Nɛ̈m 1 - RUAC KUƆTH IN RƐL RƆ

¹ Nɛmɛ ɛ ruac kɛ kui̱ Ni-nɛ-be, kɛ nyuuth ëë ca nɛn ɛ Nɛ̈-ɣum raan Ɛl-koc.

Gak Kuɔth Nhial kɛ Ni-nɛ-be

² Ɛn Kuoth Nhial ɛ Kuoth mi gua̱n tiilä kä la coolɛ mi jiääk, Kuoth Nhial ɛ gua̱n gaak, kä la culɛ naath ti jiäk. La culɛ ji̱ tɛ̈rɛ jiäkiɛn, kä rɔmɛ gakdɛ kɛ kui̱diɛn.

³ Ɛn Kuoth Nhial dak gakdɛ, kä di̱t buɔ̱mdɛ, kä /cɛ gua̱n dui̱rä päl baaŋ a /cɛ duäc. Kä duɔ̱ɔ̱pdɛ ɛ thul, kä tur ciöknikɛ kɛ pua̱a̱r.

⁴ Kä cuɛ bar kecikä, kä cuɛ kööt, kä cuɛ kiɛr diaal jakä kööt. Kä ka̱a̱k Ba-can kɛnɛ bɛl wec pa̱a̱m Kar-mɛl cukɛ rɔɔl, kä cu gaakni juaacni Lɛ-ba-nɔn waaŋ.

⁵ Kä cuɛ pääm lath kä cukɛ dhia̱y nhiamdɛ. Kä cu piny dual kɛnɛ tin diaal tin cieŋ thi̱n.

⁶ Kä ɛŋa dee gakdɛ luäŋ ɔ? Kä ɛŋa dee kɛ̈c lɔacdɛ luäŋ kɛ ruɔ̱t ɔ? Cuɛ gakdɛ wuɔc piny ce̱tkɛ mac, kä cu pääm thia̱y nhiamdɛ.

⁷ Kuoth Nhial gɔaaɛ, ɛ gua̱a̱th luäkä rɛy rikä. Kä gaŋɛ nɛy tin lua̱kɛ rɔ̱ jɛ.

⁸ Kä bɛ ji̱ tɛ̈rɛ näk kɛ nyɔc mi te löny mi di̱i̱t, kä bɛ kɛ juɔc ni rɛy muɔ̱th.

⁹ Kä mɔ ci lät kä Kuoth Nhial ɔ, bɛ jɛ moc pek. Kä /cɛ gua̱n tɛ̈rɛ bi duäc kä rɛɛw.

¹⁰ Kä kɛn bikɛ rɔ̱ ce̱tkɛ kui̱c, kɛn nɛy tin ci yɔ̱ŋ kɛ kɔaŋ, bikɛ thuɔ̱k ce̱tnikɛ juaac ti ko̱o̱t.

¹¹ Rɛydu ji̱n Ni-nɛ-be, cu ram mi lät Kuoth Nhial ca̱a̱p ti jiäk ben raar kä ji̱, mi lät naath ni ruaacni.

¹² Kä ci Kuoth Nhial wee i̱, “A cäŋɛ ni mɔ bumkɛ mɔ kä ŋuankɛ, bakɛ näk a bikɛ riaw. A cäŋ ni mi cä yɛ duäcɛ. Ɣän /cä yɛ bi nyɔk kɛ duäc.

¹³ Kä ɛn täämɛ bä yɛ lony kä lätkiɛn tin bɛ̈c bɛ̈ɛ̈c, kä bä kuatni tin ca yiɛn ni yɛ lony.”

¹⁴ Kä cu Kuoth Nhial ruac lar kɛ kui̱ Ni-nɛ-be i̱, “/Ci bi tekɛ gaat ti ba kɛk ciötdu. Ɣän bä kuth jiɛn kɛnɛ kuth yieethä woc rɛy duëël kuthniku. Ɣän bä kɔ̱a̱kdu tɛt, kɛ ɣöö ci jiääk.”

¹⁵ Kä liɛŋɛ ciök raam in no̱o̱ŋ thuk ti gɔw, min lat mal! Kä ŋarɛ ŋarun, lö ji̱ Juda, kɛ thuɔ̱k yäcädun. Kä /ci ji̱ dueeri wecdun bi nyɔk kɛ ma̱c, bakɛ näk nikɛn diaal.