Nɛ̈m 2 - RUAC KUƆTH IN RƐL RƆ

Pɛ̈ɛ̈n Ni-nɛ-be

¹ Ci nɛy tin makɛ ji̱ ben Ni-nɛ-be. Gaŋɛ gua̱th tin buɔ̱m buɔ̱ɔ̱m, kä tiɛtdɛ duɔ̱ɔ̱p. Riali rɔ̱ ikä, kä mat buɔ̱mdu kɛɛliw.

² (Kɛ ɣöö ci Kuoth Nhial Je-kɔb luɔ̱c wuɔ̱tdɛ, ce̱tnikɛ wuɔ̱t I-thɛ-rɛl. Cäŋ ni mɔ cakɛ pɛc ɛ pëëc nath ɔ kä ca karkiɛn jak kä jiäk.)

³ Kä tekɛ kɛ köötni ti dɛɛr. Kä ciaŋkɛ bieyni ti dɛɛr. Kä jaŋ yieeth thurbiɛɛlikiɛn ce̱tkɛ bo̱l maac, kɛ cäŋ in wäkɛ kɛ ko̱o̱r, kä riŋ jiöŋköörikiɛn ko̱o̱r.

⁴ Kä wur thurbiɛɛli duɔ̱pni, riŋkɛ rɛc kä lunykɛ raar dɛɛkä wec. Jɔckɛ ce̱tkɛ patariɛy, kä räŋkɛ ce̱tkɛ yiel nhial.

⁵ Kä cɔɔlɛ rɛmdɛ min cɛ liny. Kä tëth nikɛn min wäkɛ, kä cukɛ riŋ puɔ̱ny pa̱a̱ny kɛ pɛ̈th, kä cua köötni la̱th gua̱thni tin gɔw.

⁶ Kä cua thiekni tin te kui̱ kiɛɛr lëp ɣööŋ.

⁷ Kä cua kuäär ciëk naŋ ala pɛ̈c, kä cu nyier tin la la̱a̱tkɛ, pa̱r ce̱tnikɛ kunööri, pa̱tkɛ ni lo̱ckiɛn.

⁸ Cu Ni-nɛ-be ce̱tnikɛ lil mi ci pikɛ wuɔ̱th. Kä wiee kɛ i̱, “Cuɔ̱ŋɛ! Cuɔ̱ŋɛ!” Kä cuɛ thil ram mi cu rɔ riet jɔk.

⁹ “Pɛ̈cɛ ciɛk in bör! Pɛ̈cɛ da̱a̱p! Tëë kɛ yio̱w ti thil pek!”

¹⁰ Jɛn cɛ da̱k! Kä ca päl! Ɛ ca luɔ̱t! Ci lo̱c nath baath kä lathɛ kɛ, kä cɛ nhiam nath yɔm!

¹¹ Kä duel lonyni a nikä, kɔa̱a̱k ŋuɛ̈tni lonyni, gua̱a̱th in la lony a mi̱th thi̱n, gua̱a̱th in la tuut luɔny kɛnɛ ŋuɔ̱ɔ̱t luɔny kɛ dɛykiɛn a wä thi̱n a thil dual?

¹² Ci lony ley mi ro̱ŋ näk kɛ kui̱ dɛɛnikɛ, kä cuɛ jɛ ŋuɔ̱k ni dhoon, kä cɛ duelɛ thiäŋ kɛ dhon ri̱eŋ.

¹³ Kä cu Kuoth Nhial in la Ruey Ɣɔaa ruac wee i̱, “Ɣän lapä gua̱n tɛ̈ru, ɣän bä thurbiɛɛliku waŋ, kä bä ŋuɛ̈tniku näk ko̱o̱r. Kä ɣän thilɛ ley mi bä ba̱ny ji̱ wi̱i̱ muɔ̱ɔ̱n, kä /ca ruac ja̱a̱kniku bi lɛ liŋ.”