̱ni bi mac yɛ waŋ, kä ba yɛ näk ko̱o̱r. Bɛ yɛ thuk ce̱tnikɛ kɔryɔm. Kä rëpɛ rɔ̱ ce̱tnikɛ kɔryɔm, ŋuanɛ ce̱tnikɛ rak!

¹⁶ Rëpɛ pëk nɛɛnikun tin la köök ce̱tnikɛ kuɛl nhial. Kä bikɛ ce̱tnikɛ kɔryɔm mi bar rɔ kɛ gɔ̱kɛ.

¹⁷ Kä ce̱t ga̱a̱ŋkun nikɛ rak, kä ce̱t ŋi̱eeckun nikɛ buɔ̱n kɔaryɔaam mi ci nyuur puɔ̱ny kal kɛ cäŋ ti̱eek, kä min ci cäŋ lɛ̈p, lakɛ rɔ̱ cua bar, a bɛ thil ram mi ŋäc gua̱a̱thdiɛn.

¹⁸ Ci bööthku li̱w, lö kuäär A-thi-ri-ya. Kä ci nɛɛku tin ŋäc ŋɔak niɛɛn. Kä ci nɛɛku däk wuɔ̱thni päämni, kä thilɛ ram mi ruulkɛ.

¹⁹ Kä thilɛ mi bi buɔ̱ɔ̱tku jak kä gɔw. Kä nɛy diaal tin ba thok liŋ kɛ kui̱du, bikɛ tetkiɛn pat kɛ pɛ̈ɛ̈ndu, kɛ ɣöö thilɛ ram mi /ken lät jiäkniku jëk.